﻿Job.
26.
Gai Job ne basa ange, ga hai ange, 
“Koe gu bale ange donu tangada e deai ono mahi! Gai koe gu hagaola tangada baageaa! 
Koe gu bale ange tangada e deai sono heiangi i hagasaele danuaa! Gai gu lagolago hanonga aau ne tala ai dagodo o de iloo mee laumalie! 
Goai ne balea adu goe i muna aau e tala naa? Gai niioai de hagasaalunga e daalaa naa muna naa i oo daha? 
Hagasaalunga o de gau maakau e kona de bolebole, go gilaadeu i lodo vai ma gilaadeu alodahi e nnoho i kilaa. 
De mommee o de gau maakau e mahuge i mada luu mada o de Maadua, gai Abaddon e dee haoli donu i mada luoono mada. 
Ia ne doha de langi i baasi i ngaiho i lo te moana i lunga, gai ia e daudau age henua i lalo i lo te ngadi moana. 
Ia ne hhao denga vai gi lodo hagausinga maadolu, gai denga hagausinga e dee maoha donu i taemaha o denga vai. 
Ia e haoli de maasina honu i dahi giliiga, ma de doha ana giliiga i ono elunga. 
Ia e maaga honga de vai, ma de vvae de maalama mai i de gohu. 
Denga duludulu o de langi e ngalungaalue i delaadeu maatagu i dono bole. 
Ia e hagabeabeau tai i ono mahi; ia e duuduu Rahab i dono iloo mee. 
Ia e manava gai gu laohie, gai dono lima e velo de labodo e tolo laa. 
Tilo, mee nei go taamada donu huu o ana hegau, e bei taadeu hai e langona ai laa dana damaa musumusu mai. Gai goai e donu ange gi denga hatuli aana e hai i dono mmahi?” 
