﻿Job.
35.
Elihu ne basa ange hogi, ga hai ange, 
“Koe e maanadu bolo se mee heohi deenei? Koe e hagadaba, ‘Au e heohi donu i mada luu mada o de Maadua.’ 
Gai koe e ssili, ‘Ni aha aagu e mau i de mee nei? Gai ni aha e kii ange ai noo au e dee haisala?’ 
Au ga basa adu nei gi de goe, aama oo soa e nnoho naa madali goe. 
Galo age gi de langi mage diiloo denga giliiga, mee nei e maolunga ange i de goe. 
Noo koe e haisala, gai ni aha e baubau ange ai laa gi de Maadua? Noo gu lagolago oo haisala, gai ni aha ai aau gu hai ange laa gi de ia? 
Noo koe e heohi, gai se aha aau gu gaavange laa gi de ia; aabe se aha a de Maadua e kave mai i oo daha? 
Oo baubau e hagabaubau donu huu dahi dangada bei goe, gai doo heohi e hagaheohi donu huu dangada. 
Dangada e tangi i delaadeu vaivai haia; gilaadeu e dangidangi gi ola ai gilaadeu i ssauaa o de gau mmahi. 
Aagai e deai donu se dangada e hagadaba, ‘I hee ai de Maadua ne haia nei au, ma de hai gi maua e dangada i de daahili i de boo, 
gai go ia e agoagona mai gidaadeu gi kii ange i denga manu lodo henua, ma de hai gidaadeu gi heiangi ange i denga manu llele i lo te moana?’ 
Dangada e tangi gai de Maadua e dee basa ange, i hiidinga de llodo maolunga o de gau baubau. 
Ni muna abodonu, de Maadua e hagangadi mee donu alaadeu dangidangi, gai de Ia Mmahi Mmao laa e dee anga ange donu. 
Gai e kii ange dana dee hagallongo i dau hagadaba bolo koe e dee gidee ia, gai koe e tali ia gi hagamodu ina au muna hagabaubau! 
Ia e dee hagaduasala hogi i dono lili, gai e dee anga ange hogi gi de baubau laumalie. 
Deelaa ai, Job gu tala hanu ngadi muna, ia ne lagolago ana muna gai e deai sono iloo mee.” 
