﻿१ थेसलोनिकी.
5.
दाजुकिजापिं, प्रभु थुखुन्‍हु थुबलय् झाइ धकाः छिमित च्‍वया च्‍वनेमाःगु मदु, 
छाय्‌धाःसा प्रभु झाइगु ई चान्‍हय् खुँ वये थें थ्‍यंकः वइ धकाः ला छिमिसं सि हे स्‍यू। 
मनूतय्‌सं प्‍यखें “शान्‍ति दु, ग्‍याये माःगु मदु” धया च्‍वनीबलय् लाक्‍क हे इमिके प्‍वाथय् दुम्‍ह मिसायात मचाबुइ ब्‍यथा जू थें आकाझाकां विनाश जू वइ। अले इपिं छुं यानाः नं बचय् जुइ फइ मखु। 
छिमित धाःसा प्रभु झाइगु ई खुँ वः थें जुइ मखु, छाय्‌धाःसा छिपिं खिउँथाय् च्‍वनाच्‍वंगु मदु। 
छिपिं न्‍हिया जलय् च्‍वनाच्‍वंपिं खः। झीपिं चाया खिउँथासय् च्‍वना च्‍वनापिं मखु। 
अय्‌जूगुलिं झीपिं मेपिं थें न्‍ह्यलं ब्‍वाना च्‍वने मजिल, बरु होश यानाः न्‍ह्यलं चाय्‌का च्‍वनेमाः। 
द्यनीपिं नं चान्‍हय् हे द्यनी, अले अय्‌लाःगुलुतय्‌सं नं चान्‍हय् हे त्‍वनाजुइ। 
झीपिं जलय् च्‍वनीपिं जूगुलिं झीसं थःत कःघाना च्‍वनेमाः। झीसं ला विश्‍वास व मायायात छातिइ चीगु नँयागु पाता थें चिना तयेमाः अले मुक्तियागु आशायात तपुलि थें पुया च्‍वनेमाः। 
परमेश्‍वरं झीत सजाँय बीत सःतादीगु मखु, बरु झी प्रभु येशू ख्रीष्‍टपाखें मुक्ति बीत सःतादीगु खः। 
वय्‌कः झीगु निंतिं सिनादिल। अय्‌जूगुलिं प्रभु लिहां झाइबलय् झीपिं म्‍वाना च्‍वंसां, सी धुंकूसां वय्‌कः नाप च्‍वने दइ। 
उकिं छिमिसं आः थें तुं थःथवय् साहस बियाः बल्‍लाका च्‍वनेगु याना च्‍वँ। 
दाजुकिजापिं, छिमित जिगु बिन्‍ति दु – छिमिथाय् ज्‍या यानाच्‍वंपिं, छिमित स्‍यनेकने याइपिं थकालिपिन्‍त हनाबना तयेगु या। 
इमिसं यानाच्‍वंगु ज्‍यां यानाः इमित दुनुगलंनिसें माया यानाः हनाबना तयेगु या। अले थःथवय् नं मिलय् चले जुयाच्‍वँ। 
जिं छिमित हानं धाये – अल्‍छीतय्‌त ब्‍वःब्‍यु, नुगः क्‍वतुंपिन्‍त हःपा ब्‍यु, बमलाःपिन्‍त ग्‍वाहालि या, अले न्‍ह्याम्‍हय्‌सिनं न्‍ह्यागु धाःसां सह यानाच्‍वँ। 
मभिंगुया पलेसा मभिंगु तुं याये मते, बरु थःथवय् व न्‍ह्याम्‍हय्‌सित नं न्‍ह्याबलें भिंका जुइगु कुतः या। 
न्‍ह्याबलें लय्‌ताया च्‍वँ। 
न्‍ह्याबलें प्रार्थना याना च्‍वँ। 
न्‍ह्यागु खँय् न्‍ह्यागु जूसां परमेश्‍वरयात सुभाय् बियाः च्‍वँ। ख्रीष्‍टयात विश्‍वास यानाः छिमिसं थथे यायेमा धयागु हे परमेश्‍वरयागु इच्‍छा खः। 
पवित्र आत्‍मायागु इच्‍छायात त्‍यलेत स्‍वये मते। 
अगमवाणीयात क्‍वथुनाः खँ ल्‍हाये मते। 
न्‍ह्यागु खँयात नं बांलाक वाला स्‍वयेगु निं या। अले भिंगु खँ जक ल्‍यया का। 
फुक्‍क कथंयागु मभिंगु खँपाखें तापाक च्‍वँ। 
झीत शान्‍ति बियादीम्‍ह परमेश्‍वरं हे छिमित पवित्र यानाः प्रभु येशू ख्रीष्‍ट झाया मदितले छिमिगु आत्‍मा, प्राण व म्‍हयात दोष मदय्‌क तयादीमा। 
छिमित सःता दीम्‍हय्‌सिनं हे थ्‍व फुक्‍क यानादी, छाय्‌धाःसा वय्‌कः विश्‍वास याये बहःम्‍ह खः। 
दाजुकिजापिं, जिमिगु निंतिं प्रार्थना या। 
दाजुकिजापिं सकसिनं थःथवय् यचु नुगलंनिसें माया यानाः ज्‍वजलपा यायेगु या। 
दाजुकिजापिं, सकसितं थ्‍व पौ ब्‍वना न्‍यंकाब्‍यु धकाः जिं छिमित प्रभुयागु नामं बिन्‍ति यानाच्‍वना। 
झी प्रभु येशू ख्रीष्‍टया दया माया छिमिके दयेमा।
