﻿Numbers.
28.
Gai Tagi Maolunga ga hai ange gi Moses, 
“Daalaa ange gi de gau Israel, hai ange, ‘Goodou diiloo sigidaumaha ina mai gi de au denga gai e hai laa i de ahi, i de masavaa gu hagailonga, e hai ai ssigidaumaha nnamu kala mai gi de au.’ 
Gai koe daalaa ange gi gilaadeu, hai ange, ‘Aanei mee oodou e hai ai ssigidaumaha dudu ange gi Tagi Maolunga i laangi alodahi: e lua ssiibi daane gu dagidahi olaau ngadau, gai e deai mee baubau i olaau angaanga. 
Dahi ssiibi e hai ai ssigidaumaha i taiao, gai dahi e hai ai ssigidaumaha i de ahiahi, 
madali e dahi diba i diba e madaangahulu o dahi ephah pelaoaa lligi gu hilo, ma e dahi diba i diba e haa o dahi hin lolo ne tugi laa. 
Ssigidaumaha dudu nei se mee hai i laangi alodahi, gai se mee ne daamada de hai i de mounga go Sinai, se sigidaumaha nnamu kala e hai i de ahi ange gi Tagi Maolunga. 
Gai ssigidaumaha o mee unu e gaamai madali mee nei, se dahi diba i diba e haa o dahi hin uvaini; gai ssigidaumaha o mee vii nei e llingi i mada luu mada o Tagi Maolunga, i de mommee dabu. 
Gai ssiibi ange laa e hai ai ssigidaumaha i de ahiahi, madali ssigidaumaha o pelaoaa lligi, ma ssigidaumaha uvaini, bei ssigidaumaha i taiao. Gai se sigidaumaha e hai i de ahi, gai se sigidaumaha nnamu kala ange gi Tagi Maolunga. 
“ ‘De laangi naa huu o Sabbath, gai goodou e hai ssigidaumaha i e lua ssiibi daane gu dagidahi laa olaau ngadau, gai e deai donu mee baubau i olaau angaanga, madali dono sigidaumaha o mee unu, aama e lua diba i diba e madaangahulu o dahi ephah pelaoaa lligi o denga grain, gai e hilo ma lolo. 
Deenei ssigidaumaha dudu e hai i denga Sabbath alodahi, madali ssigidaumaha dudu ma ssigidaumaha o mee unu e hai i de laa tubua. 
“ ‘Gai tahi laangi o malama alodahi, gai goodou e hai dahi ssigidaumaha dudu ange gi Tagi Maolunga: i e lua kaau, ma e dahi ssiibi daane, aama e hidu ssiibi daane gu dagidahi olaadeu ngadau, gai e deai mee baubau i olaadeu angaanga. 
Gai gaamai madali dahi kaau laa, e dolu diba i diba e madaangahulu o dahi ephah o pelaoaa lligi, o denga grain gu hilo laa ma lolo; gai gaamai madali ssiibi daane laa, e lua diba i diba e madaangahulu o dahi ephah pelaoaa lligi o denga grain gu hilo laa ma lolo; 
gai gaamai madali dahi ssiibi gauligi laa, e dahi diba i diba e madaangahulu o dahi ephah pelaoaa lligi, o denga grain gu hilo laa ma lolo. De mee nei e hai ai sigidaumaha dudu nnamu kala, ange gi Tagi Maolunga i de ahi. 
Gai e gaamai madali dahi kaau laa, dahi bido hin uvaini; gai gaamai madali ssiibi daane laa dahi diba i diba e dolu o dahi hin uvaini, gai gaamai madali dahi ssiibi gauligi laa, e dahi diba i diba e haa o dahi hin uvaini, e hai ai ssigidaumaha o mee unu. Deenei ssigidaumaha dudu e hai i malama alodahi o de ngadau, i de masavaa e duu ai de maasina i dai. 
Gai gaamai madali ssigidaumaha dudu ma ssigidaumaha o mee unu dahi guudi daane, e hai ai ssigidaumaha o haisala ange gi Tagi Maolunga. 
“ ‘Gai de madaangahulu ma haa laangi o tahi malama, go de laangi o Taonga Hagasili a Tagi Maolunga. 
Gai de madaangahulu ma lima laangi o de malama mau e hai hogi dahi daonga; e hidu laangi oodou e gai ai pelaoaa e deai mee hagahua iai. 
Gai tahi laangi goodou hagabuni ga daumaha, gai e dee donu oodou hegau e hai i de laangi nei. 
Goodou e hai dahi sigidaumaha dudu ange gi Tagi Maolunga, i e lua kaau gauligi, ma e dahi ssiibi daane, ma e hidu ssiibi gauligi gu dagidahi olaadeu ngadau, gai e deai mee e baubau i olaadeu angaanga. 
Gai gaamai madali dahi kaau laa, e dolu diba i diba e madaangahulu o dahi ephah o pelaoaa lligi o denga grain gu hilo ma lolo; gai madali dahi ssiibi daane laa, se lua diba i diba e madaangahulu; 
gai e dagidahi diba i diba e madaangahulu madali denga ssiibi daane gauligi e hidu laa. 
Gai e dahi hogi guudi daane e hai ai ssigidaumaha o haisala, e tala ai oodou haisala. 
Gai haia denga sigidaumaha nei madali ssigidaumaha dudu i taiao, e hai laa i de laa tubua. 
Deenei doodou hai e hai ai ssigidaumaha o denga gai, e hai i de ahi, i denga laangi e hidu e hai ai laa taonga, se mee nnamu kala ange gi Tagi Maolunga; ssigidaumaha nei e hai madali ssigidaumaha dudu ma ono mee unu e hai laa i de laa tubua. 
Gai de hidu laangi naa huu, gai goodou hagabuni ga daumaha; goodou e dee hai dahi hegau daudahi. 
“ ‘Gai de laangi oodou e hagihagi ai denga huamanu i taamada, i de masavaa oodou e hai ai ssigidaumaha o denga grain hoou ange gi Tagi Maolunga, i Taonga o denga Uvigi, gai goodou e hagabuni ga daumaha; goodou e dee hai ai dahi hegau daudahi. 
Gai goodou e hai ssigidaumaha dudu nnamu kala, ange gi Tagi Maolunga, i e lua kaau daane, ma e dahi ssiibi daane, aama e hidu ssiibi daane gauligi gu dagidahi laa olaadeu ngadau. 
Gai gaamai hogi madali dahi kaau daane nei, e dolu diba i diba e madaangahulu o dahi ephah o pelaoaa lligi o denga grain gu hilo ma lolo; gai madali ssiibi daane laa se lua diba i diba e madaangahulu; 
gai e dahi diba i diba e madaangahulu madali dahi ssiibi daane gauligi laa. 
E dahi hogi guudi daane e hai ai ssigidaumaha, e tala ai oodou haisala. 
Gai goodou haia sigidaumaha nei madali ssigidaumaha o mee unu, ma ssigidaumaha dudu ma ssigidaumaha o grain, e hai laa i de laa tubua. Gai diiloo gi deai mee baubau i angaanga o denga manu. 
