﻿1 Tesalonikafɔ.
3.
Mʋ́ sʋ brɛ́á anɩmɛ́bɩ́ alɩá mlɩ tsiátɔ́ igyi, ɩdɛ anɩ háan a, anɩlɔ́bwɛ agywɩɩn anɩaa, anɩ mʋ́ abétsiá Atene wúlutɔ, 
awa anɩ píó Timoteo, ogyi anɩ Bulu agyʋ́máyɔbá Kristo asʋn wankláán ámʋ ɔkandatɔ sɩsɩ mlɩ, ɔbɔwa mlɩ ɔwʋnlɩ́n. Ɔtɔɩ kpla mlɩ amlɩlɩɩ kínkíínkín hógyitɔ, 
mɛ́nɩ mlɩtɔ ɔkʋkʋ méeyinkí ɔma asʋn wunhɛ anfɩ sʋ. Mlɩ onutó mlɩyin ánɩ́ igyi tɔ́á ɩda yaɩ́ há anɩ Akristofɔ dodo. 
Tsúfɛ́ brɛ́á anɩbʋ mlɩ wá á, anɩlɛ́bláa mlɩ ánɩ́ bɛ́dɩnká mlɩsʋ. Lɛ́lɛ bɛdɩnká mlɩsʋ fɛ́ alɩá mlɩyin. 
Ɩ́nɩ sʋ brɛ́á netsíá mmetsíá á, nɔwa Timoteo mlɩ wá mbɛ́ɛ, ɔbɛ́kɩ alɩá mlɩdɛ́ hógyi amʋtɔ. Tsúfɛ́ ɩbɛ́talɩ́ ba ánɩ́ Ɔbʋnsám lasɔ mlɩ kɩ, há anɩ gyumagyihɛ labwɛ́ kpaalɩ. 
Timoteo layínkí pʋ́ asʋn wankláán tsúa mlɩ wá ba anɩ séi, tsú mlɩ hógyi pʋ́ mlɩ abadwɛ ɩwɩ. Alabláa anɩ ɔbɛ́ɛ, mlɩ ɛ́ mlɩdɛ́ anɩsʋ kaɩ́n dʋbɩ. Mlɩdékléá mlówun anɩ, fɛ́ alɩ ámʋ́ʋ́ anɩ ɛ́ anɩdékléá abówun mlɩ ámʋ. 
Mʋ́ sʋ apíó, mlɩ hógyi lawá anɩ atɛtɔ-ɔnlɩn, anɩ ipian pʋ́ anɩ asʋn wunhɛ fɛ́ɛ́tɔ́; 
tsúfɛ́ mlɩlɩ́ɩ́ anɩ Wíe hógyitɔ kínkíínkín. Mʋ́ sʋ anɩ klʋn ládɩ́ anɩ asɩ. 
Ɩpán mɔmʋ abɔ́kʋkʋ da Bulu mlɩ sʋ, ansɩ́á ɩdɛ anɩ gyí mʋ ansɩ́tɔ́ sʋ? 
Anɩtɛhɩ́ɛ́ bɔ́ mpáɩ kókóli Bulu ɔpa mʋ́a onyé anɩaa, ɔhá ayinki bowun mlɩ, mɛ́nɩ abósuná mlɩ tɔ́á ɩbɛ́ha mlɩ hógyi bɔ́fʋn. 
Anɩ Sɩ́ Bulu onutó mʋa anɩ Wíe Yesu bʋfínki ɔkpa ha anɩ aba mlɩ wá. 
Anɩ Wíe ɔhá mlɩ apíó aba pʋ́ ahá fɛ́ɛ́ dwɛ ɔnɔ́ ɩwa ɔnlɩn, fɛ́ alɩ ámʋ́ʋ́ anɩtɔdwɛ́ mlɩ ámʋ. 
Ɔwá mlɩ ɔwʋnlɩ́n, mɛ́nɩ anɩ Sɩ́ Bulu omóowun ɔlala mlɩ ɩwɩ, ifin kʋkʋ ɛ́ méetsiá mlɩ ɩwɩ mʋ ansɩ́tɔ́, anɩ Wíe Yesu mʋa mʋ ahá fɛ́ɛ́ ɔbákɛ amʋ. 
