﻿Job.
40.
Gai Tagi Maolunga ne ssili ange hogi gi a Job, 
“E aha, e maua e tangada e hagabaubau ina de Ia Mmahi Mmao laa i de hagadaumee ange gi de ia? Koe ne hagabaubau de Maadua — basa ange gi ana muna!” 
Gai a Job ga hai ange gi Tagi Maolunga: 
“Tilo, au se dangada e dee bau ange gi mee nei — gai dee hee dagu hai e basa adu ai gi au muna? Au e pono dogu ngudu i dogu lima. 
Au gu basa i dahi hanonga, aagai au e dee ahe ange donu e basa adu; gu deai ange donu agu muna e tala.” 
Gai Tagi Maolunga ne basa ange gi a Job i lo te sio, ga hai ange: 
“Noodia age oo malo mage duu age ai be se daane, gai au ga ssili adu agu muna, gai koe ga basa mai. 
E aha, koe e hai gi dee sula dagu hagamodu heohi? Koe e hagamodu ogu muna gai ga hagaheohi goe? 
E aha, e dahi oo lima bei de lima o de Maadua, gai e maua e goe i de hai doo leo gi bei dono leo? 
Hagalaagii ina goe i ssauaa e dagi ai ma de maolunga, gai hakahu ina goe i de mahamaha ma de hagadubu. 
Haia gi humai doo lili ma doo bole, gai diiloo hagamaolalo ina tangada hagamaolunga; 
dagidiiloo haia gi maolalo tangada hagamaolunga, gai dagadagahia de gau baubau i mommee olaadeu e tuu ai. 
Danumia gilaadeu alodahi i lo te gelegele, haolia olaadeu mada i lo te daanunga. 
Gai au ga tala adu bolo oo mahi e maua i de hagaola goe. 
Galo ange diiloo de manu go de Behemoth; se manu niiagu ne hai bei goe, gai ia e gai denga helii bei de kaau. 
Tilo, dono angaanga e mmahi, gai denga mogomogo i dono dinae e mmahi! 
Dono sugi e daa saele bei singasinga o de manu somo go cedar, gai uaua i lodo luoono gauanga e hagadau hakage. 
Ono ivi e bei denga paibu bronze, ono aalanga e bei denga duudangaa iron. 
Go de manu nei tahi mee hagalele mouli a de Maadua ne hai, gai de ia ne haia ia e maua i de hebagi ange gi de ia i dana gadilaasa! 
Denga mounga e vange gi de ia ana gai, gai denga manu lodo henua alodahi e hagadaahao i kilaa. 
Ia e baani i lalo denga manu duiduia, ma de mmuni i magavaa o denga madila i mommee iai bela ma vai. 
Denga manu duiduia e haoli ia i lalo olaadeu malu, gai denga willow i gaogao de vai e duuli luoono baasi. 
Tilo, noo ssaalingaa vai e mmilo, gai ia e dee madagu donu; ia e baba ono lodo, e dee galemu donu de ssii age vai o Jordan gi dono ngudu. 
E aha, e maua e dahi i de poo ia i luoono mada, aabe go de dada ia i dahi sele ga sugi dono usu? 
