﻿जकरिया.
9.
छगू अगमवाणी, हद्राक देशया विरोधय् परमप्रभुयागु वचन अले थ्‍व दमस्‍कसय् नं लाइ, छाय्‌धाःसा फुक्‍क मनूतय् व इस्राएलया कुलया मिखा परमप्रभुपाखे दु– 
अले सिमानाय् दुगु हमातय् नं लाइ, अले टुरोस व सीदोनय् नं लाइ, इपिं ला यक्‍व बुद्धि दुपिं खः। 
टुरोसं थःगु निंतिं छगू किल्‍ला दय्‌कूगु दु, वं वहः धू थें व लुँ गल्‍लीया ध्‍याचः ना थें मुंकूगु दु। 
अय्‌नं वयाके दुगु फुक्‍क धन-सम्‍पत्ति परमप्रभुं लाकाकयादी। अले इमिगु शक्तियात समुद्रय् नाश यानादी। अले इपिं मिं भस्‍म जुइ। 
व खनाः अश्‍कलोनयापिं ग्‍याइ। अले गाजा ग्‍यानाः थुरथुर खाइ। अले एक्रोन नं ग्‍याइ अले वयागु आशा कम जुयावनी, गाजां जुजु नाश जुइ, अले अश्‍कलोनय् हाकनं सुं च्‍वनी मखु। 
अश्‍दोद शहरयात विदेशीतय्‌सं अधिकार याइ अले पलिश्‍तीतय्‌गु तःधंछुयात जिं नाश यानाबी। 
जिं इमिगु म्‍हुतुं लानापं हि लिकयाबी व वाया दथुं घच्‍चाइपुस्‍से च्‍वंगु चिज लिकयाबी। अनंलि ल्‍यंदुपिं पलिश्‍तीत परमेश्‍वरया मनूत जुइ, अले यहूदाय् छगू कुल थें जुइ। एक्रोनय् च्‍वंपिं यबूसीत थें जुइ। 
आवलिं जिं थःगु देगःयात हमला याइपिं सिपाइँतपाखें रक्षा याये। हाकनं सुं क्‍वत्‍यलेम्‍हय्‌सिनं गुबलें नं जि मनूतय्‌त हमला याइ मखु। छाय्‌धाःसा आः जिं थःम्‍हं हे इमिगु बिचाः यानाच्‍वनागु दु। 
हे म्‍ह्याय् सियोन, लय्‌ताया च्‍वँ! हे म्‍ह्याय् यरूशलेम तसलं हा! स्‍व, छिमि जुजु छिमिथाय् झायादीगु दु। वय्‌कः धर्मीम्‍ह व मुक्ति बियादीम्‍ह खः। वय्‌कः क्‍वमिलुम्‍ह खः, वय्‌कः गधा गया, गधाया मचा गयाः झायादीगु दु। 
परमप्रभुं धयादी, एफ्राइमं जिं लडाइँया रथ चीकाबी, अले यरूशलेमं लडाइँया सलत यंके, लडाइँया धनुष त्‍वाःथला बी। वय्‌कलं जाति जातितय्‌त शान्‍तियागु खँ न्‍यंकादी। वय्‌कःया राज्‍य समुद्रंनिसें समुद्र तक अले यूफ्रेटिस खुसिंनिंसें पृथ्‍वीया सिथ तक न्‍यनावनी। 
छिपिंलिसे चिनागु हिया जिगु बाचाया कारणं जिं छिमि कैदीतय्‌त लः मदुगु गालं मुक्त यानाबी। 
हे आशा यानाच्‍वंपिं कैदीत, थःगु किल्‍लापाखे लिहां हुँ। आः जिं छिमित धाये, “छिमित जूगु सास्‍तीया पलेसा जिं छिमित उकिया निदुगं सुवाः बी।” 
जिं थः हे ग्रीकयापिं सिपाइँतलिसे ल्‍वाये। यहूदायापिं मनूत जिगु धनुष खः, एफ्राइमयापिं मनूत जिगु वाण खः। अले जिं थः शत्रुतय् विरोधय् चले यायेत यरूशलेमयापिं मनूत जिगु तरवार खः। 
परमप्रभु शत्रुतय्‌थाय् खनेदः वइ अले वय्‌कःया वाण हाबलासा थें थी। दक्‍व शक्ति दुम्‍ह परमप्रभुं तुरही पुयादी, अले दच्‍छिनयागु ग्‍वःफसय् जुयाः वय्‌कः झायादी। 
दक्‍व शक्ति दुम्‍ह परमप्रभुं थः मनूतय्‌त रक्षा यानादी। इमिसं थः शत्रुतय्‌त नाश यानाबी, इमिसं शत्रुतय्‌त ल्‍वहँतं कय्‌काः बुकी। अले इपिं दाखमद्य त्‍वंपिं थें लडाइँलय् ततःसलं हाली। इपिं वेदीया कुन्‍चाय् कुन्‍चाय् हि छ्वाकीगु तःग्‍वःगु ख्‍वला थें हिं जाःगु जुइ। 
उखुन्‍हु परमप्रभु इमि परमेश्‍वरं थः मनूतय्‌त फैजवाःतय्‌सं फैच्‍वलय्‌या बथांयात बचय् याःथें बचय् यानादी, श्रीपेचया मणि थें इपिं वय्‌कःया देशय् थी। 
इपिं गुलि यइपुस्‍से च्‍वनी अले गुलि बांलाइ। देशयागु अन्‍न नयाः दाखया ति त्‍वनाः ल्‍याय्‌म्‍ह ल्‍यासेत बल्‍लानावइ। 
