﻿1 Tɛ̀sàlɔ̀nɨkà.
3.
Ádzǐ mǎ mɨ́ ɨnga ɔ̀dɔ dhu nɨ́ngyɛ̌ mǎ rɔ̀, mǎ mála dhu mǎ ràkǎ mǒkò vǐka dɔ̌ rɔ̀ Àtɛnɛ̀ tɔ́ kɨgɔ̀ ɔ̀. 
Nɨ́, mǎ mádʉ̀ adɔ̀kà Tìmɔ̀tɛwʉ̀ nóvì ràrà fʉ̌rábvʉ̀. Àbadhi nɨ́ ndɨ Kàgàwà bhà ɨnɔ, yà atdíkpá mǎ márɨ́ Krɨ́stɔ̀ dɔ̌ rɔ́tɛ Ídzì Màkʉ̌rʉ̀ nʉ́nɔ mànà ìndrǔ tɔ̀ alɛ. Nɨ́ mǎ móvì ka fʉ̌rábvʉ̀, ndɨ́nɨ̌ afíkʉ nabhʉ̀ tɨ́ ròtsì ɔbɨ ndàdʉ̀ nyɨ̌dɨ̀ fʉ̀kʉ́ a’uta ɔ̌, 
ndɨrɔ̀, ɨ̀nzɨ̌ yà kòmbí nyɨ̌ nyábàna àpbɛ̀ adʉ̀ tɨ́ atdí alɛ mà nábhʉ rʉ̀bhà pbɨ̀ndà a’uta. Obhó tɨ́, nyɨ̌ nyʉ̀nɨ wà dhu, àlɛ̌ ràrɨ̌ ndɨ àpbɛ̀-tɨdɔ̀ nábà àbà. 
Ndɨrɔ̀, fʉ̌rábvʉ̀ mǎ mɨ́’ɨ̀ ɔ̀ná kàsʉmɨ̀ ɔ̌, mǎ mɔ́vɔ̀ wà dhu fʉ̌kʉ̀ mǎtɨ: àlɛ̌ ràrɨ̌ àpbɛ̀ nábà. Nɨ́, nyɨ̌ nyʉ̀nɨ wà dhu ɨ dhu ràrɨ̌ kɔ̌kɔ̀ rɨ́ ’ɔ̀nzɨ. 
Wɔ̀ dhu-okú dɔ̀ rɔ̀ nɨ́ ndɨ, ɨma nyʉ́ mà átɔ̀ ma mítdègu mɨngyɛ̌ ɨnga t’ɔ́dɔta nɨ̌, nɨ́ ma móvì Tìmɔ̀tɛwʉ̀ ràrà fʉ̌rábvʉ̀. Ma móvì ka ndɨ́nɨ̌ adʉ̀ tɨ́ ìngo nyɨ̌ nyáróko tɨ́ fʉ̀kʉ́ a’uta ɔ̌ dhu tɔ́ màkʉ̌rʉ̀ nà idù. Obhó tɨ́, ma mɔ́nzɨ̀ ɔdɔ̀na dhu nɨ́, akyɛ ʉtrátába Sìtanɨ̀ rǎdʉ̀ àrà nyʉ̌tra, ɔbɨ̀ka ràdʉ̀ àwǐ kɔkɔ́rɔ̀ dhu. 
Pbɛ́tʉ̀, kòmbí Tìmɔ̀tɛwʉ̀ nɨ́rà wà àhʉ fʉ̌rábvʉ̀ rɔ̀. Nɨ́, kàwɛ wà ídzì dhu nyʉ́ fʉ̀kʉ́ a’uta mà, fʉ̀kʉ́ àzè mànà dɔ̌. Kàtɨ, atdídɔ̌ nyɨ̌ rarɨ́ mɨ̌rɛ̀ bìlǐnganà, ndɨrɔ̀ atdyúkʉ nyʉ́ rɨ́’ɨ̀ nyǎla mǎ tdɨ́tdɔ̌, àdhàdhɨ̀ mǎ mòzè mǎ ràla nyɨ̌ átɔ̀ tdɨ́tdɔ̌ dhu bhěyi tɨ́. 
Nɨ́ ndɨ dhu bhěyi tɨ́ adɔ́dǔ, yà mǎ mɨ́’ɨ̀ ɔ̀ná àpbɛ̀ mà, avuta mànà nzínzì ɔ̌, fʉ̀kʉ́ a’uta ɔ̌ nyɨ̌ nyíkò tɨ́ dhu níbhò ndɨ ɔbɨ afíka tɔ̀. 
Kòmbí, mǎ mɨ́ mǐnè mběyi nyʉ́, nyɨ̌ nyíkò pɔ́tsɔ́ Ádrʉ̀ngbǎlɛ Yěsù ɔ̀ nɨ́dhunɨ̌. 
Ɨ́ngbà ɔ̀tsɔ̀-tɨdɔ̀ ndɨ mǎ mádʉ̀ àdunà Kàgàwà tɔ̀ okúkʉ dɔ̀ rɔ̀, yà nyɨ̌ nyʉ́ nyɨ̌ nyàbhʉ ɨdhɛ̀ka rɨ̀ka ndɨ̀ tɨ́ Kàgàwà-ɔ̀nzɨ̌ okúkʉ dɔ̀ rɔ̀ dhu dɔ̌? 
Kúbhingánǎ ndɨrɔ̀ adyíbhengá màtɨ́, mǎ márɨ́ mɨ̌tsɔ̀ atdyúka nyʉ́ nà Kàgàwà rɔ̌, ndɨ́nɨ̌ mǎ nabhʉ̀ tɨ́ mǎla ngbɔ̌kʉ tdɨ́tdɔ̌, mǎdʉ̀ fʉ̀kʉ́ a’uta dɔ̌ ɔ̀dɨ̀ dhu níse fʉ̌kʉ̀. 
Kàgàwà àlɛ̌ t’Ábanà nyʉ́ ndɨ̀tɨ́rɔ̀, àlɛ̌ tɔ́ Ádrʉ̀ngbǎlɛ Yěsù mànà, nákǎ ɨ̀ ràngbɛ otu fǎkà ndɨ́nɨ̌ mǎ mowu tɨ́ ùvò fʉ̌rábvʉ̀. 
Ádrʉ̀ngbǎlɛ Yěsù àkǎ ndɨ̀trɔ̌ nyɨ̌ nyózè nyɨ̌ nɨ̌ nzínzìkʉ ɔ̌ àzè, ndàdʉ̀ kɔ́rɔ́ ngʉ̌kpà alɛ nyɨ̌ nyózè nɨ̌ àzè nɨ́trɔ átɔ̀, àdhàdhɨ̀ mǎ mózè nyɨ̌ dhu bhěyi. 
Kàkǎ ndàbhʉ afíkʉ ròtsì ɔbɨ, ndɨ́nɨ̌ adʉ̀ya tɨ́ ɨ̀’ɨ̀ ɨ̀lɨ̌lǎ rɔ́, ndɨrɔ̀ ɨ̀mbǎ afátá na àlɛ̌ t’Ábanà Kàgàwà-ɔ̀nzɨ̌, àlɛ̌ tɔ́ Ádrʉ̀ngbǎlɛ Yěsù rǐngo, ɨ̀ rìwǔ atdíkpá rɔ̀ná alɛ mànà nɨ́nganɨ́. 
