﻿प्रेरित.
24.
न्‍यान्‍हु लिपा दकलय् तःधंम्‍ह पुजाहारी हननिया, थकालिपिं व तर्तुल्‍लस धाःम्‍ह छम्‍ह वकिलयात ब्‍वनाः कैसरियाय् क्‍वहां वल। इमिसं बडा-हाकिमयात पावलयागु नामय् उजुर यात। 
पावलयात बडा-हाकिमया न्‍ह्यःने हये धुंकाः तर्तुल्‍लसं वयात द्वपं बियाः थथे धाल – “हनेमाःम्‍ह फेलिक्‍सजु, छसपोलं यानाः जिपिं आनन्‍दं च्‍वनाच्‍वनागु दु। छसपोलयागु बुद्धिं यानाः थ्‍व देशय् यक्‍व भिना वयाच्‍वंगु दु। 
थ्‍व खँ जिमिसं न्‍ह्याबलें न्‍ह्याथाय् नं मानय् याना वयाच्‍वनागु दु। अले थुकिया निंतिं जिमिसं छसपोलयात सुभाय् बियाच्‍वनागु दु। 
छसपोलयागु ई यक्‍व कयाच्‍वने मखु, अय्‌सां दया यानाः जिमिगु छत्‍वाःचा बिन्‍ति न्‍यना बिज्‍याहुँ। 
थ्‍व मनू तसकं ग्‍यानापुम्‍ह, संसारय् च्‍वंपिं फुक्‍क यहूदीतय्‌त ल्‍वाका जूम्‍ह खः। अले थ्‍व नासरी पुचःयाम्‍ह नायः नं खः। 
थ्‍वं देगःयात नं अशुद्ध यायेत्‍यंगु खः, अबलय् हे जिमिसं थ्‍वयात ज्‍वना। अले जिमिगु थःगु हे व्‍यवस्‍थाकथं थ्‍वयात सजाँय बीत्‍यनागु खः। 
तःधंम्‍ह कप्‍तान लुसियसं वयाः थ्‍वयात जिमिगु ल्‍हातं बलजफ्ती त्‍वःतका यन। 
अले वयाथाय् उजुर याःवंक्‍वसित छसपोलयाथाय् हुँ धकाः उजं बियाहल। छसपोलं वयाके हे न्‍यनाबिज्‍याःसा जिमिसं पाः यानाच्‍वनागु फुक्‍क खँ सी दइ।” 
व नाप वःपिं यहूदीतय् नायःतय्‌सं नं वं धाःगु खँ सत्‍य खः धकाः बडा-हाकिमयात धाल। 
अले बडा-हाकिमं पावलयात नवायेत ल्‍हाःभाय् याःगुलिं वं थथे धाल – “यक्‍व दंनिसें छसपोलं थ्‍व देशय् न्‍याय याना वयाच्‍वंगु जिं स्‍यू। उकिं छसपोलया न्‍ह्यःने थथे थःगु खँ धाये दयाः जि लय्‌ता। 
जि यरूशलेमय् परमेश्‍वरया आराधना यायेत वयागु झिंनिन्‍हुं अप्‍वः मदुनि। थ्‍व खँ मेपिन्‍के नं न्‍यनादी फु। 
जि देगलय् सुंनाप कचकच हालाच्‍वंगु खः धकाः सुं यहूदीं नं धाये फइ मखु। न सुनानं जितः धर्मशास्‍त्र स्‍यनिगु छेँय् व शहरय् गनं सुयातं ल्‍वायेत ग्‍वाकाः जूगु हे खं धकाः धाये फइ। 
न इमिसं जितः थःपिन्‍सं पाः याःगु खँयागु दसि हे बी फइ। 
“अय्‌नं इमिसं धाःगु छता खँ ला जिं नं खः धकाः धाये। जिं नं जिमि तापाःबाज्‍यापिन्‍सं मानय् याना वःम्‍ह परमेश्‍वरयागु आराधना यानागु खः, गुकियात इमिसं ‘नासरी पुचः’ धकाः धयाजुल। मोशायागु व्‍यवस्‍था व अगमवक्तां च्‍वया थकूगु फुक्‍क खँय् जिं विश्‍वास याना। 
भिंपिं नं मभिंपिं नं सिनाः हानं म्‍वाना वइतिनि धकाः परमेश्‍वरयाके इमिसं थें जिं नं आशा यानाच्‍वनागु दु। 
अय्‌जूगुलिं जिं मनूतय्‌गु न्‍ह्यःने नं परमेश्‍वरयागु न्‍ह्यःने नं थःत यचुकाः ज्‍या याना जुया।” 
“यक्‍व दँ लिपा जि चीमिपिं दाजुकिजापिन्‍त धिबा बीत व परमेश्‍वरयात छाय्‌छी यायेत यरूशलेमय् लिहां वयागु खः। 
देगलय् शुद्ध जुइगु ज्‍या यानाच्‍वनाबलय् हे इमिसं जितः ज्‍वंगु खः। अबलय् जि नाप सुं छम्‍ह मनू नं मदु। अले सुंनाप कचकच हालाच्‍वनागु नं मखु। 
एशियां वःपिं यहूदीत नं अन दुगु खः, इमि नं जिगु खँय् छुं धायेमाःगु दुसा धाः वये माःगु खः नि। 
मखुसा महासभाया न्‍ह्यःने दनाबलय् थन दुपिन्‍सं जिके छुं दोष खंगु दुसा व धायेमानि। 
जिं इमिगु दथुइ दनाः थुलि हे जक धयागु खः – ‘सीपिं मनूत म्‍वाना वइतिनि धकाः विश्‍वास यानागुलिं थौं जि छिकपिन्‍थाय् न्‍ह्यःने थथे न्‍याय याका च्‍वनेमाल।’” 
फेलिक्‍सं प्रभुयागु खँ बांलाक स्‍यूगुलिं इमित थथे धकाः चीकाछ्वल – “तःधंम्‍ह कप्‍तान लुसियस वल धायेवं जिं छिमिगु मुद्दा छिने यानाबी।” 
अले फेलिक्‍सं कप्‍तानयात “पावलयात कुना ति, म्‍हस्‍यूपिं सुनानं नापलाः वःसा नापलाके ब्‍यु। छुं ब्‍यू वःसा बीके ब्‍यु, पने मते” धकाः उजं बिल। 
छन्‍हु निन्‍हु लिपा फेलिक्‍स थः यहूदी कलाः द्रूसिल्‍लायात ब्‍वनाः वल। अले येशू ख्रीष्‍टयागु विश्‍वासयागु खँ न्‍यनेत पावलयात सःतके छ्वल। 
अले वं इमित परमेश्‍वरया न्‍ह्यःने धर्मी ठहरय् जुइगु, थःगु मनयात थातय् लाकेगु व लिपा जुइतिनिगु न्‍याययागु खँ न्‍यंकल। थ्‍व न्‍यनाः फेलिक्‍सं ग्‍यानाः थथे धाल – “आःयात गात, लिपा हानं लिलात धाःसा छन्‍त सःतके हये।” 
पावलयापाखें धिबा नयेदइ ला धकाः वं मतिइ तःगु खः। अय्‌जूगुलिं नं वं पावलयात थथे इलय् ब्‍यलय् सःताः खँ ल्‍हायेगु याःगु खः। 
निदँ लिपा फेलिक्‍सया थासय् पर्किअस फेस्‍तस बडा-हाकिम जुयाः वल। फेलिक्‍सं यहूदीतय्‌त लय्‌ताय्‌का तयेत पावलयात कुना तुं तल। 
