﻿२ कोरिन्‍थी.
9.
यहूदियाय् च्‍वंपिं विश्‍वासीतय्‌त छ्वयाहःगु ग्‍वाहालियागु खँय् जिं छिमित हानं च्‍वया च्‍वनेमाःगु मदु। 
छिपिं इमित ग्‍वाहालि बीत न्‍ह्यचिलाच्‍वंगु दु धकाः स्‍यूगुलिं जिं माकेडोनियाय् च्‍वंपिं विश्‍वासीतनाप छिमित तःधंकाः खँ ल्‍हाना। अखैयाय् च्‍वंपिं विश्‍वासीत सकलें दच्‍छि न्‍ह्यःनिसें हे धिबा बीत न्‍ह्यचिलाच्‍वंगु दु धकाः जिं इमित धयाबिया। छिमिगु थज्‍याःगु खँ न्‍यनाः इपिं नं धिबा बीत न्‍ह्यचिलाच्‍वंगु दु। 
अय्‌जूगुलिं थुपिं दाजुकिजापिन्‍त छिमिथाय् छ्वयाहयागु दु। छिमिसं बि हे बी धकाः जिं धयाजुया थें छिमिसं नं बिल धाःसा जिगु खँ सत्‍य जुल, मखुसा जि ला फय्‌गं थें जुइ। 
माकेडोनियाय् च्‍वंपिं सुं विश्‍वासीत जि नाप छिमिथाय् वयाः छिमिसं धिबा बी मफुत धाःसा जितः नं छिमित नं लज्‍या जुइ, छाय्‌धाःसा जिमिसं छिमिके यक्‍व भरोसा तयागु खः। 
अय्‌जूगुलिं जिं न्‍हापां हे थः वये न्‍ह्यः इमित छ्वयाहयागु खः। थथे छिमिसं बी धाःगु धिबा ठीक याना ति। अले थ्‍व धिबा करंबरं मखु, बरु थःयसें ब्‍यूगु ग्‍वाहालि खः धकाः सी दइ। 
थ्‍व खँ नं ल्‍वःमंके मते – कम पुसा ह्वःम्‍हय्‌सिनं भतिचा जक सय्‌की। यक्‍व पुसा ह्वःम्‍हय्‌सिनं यक्‍व हे सय्‌की। 
सकसिनं थःगु मनय् गुलि बी धकाः पक्‍का याःगु खः उलि हे ब्‍यु। बीधुंकाः नुगः मछिंका च्‍वने मज्‍यू, करंबरं बीगु नं बांमलाः, छाय्‌धाःसा लय्‌तायाः ब्‍यूम्‍ह मनू खनाः परमेश्‍वर लय्‌तायादी। 
अले परमेश्‍वरं छिमित फुक्‍क कथंया आशिष अझ अप्‍वः हे बियादी। छिमित गुब्‍सं मगाःमचाः जुइ मखु। अले भिंगु ज्‍या यायेत नं छिमिके यक्‍व दइ। 
धर्मशास्‍त्रय् नं थथे च्‍वयातःगु दु – “नये मखंपिन्‍त नुगः चक्‍कंकाः बीम्‍ह मनूयागु दया माया सदां दयाच्‍वनी।” 
पुसा ह्वलीपिन्‍त पुसा बियाः नयेत नसा बियादीम्‍ह परमेश्‍वरं हे छिमित नं माक्‍व पुसा बियादी अले तःमा नं यानादी। थुकथं छिमिके झन मेपिन्‍त बीत नं यक्‍व दइ। 
न्‍ह्याबलें छिमिसं नुगः चक्‍कंकाः कर्पिन्‍त बियाच्‍वने फय्‌क परमेश्‍वरं छिमित तःमि यानातयादी। अले छिमिसं ब्‍यूगु भेटी जिमिसं इना बियागुलिं इमिसं परमेश्‍वरयात जयजय यानाः सुभाय् बियाच्‍वनी। 
परमेश्‍वरया मनूतय्‌त थुकथं छिमिसं ग्‍वाहालि याःगुलिं इमित माक्‍व चू जक लाःगु मखु, थुकिं यानाः इमिसं दुनुगलंनिसें परमेश्‍वरयात नं सुभाय् बियाच्‍वनी। 
छिमिसं थथे ग्‍वाहालि याःगुलिं फुक्‍कसिनं छिपिं भिंपिं मनूत खः धकाः सीकी। ख्रीष्‍टयागु भिंगु खँ मानय् यानाच्‍वंगु दु धकाः थुकिं सी दइ। थुकिं यानाः इमिसं परमेश्‍वरयात सुभाय् बी। 
परमेश्‍वरं छिमित यक्‍व हे दया माया यानादीगुलिं छिमित माया यानाः छिमिगु निंतिं इमिसं प्रार्थना याइ। 
थुकथं परमेश्‍वरं झीत तःधंगु वरदान बियादीगुलिं वय्‌कःयात सुभाय् दु। 
