﻿Psalm.
16.
Se Miktam nii David Dogu Maadua, buibuia ngau; go koe dogu mommee e buibui ai. 
Au e hai ange gi Tagi Maolunga, “Go koe donu dogu Ia Aamua; e deai sagu mee danuaa daudahi noo e deai goe.” 
De gau dabu i honga de henua, go gilaadeu e mahamaha, gai au e malangilangi ai. 
Daemaha o olaadeu e daudali ange i denga diinonga e hagalagolago naa. Au e dee hai naa donu alaadeu ssigidaumaha e hai i dodo, aabe e dagudagu ingoo o olaadeu diinonga. 
Tagi Maolunga, go koe dogu duuhanga ma dagu ubu; go koe e hagasauaa ina dogu duuhanga. 
Ogu goinga gu hagatuu i mommee danuaa hugadoo; uaa, dogu boolonga e danuaa mmao. 
Au e hagadegi Tagi Maolunga, de ia e agoagona mai au; ogu lodo e agoago mai au i de boo. 
Au e dugu Tagi Maolunga i ogu mada i mua i masavaa alodahi. Go hiidinga ia i dogu baasi madau, au e dee baguu naa donu. 
Deenei ai, ogu lodo gu malangilangi, gai dogu alelo gu tuhi; gai dogu angaanga gu noho baba hogi. 
Go hiidinga koe e dee tili donu au i de mommee o de gau maakau, aabe dugu ange dau ia dabu gi gidee de geelonga laa. 
Koe e hagaago mai gi iloo e au de haiava o de mouli; doo mommee e noho ai iai de malangilangi laumalie, doo lima madau iai denga mee hagamalangilangi ga hano ai. 
