﻿Job.
29.
Gai a Job ne duudagi de tala ana muna, ga hai ange, 
“Mee naa au gi ahe ange gi noho i denga malama gu hulo laa, go laangi a de Maadua e tilo danuaa mai ai au, 
gai dana laama e hagamaalama honga dogu biho, gai au e seesee i dono maalama i lo te gohu; 
ogu laangi goi mmahi ai, go de masavaa o dogu soa go de Maadua e buibui dogu hale malo; 
go de masavaa a de Ia Mmahi Mmao laa e noho ai madali au, gai agu dama e nnoho madali au; 
gai dogu haiava nogo seesee ai e honu i vai uu haduhadu, gai agu lolo olive e ssali mai i lo te baba. 
De masavaa oogu ne hano ai gi gaogao de haitoga o de aduhale, ga noho i dogu duulanga i lo te duu malaelae, 
gai denga dama daane ne ngaalue gee i dogu haiava i delaadeu gidee au, gai denga daane madumaatua ne hiihidi ga tuu gi lunga. 
Dagi o de henua gu dee pasa, ga pono olaadeu ngudu i olaadeu lima; 
de gau aamua gu dee mmuu, gilaadeu gu dee maua i de tala hanu muna. 
Be goai gu langona agu muna e tuhi ai au, gai gilaadeu ne gidee au e buni mai; 
go hiidinga au ne bale ange tangada hagaau aloha e dangi laa, ma de gauligi gu deai sono damana, aabe se dangada e balea ange ia. 
Gilaadeu gu hai ngadaa laa e hagamanuuia ngau, gai au ne hai ga malangilangi lodo o de hine gu magau dono bodu. 
Au e gahu au i de heohi, bei dagodo o de malo; gai de hagamodu heohi go dogu malo laa daha ma dogu goobai malo. 
Go au luu mada o tangada dee gide, gai go au luu vae o tangada balagelage. 
Au se damana niiolaadeu e duasala, gai au e ssala de heohi o tangada aagu e dee iloo. 
Au ne hebagi ange ga hagadee kii tangada baubau, gai ne hagaola ana dangada e vaivai hai laa. 
Gai au ne maanadu i ogu lodo, ‘Au e magau naa donu i dogu hale madali dogu huaabodu, gai ogu ngadau e mouli ai e bei naa de lagolago o denga gelegele. 
Au e bei de manu somo e hulo laa ono aga gi lodo vai, gai ono laa e hagamaluulu i ssuungia o de boo. 
Dogu mahamaha e dagodo naa donu huu i ogu daha, gai ogu mahi e dagodo naa donu huu bei de mee hholu hoou i lo togu lima.’ 
Dangada e tali e hagallongo agu hagasaele; gilaadeu e nnoho naa ga hagallongo agu muna. 
Dua de tala agu muna, gai gilaadeu tee ahe ange e pasa, go hiidinga gilaadeu gu malangilangi i agu muna ange gi gilaadeu. 
Gilaadeu ne tali e hagallongo agu muna, bei delaadeu tali gi pala de langi, gai gilaadeu ne kave agu muna bei de langi e pala iho laa i taamada o de ngadau. 
De masavaa ne gada ange ai dogu ngudu gi gilaadeu, gai gilaadeu tee hagadonusia donu, gai dogu malangilangi i gilaadeu e hagamaamaane olaadeu lodo. 
Go au ne hilihilia ange alaadeu mee e hai, go au delaadeu dagi. Au e bei dagodo o dahi hodooligi ange gi dono hagabuulinga hebagi, gai e bei dagodo o tangada e hagaaneane ina gilaadeu gu hinangalosaa. 
