﻿हाग्‍गै.
2.
न्‍हय्‌गूगु लाया निइछन्‍हु खुन्‍हु परमप्रभुयागु थ्‍व वचन हाग्‍गै अगमवक्तापाखें वल। 
“शालतिएलया काय् यहूदाया राज्‍यपाल यरूबाबेल, यहोसादाकया काय्, दकलय् तःधंम्‍ह पुजाहारी यहोशू व बेबिलोनं लिहांवःपिं फुक्‍क मनूतय्‌त थथे धा। 
‘न्‍हापायागु थ्‍व देगःया झःझः खंपिं छिमिथाय् सु दनि? आः थ्‍व देगः गथे खने दु? आः थ्‍व देगः छुं हे मखु थें, मच्‍वं ला?’ 
परमप्रभुं धयादी, ‘हे यरूबाबेल, साहस या! हे यहोसादाकया काय्, दकलय् तःधंम्‍ह पुजाहारी यहोशू, साहस या!’ परमप्रभुं धयादी, ‘देशय् दक्‍व मनूत साहस यानाः ज्‍या न्‍ह्याकि। छाय्‌धाःसा जि छिपिंलिसे दु,’ दक्‍व शक्ति दुम्‍ह परमप्रभुं घोषणा यानादी। 
‘छिपिं मिश्र देशं पिहां वःबलय् जिं छिमित बियागु बचंकथं जिगु आत्‍मा छिपिंलिसे दया हे च्‍वंगु दु। छिपिं ग्‍याये मते।’ 
“दक्‍व शक्ति दुम्‍ह परमप्रभुं थथे धयादी, ‘छुं ई लिपा जिं हाकनं छकः आकाश, पृथ्‍वी, समुद्र व गंगु बँयात संकाबी। 
जिं फुक्‍क जातितय्‌त संकाबी, अले फुक्‍क जातितय्‌गु धन-सम्‍पत्ति थन मुं वइ। अले थ्‍व देगःयात झःझः धाय्‌के बी,’ दक्‍व शक्ति दुम्‍ह परमप्रभुं धयादी। 
‘वहः नं जिगु हे खः अले लुँ नं जिगु हे खः,’ दक्‍व शक्ति दुम्‍ह परमप्रभुं धयादी। 
‘लिपायागु देगः न्‍हापायागु देगः स्‍वयाः झःझः धाइ। अले थ्‍व थासय् जिं शान्‍ति बी’ धकाः दक्‍व शक्ति दुम्‍ह परमप्रभुं धयादी।” 
दारा जुजुं राज्‍य यानाच्‍वंगु निगूगु दँया गुंगूगु लाया निइप्‍यन्‍हु दुखुन्‍हु परमप्रभुयागु थ्‍व वचन हाग्‍गै अगमवक्तायाथाय् वल, 
“दक्‍व शक्ति दुम्‍ह परमप्रभुं थथे धयादी, ‘व्‍यवस्‍थां छु धाइ धकाः पुजाहारीतय्‌के न्‍यँ। 
सुनानं थःगु वसतय् पवित्र यानातःगु ला प्‍वःचिनाः उकिं मरि, दय्‌कातःगु नसा, दाखमद्य, चिकं व छुं नं कथंयागु नसात्‍वँसाय् थिल धाःसा पवित्र जुइ ला?’” पुजाहारीतय्‌सं लिसः बिल, “जुइ मखु।” 
अले हाग्‍गैनं न्‍यन, “सीम्‍ह थियाः अशुद्ध जूम्‍ह मनुखं थ्‍व नसात्‍वँसा थिल धाःसा अशुद्ध जुइ ला?” पुजाहारीतय्‌सं लिसः बिल, “जुइ, व अशुद्ध जुइ।” 
हाग्‍गैनं धाल, “परमप्रभुं धयादी, ‘थ्‍व जाति व इमिसं दय्‌कूगु नं फुक्‍कं अथे हे खः।’ इपिं व इमिसं छाःगु न्‍ह्यागु नं अशुद्ध खः। 
“‘आः परमप्रभुयागु देगः दय्‌के न्‍ह्यः छिमित गथे जुयाच्‍वंगु खः थनिंनिसें छिमिसं बांलाक बिचाः या। 
निइमुरिया अन्‍न आशा याःम्‍हसित झिगू मुरी जक दइगु। दाख तिसीगु थासय् नेय्‌गू लिटर दाखमद्य काः वःम्‍हसिनं निइगू लिटर जक काये खनीगु। 
छिमित व छिमिसं सय्‌कूगु फुक्‍क नाश यायेत जिं क्‍वाःगु फय्, फ्‍वसा, प्‍वँ छ्वयाहया। छिमिसं अय्‌नं पश्‍चाताप मयाः,’ परमप्रभुं धयादी। 
‘थनिनिसें बांलाक बिचाः या! थौं गुंगूगु लाया निइप्‍यंगूगु दिं खः। थौं परमप्रभुया देगःया जग तये सिधःगु दिं खः। बांलाक बिचाः या! 
भखारिइ अन्‍न ल्‍यंदनि ला? आःतक दाखमा, यःमरिमा, धालय्‌मा व जैतूनया सिमाय् फल मसःनि। “‘थनिनिसें जिं छिमित सुवाः बी।’” 
व हे लाया निइप्‍यन्‍हु खुन्‍हु परमप्रभुं निक्‍वः खुसी हाग्‍गैयात धयादिल, 
“जिं आकाश व पृथ्‍वीयात संकाबी धकाः यहूदायाम्‍ह राज्‍यपाल यरुबाबेलयात धा। 
जिं राज्‍य राज्‍यया गद्दी फातापुइकाबी व देश देशतय्‌गु शक्ति मदय्‌काबी। जिं रथ व उकी च्‍वनावइपिं सिपाइँतय्‌त फातापुइकाबी। सलत क्‍वदइ अले इमि सल गयावइपिन्‍सं छम्‍हय्‌सिनं मेम्‍हय्‌सित स्‍याइ। 
“ ‘उखुन्‍हु, हे शालतिएलया काय् जिम्‍ह दास यरूबाबेल, जिं छन्‍त कयाः अंगूयात थें तये, छाय्‌धाःसा जिं छन्‍त ल्‍ययागु दु’ धकाः दक्‍व शक्ति दुम्‍ह परमप्रभुं धयादी।”
