﻿Nehemiah.
10.
Aanei dangada ne hagasauaa ina ma de ssaini olaadeu ingoo: de goobena go Nehemiah, tama daane a Hacaliah, ma Zedekiah, 
ma Seraiah, ma Azariah, ma Jeremiah, 
ma Pashhur, ma Amariah, ma Malkijah, 
ma Hattush, ma Shebaniah, ma Malluk, 
ma Harim, ma Meremoth, ma Obadiah, 
ma Daniel, ma Ginnethon, ma Baruch, 
ma Meshullam, ma Abijah, ma Mijamin, 
ma Maaziah, ma Bilgai, aama Shemaiah. Aanei de gau haimeedabu. 
Hagadiilinga o Levi: go Jeshua, tama daane a Azaniah, ma Binnui tama daane a Henadad, ma Kadmiel, 
ma olaadeu dangada ange laa: go Shebaniah, ma Hodiah, ma Kelita, ma Pelaiah, ma Hanan, 
ma Mica, ma Rehob, ma Hashabiah, 
ma Zaccur, ma Sherebiah, ma Shebaniah, 
ma Hodiah, ma Bani, aama Beninu. 
Denga dagi o dangada: go Parosh, ma Pahath-Moab, ma Elam, ma Zattu, ma Bani, 
ma Bunni, ma Azgad, ma Bebai, 
ma Adonijah, ma Bigvai, ma Adin, 
ma Ater, ma Hezekiah, ma Azzur, 
ma Hodiah, ma Hashum, ma Bezai, 
ma Hariph, ma Anathoth, ma Nebai, 
ma Magpiash, ma Meshullam, ma Hezir, 
ma Meshezabel, ma Zadok, ma Jaddua, 
ma Pelatiah, ma Hanan, ma Anaiah, 
ma Hoshea, ma Hananiah, ma Hasshub, 
ma Hallohesh, ma Pilha, ma Shobek, 
ma Rehum, ma Hashabnah, ma Maaseiah, 
ma Ahiah, ma Hanan, ma Anan, 
ma Malluk, ma Harim, aama Baanah. 
Gai dangada ange laa — go de gau haimeedabu, ma dangada de aamuli o Levi, ma de gau hagaloosi haitoga, ma de gau daahili, ma de gau hai hegau i de temple, aama dangada alodahi gu vvae gee gilaadeu mai i dangada o de henua e daudali ange i hainga a de Maadua, madali olaadeu bodu, ma alaadeu dama daane, ma damaa hine, aama dangada alodahi e iloo ma de tonu ange — 
gilaadeu nei alodahi ne hagabuni madali olaadeu dangada aamua ga hai dahi hagamalaia ma de hagatoo donu bolo gilaadeu ga daudali i hainga a de Maadua gu gaavange laa gi gilaadeu mai i daho Moses, tangada hai hegau o de Maadua, gai gilaadeu gi daohia ga hai hegau i hainga alodahi a Tagi Maolunga taadeu Ia Aamua, ma ana hagamodu, aama ana mee gu hagasauaa: 
“Gimaadeu e dee gaavange amaadeu damaa hine gi dangada o de henua nei, aabe kave alaadeu damaa hine gi hai bodu ange gi amaadeu dama daane. 
Gai noo dangada i de henua e gaamai olaadeu goloa aabe denga grain e hagao i de laangi o Sabbath aabe go dahi laangi dabu, gai gimaadeu e dee hagao alaadeu mee. Gimaadeu e dee hagihagi hogi huamanu i honga omaadeu gelegele i denga hidu ngadau alodahi, ma de degi ange gi muli alodahi. 
Gai gimaadeu ne hagamodu i omaadeu daha e gaavange dahi diba i diba e dolu o dahi shekel i ngadau alodahi e hai ai hegau o de hale o demaadeu Maadua: 
ange gi denga pelaoaa o ssigidaumaha, ma sigidaumaha o hua grain, ma denga sigidaumaha dudu i laangi alodahi, ma denga Sabbath, ma denga daonga i de duu de maasina i dai, ma denga daonga gu hagailonga, ma denga goloa dabu, ma sigidaumaha o haisala o de gau Israel, aama hegau alodahi o de hale o demaadeu Maadua. 
Gai gimaadeu de gau haimeedabu, ma de aamuli o Levi, aama dangada ne hai tada e hili ai denga huaabodu e gaamai lahhie gi de hale o demaadeu Maadua, i de masavaa gu hagailonga i ngadau alodahi, e dudu i honga de mommee o ssigidaumaha a Tagi Maolunga taadeu Maadua, bei de hai gu sisi ai i de hainga. 
Gimaadeu ne hagamodu hogi bolo gimaadeu e gaamai denga hua i taamada i honga omaadeu gelegele, aama hua o denga manu alodahi gi de hale o Tagi Maolunga i ngadau alodahi. 
Gimaadeu e gaamai hogi gi de hale o demaadeu Maadua, amaadeu dama daane maatua ma tama e haanau i taamada i daho amaadeu manu haangai, ma amaadeu kaau ma amaadeu ssiibi, e gaavange gi de gau haimeedabu e haia hegau i kilaa, bei de hai gu sisi ai i de hainga. 
Gai gimaadeu e gaamai hogi gi lodo mommee doange o de hale o demaadeu Maadua, ga gaavange gi de gau haimeedabu, tahi laabunga o amaadeu pelaoaa lligi ma amaadeu grain e sigidaumaha, aama hua i taamada o amaadeu manu alodahi, ma amaadeu uvaini hoou, aama lolo. Gai gimaadeu e daohi age hogi dahi diba i diba e madaangahulu o hua i honga omaadeu gelegele gi de aamuli o Levi, i hiidinga go gilaadeu e hagabudulia dahi diba i diba e madaangahulu i aduhale alodahi omaadeu e hai hegau ai. 
Gai dahi dangada haimeedabu, mai i de aamuli o Aaron, gi noho madali de aamuli o Levi i de masavaa alaadeu e kave ai dahi diba i diba e madaangahulu, gai de aamuli o Levi gi vaaea dahi diba i diba e madaangahulu o dahi diba i diba e madaangahulu alaadeu ne kave laa, gi gaamai gi lodo mommee doange i de hale o demaadeu Maadua. 
Gai de gau Israel ma de aamuli o Levi gi gaamai denga grain alaadeu e daohia age laa, ma uvaini hoou, ma lolo gi denga mommee e doange ai laa goloa o de mommee dabu, go de mommee o de gau haimeedabu e hai hegau ai laa, ma de gau hagaloosi haitoga, aama de gau daahili e nnoho ai laa hogi. Gai gimaadeu e dee tili naa donu de hale o demaadeu Maadua.” 
