﻿मर्कूस.
15.
कन्‍हय् खुन्‍हु सुथ न्‍हापां हे तःधंपिं पुजाहारीत, थकालिपिं व शास्‍त्रीतय्‌सं सल्‍लाह यानाः येशूयात चिनायंकाः पिलातसयात लःल्‍हाना बिल। 
वं येशूयाके न्‍यन – “यहूदीतय् जुजु छ हे खः ला?” वय्‌कलं लिसः बियादिल – “छिं थःम्‍हं हे धयादिल।” 
वय्‌कलं यक्‍व मखुगु खँ ल्‍हात धकाः तःधंपिं पुजाहारीतय्‌सं वय्‌कःयात पाः यात। 
हानं पिलातसं न्‍यन – “छं छुं नं धायेगु मदु ला? इमिसं गुलिमछि खँय् छन्‍त पाः यानाच्‍वन।” 
अय्‌नं वय्‌कलं छुं हे धयामदी। थ्‍व खनाः पिलातस अजू चाल। 
छुत्‍काराया नखःबलय् यहूदीतय्‌सं फ्‍वंम्‍ह छम्‍ह कैदीयात त्‍वःतेगु चलन पिलातसं यानातःगु दु। 
अबलय् ज्‍वनाः कुनातःम्‍ह बरब्‍बा धाःम्‍ह छम्‍ह मनू दु। बिद्रोहया इलय् मनू स्‍याःगुलिं वयात झ्‍यालखानाय् कुना तःगु खः। 
न्‍ह्याबलें नखःबलय् छम्‍ह कैदीयात त्‍वःतेगु यानातःगुलिं मनूतय्‌सं अबलय् नं छम्‍हय्‌सित त्‍वःताब्‍यु धकाः फ्‍वं वन। 
अले पिलातसं इमिके न्‍यन – “यहूदीतय् जुजुयात त्‍वःता ब्‍यूसा छिमित यः ला?” 
तःधंपिं पुजाहारीतय्‌सं वय्‌कःयात स्‍वये मफयाः ज्‍वंकूगु खः धकाः वं स्‍यू। 
अले ला तःधंपिं पुजाहारीतय्‌सं मनूतय्‌त ग्‍वाकाः वय्‌कःयागु पलेसा बरब्‍बायात त्‍वःताब्‍यु धकाः धाय्‌कल। 
वं इमित धाल – “अय्‌सा छिमिसं यहूदीतय् जुजु धकाः धाःम्‍हय्‌सित छु यायेगु लय्?” 
इपिं फुक्‍कसिनं हालाः धाल – “वयात क्रूसय् यख्‍खानाब्‍यु।” 
वं इमित धाल – “छाय्, वं अपाय्‌सकं स्‍याये मायेक छु याःगु दु?” इपिं झन जक चिल्‍लाय्‌दंक हाला हल – “वयात क्रूसय् यख्‍खानाब्‍यु।” 
इपिं थथे हालाच्‍वंगुलिं मनूतय्‌त लय्‌ताय्‌केत पिलातसं बरब्‍बा धाःम्‍ह मनूयात त्‍वःताबिल। येशूयात दायाः क्रूसय् यख्‍खाना स्‍याके छ्वल। 
अले सिपाइँतय्‌सं वय्‌कःयात दरबारया चुकय् यंकल। अन फुक्‍क सिपाइँतय्‌त सःताः मुंकल। 
वय्‌कःयात जुजुयात थें ह्याउँगु वसतं पुंकाः कंयागु श्रीपेच दय्‌काः छेनय् पुइकाबिल। 
थुलि याये धुंकाः इमिसं वय्‌कःयात थथे धाधां हाय्‌कल – “यहूदीतय् जुजुया जय जुइमा।” 
न्‍हाय्‌पं कथिं छेनय् दायाः थुकलं बियाः इमिसं वय्‌कःयात भागि यात। 
थुकथं इमिसं वय्‌कःयात गिजय् याये फक्‍व याये धुंकाः ह्याउँगु वसः त्‍वकाः न्‍हापायागु तुं वसतं पुंका बिल। अले वय्‌कःयात क्रूसय् यख्‍खायेत यंकल। 
कुरेनीं वःम्‍ह अलेक्‍जेन्‍डर व रूफसया अबु सिमोनयात इमिसं लँय् नापलात। अले इमिसं वयात कर कर यानाः येशूयागु क्रूस क्‍वबिकल। 
थुकथं इमिसं वय्‌कःयात गलगथा धाःगु थासय् हल। गलगथायागु अर्थ खप्‍परे धाःगु थाय् खः। 
अन थ्‍यंकाः इमिसं वय्‌कःयात स्‍याःमचाइगु मूर्र वासः ल्‍वाकछ्यानातःगु दाखमद्य त्‍वनेत बिल, वय्‌कलं व त्‍वना मदी। 
थथे वय्‌कःयात क्रूसय् यख्‍खानाबिल। अले चिट्ठा तयाः इमिसं वय्‌कःयागु वसः इना काल। 
वय्‌कःयात क्रूसय् यख्‍खाःबलय् सुथसिया नौ बजे जुल। 
वय्‌कःयात पाः यानाः थथे च्‍वयाः क्रूसय् तानाबिल – “यहूदीतय् जुजु।” 
उबलय् हे इमिसं वय्‌कःयागु जवंखवं निम्‍ह दाखुँतय्‌त नं यख्‍खायाबिल। 
थुकथं धर्मशास्‍त्रय् च्‍वयातःगु खँ पूवन – “वय्‌कःयात अपराधीत लिसे ल्‍याः खात।” 
व लँय् जूपिं फुक्‍कसिनं छ्यं क्‍वात्तु क्‍वानाः वय्‌कःयात गिजय् यानाः थथे धाल – “देगः थुनाः स्‍वन्‍हुं हे दने फु धाःम्‍ह छ हे मखु ला? 
