﻿Joshua.
12.
Aanei denga hodooligi o de henua a de gau Israel ne hagadee kii, ga kave olaadeu henua, i baasi i dua o Jordan, go de mommee e sobo age ai de laa, mai i de geelonga go Arnon ga hano ai gi de mounga go Hermon, aama baasi dua alodahi o Arabah: 
Go Sihon de hodooligi o de gau Amor, e hodooligi laa i Heshbon. Gai dono nohoanga hodooligi e daamada mai i Aroer i de hiihii o de geelonga go Arnon — ma mai i lo te ungaalodo o de geelonga laa — ga hano ai gi ssaalingaa vai go Jabbok, go de ngaadonga o de henua o de gau Ammon, aama dahi luu baasi o Gilead. 
Ia ne hodooligi hogi i denga mommee i baasi dua o Arabah, mai i de Vai go Kinnereth i baasi dua, i de haiava e hano laa gi Beth Jeshimoth, gai e hano ga dae gi Tai o Arabah, (e bei go Tai Soolo), ma de hano ga dae gi ngaage, i lalo denga madadaagodo o de mounga go Pisgah. 
Gilaadeu ne kave hogi mommee o Og, de hodooligi o Bashan, ia go dahi dangada e doe i de gau Repha, gai e noho i Ashtaroth ma Edrei. 
Gai ia e hodooligi i de mounga go Hermon, ma Salecah, ma Bashan alodahi, ga dae ai gi de ngaadonga o de henua o de gau Geshur ma de gau Maacah, aama dahi baasi o Gilead ga dae ai gi de ngaadonga o de henua o Sihon, de hodooligi o Heshbon. 
Gai Moses, tangada hai hegau o Tagi Maolunga, ma de gau Israel ne daa gilaadeu ga maakau. Gai Moses, tangada hai hegau o Tagi Maolunga, ne gaavange delaadeu henua gi de aamuli o Reuben, ma de aamuli o Gad, aama dahi luu baasi de aamuli o Manasseh. 
Gai aanei denga hodooligi o de henua a Joshua ma de gau Israel ne hagadee kii i baasi i dai o Jordan; mai i Baal Gad e duu laa i lo te geelonga go Lebanon, ga dae ai gi de mounga go Halak e duu age laa i Seir. Gai Joshua ne gaavange olaadeu henua gi denga aamuli o Israel gi vaevae ai — 
go de mommee iai mounga, ma mommee iai duuduu paa i lalo, ma de Arabah, ma madadaagodo o denga mounga, ma de vao, aama de Negev — de henua o de gau Heth, ma de gau Amor, ma de gau Canaan, ma de gau Perez, ma de gau Hiv aama de gau Jebus: 
go de hodooligi o Jericho, ma de hodooligi o Ai, i gaogao Bethel, 
ma de hodooligi o Jerusalem, ma de hodooligi o Hebron, 
ma de hodooligi o Jarmuth, ma de hodooligi o Lachish, 
ma de hodooligi o Eglon, ma de hodooligi o Gezer, 
ma de hodooligi o Debir, ma de hodooligi o Geder, 
ma de hodooligi o Hormah, ma de hodooligi o Arad, 
ma de hodooligi o Libnah, ma de hodooligi o Adullam, 
ma de hodooligi o Makkedah, ma de hodooligi o Bethel, 
ma de hodooligi o Tappuah, ma de hodooligi o Hepher, 
ma de hodooligi o Aphek, ma de hodooligi o Lasharon, 
ma de hodooligi o Madon, ma de hodooligi o Hazor, 
ma de hodooligi o Shimron Meron, ma de hodooligi o Acshaph, 
ma de hodooligi o Taanak, ma de hodooligi o Megiddo, 
ma de hodooligi o Kedesh, ma de hodooligi o Jokneam i Carmel, 
ma de hodooligi o Dor i tagudai, ma de hodooligi o Goiim i Galilee, 
aama de hodooligi o Tirzah; e dinodolu ma dogodahi hodooligi nei. 
