﻿Psalm.
6.
Ange gi tagi o taahili; e hua madali denga mee hagadangidangi iai daula. E hua madali de Sheminith. Se Psalm nii David Tagi Maolunga, koe gi dee hagaseegina loo au i doo lili, gai gi dee haelea mai au i doo bole. 
Tagi Maolunga, abodonu mai gi de au, au gu deai ogu mahi. Tagi Maolunga, hagaieiangi ina ngau, au gu duasala mmao. 
Gu duasala mmao ogu lodo; Tagi Maolunga, dee hee maa taulooloa? 
Tagi Maolunga, ahe mai hagaola ina dogu mouli; hagaola ina mai au i hiidinga doo lodo aloha e dee helui donu. 
E deai donu se dangada e manadua goe i dua dono magau. Gai goai naa e duuhia goe i de mommee o de gau maakau? 
Au gu dalea mmao i de gonogono; de boo alodahi gai dogu moenga e ssui i ogu loimada, ogu loimada e hai ga ssui dogu mee dagodo. 
Luoogu mada gu hhua i dogu dangi; luoogu mada gu baageaa i hiidinga o ogu hagadaumee. 
Goodou hulo gee mai i ogu daha, go goodou e haia de baubau, go hiidinga Tagi Maolunga gu langona dogu dangi. 
Tagi Maolunga e hagallongo dagu dalodalo, gai Tagi Maolunga e basa mai gi dagu dalodalo. 
Ogu hagadaumee alodahi e odi naa i de dookaa ma de maatagu, gilaadeu e saavini naa ga hulo gee i delaadeu dookaa. 