आः क्रूसं क्‍वहां वयाः थःत बचय् याये फु ला?” 
अथे हे तःधंपिं पुजाहारीतय्‌सं नं शास्‍त्रीत लिसे थथे खँ ल्‍हानाः वय्‌कःयात गिजय् यात – “वं मेपिन्‍त ला बचय् यात, थःत धाःसा बचय् याये मफुत। 
इस्राएलीतय् जुजु, अले मुक्ति बीम्‍ह ख्रीष्‍ट खः धयागु जूसा क्रूसं क्‍वहां वयाः क्‍यँ। अले जिमिसं विश्‍वास याये।” वय्‌कः नाप क्रूसय् यख्‍खाया तःपिन्‍सं नं वय्‌कःयात गिजय् यात। 
अबलय् न्‍हिनय् बाह्र बजेनिसें तीन बजे तक सारा संसार हे खिउँसे च्‍वना वन। 
तीन बजेपाखे येशू थथे धकाः तसकं हाला हल – “इलोई-इलोई लामा सबखथनी।” थुकियागु अर्थ – “जिमि परमेश्‍वर, जिमि परमेश्‍वर, छिं जितः छाय् त्‍वःतादिया?” 
थ्‍व न्‍यनाः अन दनाच्‍वंपिं मनूतय्‌सं थथे धाल – “वं ला एलियायात सःता च्‍वन।” 
छम्‍हय्‌सिनं कापः हिनातःगु कथि कयाः ब्‍वाँय् वनाः पाउँसे च्‍वंगु दाखमद्य थुनाः हल, अले वय्‌कःया म्‍हुतुइ ल्‍वसुकाबिल। अले वं धाल – “स्‍वये, एलिया वयाः वयात क्‍वकाः वइ ला मवइ।” 
येशू छकः तसकं हालादिल, अले प्राण त्‍वःतादिल। 
अबलय् हे देगलय् च्‍वंगु पर्दा च्‍वंनिसें क्‍वथ्‍यंक निकू दलाः गुना वन। 
थथे वय्‌कः सीगु खनाः न्‍ह्यःनेसं दनाः वय्‌कःयात स्‍वया च्‍वंम्‍ह छम्‍ह कप्‍तानं धाल – “धात्‍थें हे व ला परमेश्‍वरया काय् खः।” 
मिसातय्‌सं नं तापाकं स्‍वयाच्‍वंगु दु। इपिं मध्‍ये मरियम मग्‍दलिनी, चिधीम्‍ह काय् याकूब व योसेफया मां मरियम व सलोमीपिं नं खः। 
थुपिं येशू गालीलय् दीबलय् वय्‌कः नाप जुयाः वय्‌कःयात ग्‍वाहालि याःपिं मिसात खः। वय्‌कः नाप यरूशलेमय् वःपिं मेपिं यक्‍व मिसात नं अन स्‍वयाच्‍वंगु दु। 
विश्रामबार छन्‍हु न्‍ह्यः विश्रामबारयात माःगु ज्‍वरय् यायेगु दिं बहनी मजूनिबलय् 
अरिमथिया धाःगु थासय् च्‍वंम्‍ह योसेफ पिलातसयाथाय् वन। थ्‍व फुक्‍कसिनं हनातःम्‍ह सभाय् च्‍वंम्‍ह सल्‍लाह बीम्‍ह मनू खः। थ्‍व नं परमेश्‍वरयागु राज्‍य वइतिनि धकाः आशा यानाच्‍वंम्‍ह खः। अबलय् वं मग्‍यासे पिलातसयाथाय् वनाः येशूयागु सीम्‍ह फ्‍वं वन। 
येशू सी धुंकल धयागु खँ न्‍यनाः पिलातस छक्‍क जुल। वं कप्‍तानयात सःताः सी धुंकूगु खः ला कि मखु धकाः न्‍यन। 
कप्‍तानं “सी धुंकल” धकाः धाःगुलिं योसेफयात सीम्‍ह यंकि धकाः धाल। 
अले वं भिंगु सुतीकापः न्‍याना हयाः सीम्‍ह येशूयात क्‍वकयाः कापतं हिनाबिल। अले पहाड ह्वखनाः दय्‌कातःगु चिहानय् यंकाः तयाबिल। थुलि यानाः छगः तग्‍वःगु ल्‍वहं गुलु तुइकाः चिहानया प्‍वाः तिनाबिल। 
मरियम मग्‍दलिनी व योसेफया मां मरियमं थथे सीम्‍ह तःगु स्‍वयाच्‍वन। 
