﻿गलाती.
2.
झिंप्‍यदँ लिपा बारनाबास नाप जि यरूशलेमय् वना। तीतसयात नं नापं ब्‍वना यंका। 
परमेश्‍वरं जितः अन वने हे माः धकाः धयादीगुलिं जि वनागु खः। जिं न्‍हापा यानागु व आः यानाच्‍वनागु ज्‍या सितिं मवनेमा धकाः यहूदीमखुपिन्‍त भिंगु खँ न्‍यंकागु खँ मण्‍डलीया थकालिपिन्‍त जक कना। 
जिनापं वःम्‍ह तीतसयात ग्रीक जूसां म्‍हय् चिं तय्‌केमाः धकाः सुनानं कर मया। 
जिमिसं ख्रीष्‍टपाखें कयागु छुत्‍कारायागु खँ सीकेत जिमिगु चिवा कायेत फताहा विश्‍वासी जुयाः अन वःपिं छम्‍ह निम्‍हय्‌सिनं धाःसा थ्‍व खँ पितहल। इमिसं जिमित दासयात थें व्‍यवस्‍थां धाःथें हे यायेमाः धकाः कर यात। 
इमिसं धाःगु छता हे खँ जिमिसं मानय् मयाना। थुकथं जिमिसं भिंगु खँय् सत्‍य दु धकाः छिमित क्‍यनाबिया। 
मण्‍डलीया थकालि धयाजूपिं इपिं न्‍ह्याक्‍व हे तःधं जूसां जितः छुं मपाः। परमेश्‍वरं ख्‍वाः स्‍वयाः न्‍याय यानादी मखु। इमिसं जिगु खँयात कयाः छुं मधाः। 
गथे परमेश्‍वरं पत्रुसयात यहूदीतय्‌त भिंगु खँ न्‍यंकेगु ज्‍या बियादिल, अथे हे जितः नं यहूदीमखुपिन्‍त भिंगु खँ न्‍यंकेगु ज्‍या बियादिल धकाः इमिसं सीकल। 
वय्‌कःयागु शक्तिं हे जितः यहूदीमखुपिन्‍त भिंगु खँ न्‍यंकीम्‍ह प्रेरित यानादिल। अथे हे पत्रुसयात नं यहूदीतय्‌त भिंगु खँ न्‍यंकीम्‍ह प्रेरित यानादिल। 
मण्‍डलीया थां धयातःपिं याकूब, पत्रुस व यूहन्‍नां परमेश्‍वरं जितः थ्‍व ज्‍या बियादीगु खः धकाः सीकाः बारनाबासयात व जितः मण्‍डलीया जव ल्‍हाः यात। जिमिगु ज्‍या यहूदीमखुपिन्‍थाय् वनेगु, अले इमिगु ज्‍या यहूदीतय्‌थाय् वनेगु जुल। 
इमिगु मण्‍डलीइ च्‍वंपिं नये मखंपिन्‍त ग्‍वाहालि यायेमाः धकाः जक इमिसं जितः धाःगु खः। थ्‍व हे ज्‍या न्‍हापांनिसें हे यायेगु जिगु मतिइ दुगु खः। 
पत्रुस एन्‍टिओखियाय् वःबलय् विश्‍वासी मनूतय्‌गु न्‍ह्यःने हे जिं वयात ब्‍वः बिया, छाय्‌धाःसा सी दय्‌कः हे वं द्वंकूगु खः। 
याकूबं छ्वयाहःपिं मनूत वये न्‍ह्यः पत्रुसं यहूदीमखुपिं विश्‍वासीतनाप नयेत्‍वनेगु यानाच्‍वन। इपिं वये धुंकाः म्‍हय् चिं तयेमाः धकाः धाइपिं मनूत खनाः ग्‍यानाः पत्रुसं यहूदीमखुपिं नाप नयेत्‍वनेगु त्‍वःताबिल। 
पत्रुस नाप जूपिं यहूदी विश्‍वासीतय्‌सं नं अथे हे यात। इमिसं यानाः बारनाबासंनापं अथे यात। 
इपिं थथे सत्‍य भिंगु खँयागु लँपुइ मजूगु खनाः जिं पत्रुसयात फुक्‍कसिया न्‍ह्यःने थथे धयाबिया – “यहूदी जुयाः नं छि यहूदीमखुम्‍ह मनू थें जुयाच्‍वन। छि ला यहूदी थें मच्‍वं। थुकथं छिं यहूदीमखुपिन्‍त यहूदीत थें जू धकाः गथे यानाः धया जुइगु?” 
झीपिं बूसांनिसें हे यहूदीत खः। झीपिं यहूदीमखुपिं मनूत थें पापी मखु। 
अथेसां येशू ख्रीष्‍टयात विश्‍वास याःसा जक परमेश्‍वरं मुक्ति बियादी धकाः झीसं स्‍यू। व्‍यवस्‍था मानय् यानाः जक धर्मी ठहरय् जुइ फइ मखु, येशू ख्रीष्‍टयात विश्‍वास याःसा जक धर्मी ठहरय् जुइ धकाः झीसं नं येशू ख्रीष्‍टयात विश्‍वास यानागु खः। व्‍यवस्‍था मानय् यानाः जक ला सुं नं धर्मी जुइ फइ मखु। 
येशू ख्रीष्‍टयात विश्‍वास यानाः धर्मी ठहरय् जुइत स्‍वयाः नं झीसं यहूदीमखुपिन्‍सं थें पाप याना हे च्‍वन धाःसा ख्रीष्‍टं झीत पापी यानादीगु जुइ ला? मखु, थथे मखु। 
त्‍वःताछ्वये धुनागु व्‍यवस्‍थायात जिं हानं मानय् यानाः धर्मी जुइत स्‍वल धाःसा जि पापी जुइ। 
छाय्‌धाःसा परमेश्‍वरया निंतिं जि म्‍वाये फयेमा धकाः व्‍यवस्‍थापाखें व्‍यवस्‍थाया निंतिं जि सिनागु। 
जि ख्रीष्‍टनाप क्रूसय् सी धुन, जि थः हे म्‍वानाच्‍वनागु मखु, बरु ख्रीष्‍ट जिके म्‍वानादीगु खः। जि ला आः जितः माया यानाः जिगु निंतिं सिनादीम्‍ह परमेश्‍वरया काय्‌यात विश्‍वास यानाः म्‍वानाच्‍वनागु खः। 
परमेश्‍वरयागु दया माया जिं सितिं छ्वये मखु। व्‍यवस्‍था मानय् यानाः मनूत धर्मी ठहरय् जुइगु जूसा ख्रीष्‍ट सिनादीगु सितिं वन। 
