﻿Job.
8.
Gai Bildad taane Shuah ne basa ange, ga hai ange, 
“Dee hee maa taulooloa dau tala hanu muna bee naa? Au muna e tala e bei de ssau o de madangi mmahi. 
E aha, de Maadua se ia e hagahaisala ina de hagamodu heohi? E aha, de Ia Mmahi Mmao laa e hagahaisala laa de mee heohi? 
Noo au dama e haisala ange gi de ia, gai ia e dugu ange gilaadeu de hagaduasala o olaadeu haisala. 
Aagai noo koe e dalodalo ange gi de Maadua, ma de hagaduu ngae ga dangidangi ange gi de Ia Mmahi Mmao laa, 
noo koe e gilimalali ma de hai hegau i de muna abodonu, gai ia e hidi age naa, ga hagaahe adu gi de goe doo duulanga donu. 
Gai ga damaa mee naa donu doo daamada, gai koe e lagolago naa donu au mee i masavaa e humai. 
Siilia ange gi denga atangada gu hulo, ma de kana ange ga ssala mee a olaadeu maadua gu iloo, 
go hiidinga gidaadeu ne haanau donu huu anaahi, e deai donu adaadeu mee e iloo, gai odaadeu laangi i henua i lalo e moolau de llilo bei dagodo o de goohunga. 
E aha, gilaadeu e dee agoago adu naa goe ma de tala adu gi de goe? Gilaadeu e dee agoago adu naa goe i alaadeu mee gu tonu ange aagena? 
E aha, e maua de papyrus i de somo gi looloa i de mommee e deai bela iai? E maua e denga madila i de ssomo danuaa i de mommee e deai vai iai? 
De masavaa goi somo ai tigi tuu, gai e moolau ange de mmae i denga helii. 
Aanei dagodo o dangada alodahi e ngalo de Maadua; e deai donu se tali a de gau baubau. 
Dana mee e hagadonu laa e maoha ngaohie; dono mee e lango ange aagena e bei de hale o de neveneve. 
Ia e hagannagi ange gi dono hale, aagai gu baguu; ia e poo ange aagena, aagai e dee maua gi duu. 
Ia e bei de manu somo gu hagamaluulu gai e sula i de laa; ono uli e ssomo i honga de veelenga alodahi; 
ono aga e ssomo laa luu baasi dahi hagabuudungaa hadu, ma de ssala dahi duulanga moona i magavaa o denga hadu. 
Aagai noo gu aau gee i dono duulanga, gai de mommee laa e dee lodo ai ga hai ange, ‘Au tee gidee donu goe.’ 
Tilo, deenei donu huu de malangilangi aana e iloo, gai hanu manu gee e ssomo age naa i kilaa. 
Tilo, de Maadua e dee tili donu tangada e dee haisala, aabe e bale ange tangada e haia de baubau. 
Ia e ahe ange naa ga hai goe gi gadagada, gai koe e oo naa i doo malangilangi. 
Gai dangada e kino i de goe e hai naa ga dookaa, gai de hale o tangada baubau e dee gidee naa.” 
