﻿Job.
36.
Gai Elihu ne duudagi ana muna, ga hai ange, 
“Golomagi ina oo lodo i de au, gai e hanu ange agu muna e tala e sui ai de Maadua. 
Au ne kave dogu iloo mee mai i de mommee mmao, ma de hagaago adu bolo de ia ne haia ngau e heohi. 
Ni muna abodonu, agu muna e dee ni muna hhadu; tangada e honu danuaa dono iloo mee e noho madali goe. 
Tilo, de Maadua e mmahi mmao, aagai e dee kino i dangada; ia e mmahi mmao, aama de donu. 
Ia e dee dugu ange tangada baubau gi mouli, aagai e dugu ange gilaadeu e vaivai haia gi maua olaadeu heohi. 
Ia e dee galo gee donu i gilaadeu e heohi; gai e hagannoho gilaadeu madali denga hodooligi i honga duulanga maolunga, ma de hagaamua gilaadeu ga hano ai. 
Gai noo dangada gu noonoodia i daula baalanga, ma de tuu ange gi denga hagaduasala, 
gai de Maadua e hagaago ange alaadeu hegau, ma olaadeu haisala, i delaadeu hagamaolunga. 
Ia e hhuge olaadeu dalinga gi hagalaangona agoago, ma de tala ange gilaadeu gi daahuli gee i olaadeu baubau. 
Noo gilaadeu e daudali ange ma de daumaha ange gi de ia, gai gilaadeu e duadonu i taulooloa olaadeu mouli, gai gilaadeu e malangilangi i taulooloa olaadeu ngadau. 
Aagai noo gilaadeu e dee hagallongo ange, gai gilaadeu e maakau naa i de gadilaasa, ma de maakau i teai olaadeu iloo mee. 
De gau baubau e daohi de lili i olaadeu lodo; gai gilaadeu e dee dangidangi i de bale, i de masavaa aana e noonooa ai gilaadeu. 
Gilaadeu e maakau i de masavaa olaadeu e dama daane ai, madali denga daane hai be ni manu i mommee daumaha o denga diinonga. 
Aagai de Maadua e hagaola gilaadeu e duasala mai i olaadeu hai ngadaa, ma de basa ange gi gilaadeu i delaadeu vaivai haia. 
De Maadua e usuusu adu goe gi hano gee mai i de hai ngadaa, gi hano gi de mommee lahalaha laumalie, e dee kabi, gai honga doo deebele e honu i gai moomuna. 
Aagai iainei koe gu hagauda de hagaduasala o de gau baubau; de hagaduasala ma de hagamodu heohi gu duu adu gi de goe. 
Dagidiiloo gi deai se dangada e hagasengalia goe i goloa lagolago, gai gi dee dugua ange de ngadi gaavange hagasenga gi gaavee oo lodo. 
E maua doo lava ma oo mahi alodahi i de buibui goe i de hai ngadaa? 
Aude daalia de dae mai de boo, go de masavaa o dangada e maakau ai. 
Kana ange gi dee dahuli ange goe gi de baubau, go de mee aau ne hilihili e dee go doo hagaduasala. 
Tilo, de Maadua e mmahi mmao; goai tangada agoago e bei ia? 
Goai ne daalaa ange dono haiava e hano ai, gai goai ne hai ange, ‘Koe gu hai dahi mee dee heohi’? 
Manadua de tuhi ana hegau, go mee a dangada e tuhi ai ia i taahili. 
Dangada alodahi gu gidee ana hegau, gilaadeu gu gidee mai mee nei i de mommee mmao. 
Tilo, de Maadua e maolunga mmao, gidaadeu e dee maua gi tonu ange gi ono dagodo; gidaadeu e dee iloo hogi taelodo o ono ngadau. 
Ia e dada age denga vai mai i henua i lalo; ga nonu ga hai ai madaua o de langi pala; 
denga hagausinga e llingi iho denga vai, ma de hai gi pala iho langi lagolago gi honga o dangada. 
Goai e maua gi donu ange gi de hai aana ne doha ai denga hagausinga, ma de hai aana e hai ai gi babaa ana hatuli i lo te langi? 
Tilo, ia e hai de maalama o ana uila gi duuli ina ia, ma de haoli tagelo o de moana. 
Deenei dana hai e dagi ai denga huaahenua, ma de gaavange gi gilaadeu gai lagolago. 
Ia e hhao i lo tono lima de uila, ma de tala ange be go hee oona e labalaba ai. 
De hatuli e hagailoo de humai o de madangi; gai denga manu dolodolo e iloo dono hanage ai. 
