﻿Psalm.
21.
Ange gi tagi o taahili. Se Psalm nii David Tagi Maolunga, de hodooligi e malangilangi i oo mahi; ia e malangilangi mmao i dau hagaola ia. 
Koe gu gaavange gi de ia dono mee e lodo ai, koe tee daohi de mee aana gu dangidangi adu ai. Selah 
Koe gu humai ma gu gaavange gi de ia denga manuuia danuaa; koe gu hagauda ange gi honga dono biho de hau goolo danuaa. 
Ia ne dangidangi adu i de mouli, gai koe ga gaavange gi de ia, de mouli daulooloa ga hano ai e dee ngado mai. 
Dono mahamaha gu laumalie, i hiidinga o dau hagaola, koe gu gaavange gi de ia de mahamaha ma de hagadubu. 
Koe e hagamanuuia ia ga hano ai, ma de hai ia gi malangilangi i mada luoo mada. 
De hodooligi e hagadonu Tagi Maolunga, gai ia e dee baguu naa donu, i hiidinga o de lodo aloha o de Ia Maolunga Mmao laa e deai donu se helui. 
Koe e booboo naa oo hagadaumee alodahi; doo lima madau e booboo naa gilaadeu e kino i de goe. 
Koe e hai naa gilaadeu gi bei de mommee iai de ahi ula, i de masavaa oou e hagasula mai ai. Tagi Maolunga e daa naa gilaadeu ga odi i dono bole, gai dana ahi e dudu naa gilaadeu ga odi. 
Koe e daa naa olaadeu aamuli ga deai e doe i henua i lalo, ma teai olaadeu hagadiilinga e doe i magavaa o dangada. 
Noo gilaadeu e hagatau e hai baasi adu gi de goe ma de hai denga maanadu de vaivai daakodo, gai alaadeu hagatau e dee ssula donu. 
Koe e hai naa gilaadeu gi maatagu gi saavini gi hulo; i dau lui ange dau mee hholu e tili ai gilaadeu. 
Tagi Maolunga, gi laumalie doo hagaamua i hiidinga o oo mmahi; gimaadeu e daahili ma de tuhi oo mahi. 
