﻿हिब्रू.
7.
थ्‍व मल्‍कीसेदेक शालेमयाम्‍ह जुजु, अले दकलय् तःधंम्‍ह परमेश्‍वरया पुजाहारी खः। लडाइँलय् जुजुपिन्‍त त्‍याकाः लिहां वयाच्‍वंम्‍ह अब्राहामयात नाप लानाः मल्‍कीसेदेकं आशिष बिल। 
अब्राहामं जुजुपिन्‍त त्‍याकाः हःगु सम्‍पत्तियागु झिब्‍वय् छब्‍व मल्‍कीसेदेकयात बिल। मल्‍कीसेदेकया नांया अर्थ “धार्मिकताया जुजु” खः, अले शालेमयाम्‍ह जुजु जूगुलिं वयागु नांयागु अर्थ “शान्‍तिया जुजु” धकाः नं थुइकू। 
वया मांबौ व तापाःबाज्‍यापिनिगु खँ गनं हे च्‍वयातःगु मदु। अले व सीगु व बूगु खँ नं गनं च्‍वयातःगु मदु। व परमेश्‍वरया काय् थें सदांयात पुजाहारी जुयाच्‍वनी। 
मल्‍कीसेदेक गुलि तःधंम्‍ह खः धकाः छिमिसं हे थुइकेफु। झी तापाःबाज्‍या अब्राहामंनापं वयात थःम्‍हं लडाइँलय् त्‍याकाः हःगु सम्‍पत्तियागु झिब्‍वय् छब्‍व बिल। 
लेवीया पुजाहारी जुयाच्‍वंपिं सन्‍तानं व्‍यवस्‍थाय् च्‍वया तः थें थः हे इस्राएली दाजुकिजापिन्‍के इमिसं कमय् याःगु झिब्‍वय् छब्‍व कयाच्‍वन। लेवीया सन्‍तान व इस्राएलीत फुक्‍कं अब्राहामया हे सन्‍तान खः। 
मल्‍कीसेदेकं लेवीया सन्‍तान मखुसां अब्राहामयाके झिब्‍वय् छब्‍व सम्‍पत्ति काल। अले हानं परमेश्‍वरं बाचा चिनादीम्‍हय्‌सित हे आशिष बिल। 
तःधंम्‍हय्‌सिनं चिधंम्‍हय्‌सित आशिष बी धकाः ला सि हे स्‍यू। 
छखे सीमानिपिं पुजाहारीतय्‌सं झिब्‍वय् छब्‍व काल, मेखे गुबलें मसीम्‍ह धयातःम्‍ह मल्‍कीसेदेकं झिब्‍वय् छब्‍व काल। 
थथे नं धायेफु – “झिब्‍वय् छब्‍व काइम्‍ह लेवीं नं अब्राहामपाखें मल्‍कीसेदेकयात झिब्‍वय् छब्‍व बिल।” 
छाय्‌धाःसा मल्‍कीसेदेकं अब्राहामयात नापलाःबलय् लेवी थः तापाःबाज्‍या अब्राहामयागु म्‍हय् हे दु। 
लेवी पुजाहारीतय्‌गु ज्‍यां हे झीपिं बचय् जुइगु खःसा मेम्‍ह पुजाहारी छाय् माल? थ्‍व मेम्‍ह पुजाहारी हारून थें मखु, बरु मल्‍कीसेदेक थें खः। 
मेम्‍ह पुजाहारी हिलीबलय् व्‍यवस्‍था नं हिलेमाः। 
थ्‍व धयाच्‍वनागु मेगु हे कुलयाम्‍हय्‌सिया बारे खः। वय्‌कःया कुलयापिं सुनानं पुजाहारीया ज्‍या याःगु मदु। 
येशू ख्रीष्‍ट यहूदा कुलय् बूम्‍ह खः धकाः ला फुक्‍कसिनं स्‍यू। मोशां पुजाहारीयागु खँ ल्‍हाःबलय् यहूदा कुलयागु नां मकाः। 
थ्‍व खँ आः झन बांलाक सी दइ – मल्‍कीसेदेक थें ज्‍याःम्‍ह मेम्‍ह पुजाहारी वये धुंकल। 
वय्‌कः व्‍यवस्‍थाकथं पुजाहारी जुयादीगु मखु, बरु सदां दयाच्‍वनीगु जीवनयागु शक्तिं जुयादीगु खः। 
धर्मशास्‍त्रय् हे थथे च्‍वयातःगु दु – “मल्‍कीसेदेक थें छ नं न्‍ह्याबलेंया लागिं पुजाहारी खः।” 
न्‍हापायागु व्‍यवस्‍था ज्‍यालगय् मजूगु जूगुलिं लिकया छ्वये धुंकल, 
छाय्‌धाःसा व्‍यवस्‍थां झीत छुं हे याये मफुत। आः धाःसा झीत वया सिबय् भिंगु आशा बियादीगु दु। गुकिं झीत परमेश्‍वरया न्‍ह्यःने थ्‍यंकी। 
परमेश्‍वरं मेपिन्‍त पाफयाः पुजाहारी यानादीगु मखु, तर वय्‌कःयात पाफयाः पुजाहारी यानादीगु खः। 
येशूयात वय्‌कलं पाफयादीगु खँ थुकथं च्‍वयातःगु दु – “परमेश्‍वरं थःगु मन हिले मखु धयाः थथे पाफयादिल – ‘छ सदांयात पुजाहारी जुइ।’” 
थथे पाफयादीगुलिं येशू छगू भिंगु बाचायागु जमानी जुयादिल। 
मेपिं पुजाहारी सिनावनीपिं जूगुलिं इमिसं सदां ज्‍या यानाच्‍वने मखन। अले इमिगु ल्‍याः नं यक्‍व दत। 
येशू धाःसा सदां म्‍वाना च्‍वनीम्‍ह जूगुलिं वय्‌कःया पुजाहारीया ज्‍या न्‍ह्याबलें दयाच्‍वनी। 
अय्‌जूगुलिं हे नं वय्‌कःयात विश्‍वास यानाः परमेश्‍वरया न्‍ह्यःने वइपिन्‍त वय्‌कलं आः हे सदांया निंतिं बचय् यानादी फु, छाय्‌धाःसा इमिगु निंतिं वय्‌कलं परमेश्‍वरयात न्‍ह्याबलें बिन्‍ति यानाच्‍वनादीगु दु। 
झीत मालाच्‍वंम्‍ह दकलय् तःधंम्‍ह पुजाहारी येशू हे खः। वय्‌कः पवित्रम्‍ह व दोष मदुम्‍ह खः। वय्‌कःयात पापीतय्‌गु पुचलं अलग तयादीगु दु, अले स्‍वर्गय् नं दकलय् तःधंम्‍ह यानादीगु दु। 
वय्‌कलं मेपिं दकलय् तःधंपिं पुजाहारीतय्‌सं थें न्‍हियान्‍हिथं थःगु व मेपिनिगु पापयागु निंतिं बलि बियाच्‍वने माःगु मदु, छाय्‌धाःसा थःत लः ल्‍हानादीबलय् हे वय्‌कः सदांया निंतिं छकलं बलिदान जुइ धुंकल। 
व्‍यवस्‍थां सिद्ध मजूपिं मनूतय्‌त दकलय् तःधंम्‍ह पुजाहारी दय्‌कल। व्‍यवस्‍थाया लिपा वःगु परमेश्‍वरं पाफयादीगु बाचाय् धाःसा वय्‌कःया काय्‌यात सदांया निंतिं सिद्धम्‍ह पुजाहारी यानादिल। 
