﻿हबकूक.
3.
शिग्‍गिओनोथ रागय् हबकूक अगमवक्तां याःगु प्रार्थना। 
हे परमप्रभु, जिं छिगु बारे न्‍यनागु दु। हे परमप्रभु, छिं यानादीगु ज्‍या खनाः जि छक्‍क हे जुल। जिमिगु इलय् न्‍हूकथं थःगु ज्‍या क्‍यनादिसँ, जिमिगु इलय् व सीकेबियादिसँ। तंचायादीसां जिमित दया यानादिसँ। 
परमेश्‍वर तेमानं झायादीगु दु पवित्र परमेश्‍वर पारान डाँडापाखें। सेला वय्‌कःया महिमां स्‍वर्ग त्‍वःपुल, अले पृथ्‍वी वय्‌कःया प्रशंसां जाल। 
सूर्य लुया वः थें वय्‌कः झःझः धाः वय्‌कःयागु ल्‍हाःपाखें जः प्‍वालाप्‍वाला थिनाः पिहां वल, अन वय्‌कःयागु शक्ति सुलाच्‍वंगु खः। 
वय्‌कःया न्‍ह्यःने न्‍ह्यःनें ल्‍वय् याकनं न्‍यनावन, महामारी वय्‌कःया पलाःया ल्‍यूल्‍यू वन। 
वय्‌कः जुइगु दिनाः पृथ्‍वीयात संकादिल। वय्‌कलं स्‍वयादिल, अले जात जातित थुरथुर खात। न्‍हापांनिसें दुगु पहाड पर्वतत कुचा कुचा जुल, उपिं पुलांगु डाँडात क्‍वदल। वय्‌कः सदां झाया हे च्‍वनादी। 
जिं कूशनया पालय्‌च्‍वंपिं मनूतय्‌त दुःख जुयाच्‍वंगु व मिद्यानया मनूत तसकं ग्‍यानाः थरथर खानाच्‍वंगु खना। 
हे परमप्रभु! छु छिगु तःच्‍वगु तं खुसिचातय्‌गु विरोधय् खः ला? छु छि खुसिया निंतिं तःम्‍वयादीयागु ला? छु छि समुद्रया निंतिं तसकं तःम्‍वयादीयागु ला? छि थः सल गयाः थःगु विजयया रथय् च्‍वना झायादीबलय्, छु छि तसकं तःम्‍वयादीयागु खः ला? 
छिं थःगु धनुष वाण लिकयादिल, छिं यक्‍व वाणतय्‌त सःतादिल। सेला छिं खुसिं पृथ्‍वीयात चिरि फायादिल। 
पहाडत छितः खनाः थुरथुर खात। आकाशं वा वया हे च्‍वन। ततःजाःगु समुद्र थ्‍वय्‌क हाल अले लःग्‍वारा सन। 
तसकं ब्‍वयावःगु प्‍वालाप्‍वाला थीगु छिगु वाणत व प्‍वालाप्‍वाला थीगु भालां यानाः सूर्य व तिमिला आकाशय् तक्‍क दित। 
तसकं तमं छि पृथ्‍वी थुखे उखे न्‍यासि झायादिल। तमं छिं जात जातिया मनूतय्‌त न्‍हूतु न्‍हूयादिल। 
थः मनूतय्‌त उद्धारया निंतिं, थः अभिषेक जूम्‍हय्‌सित बचय् यायेत छि झायादिल। दुष्‍टताया देशया न्‍हेलुवाःयात छिं चुंचुं यानादिल, वयागु छेनंनिसें तुति तक पचिनांगा यानादिल। 
मगाःमचाःपिं व दुखं जाःपिन्‍त गुप्‍तं नुनाछ्वय्‌गु इच्‍छां वःपिं वया सिपाइँत वाफय् वः थें जिमित लछारपछार यायेत वल, छिं वयागु हे भाला वयागु छेनय् सुयादिल। 
छिगु सलतय्‌सं समुद्रयात न्‍हुत्तुमत्तु न्‍हुल अले समुद्रया लः तसकं थुखे उखे सन। 
थ्‍व खँ जिं न्‍यनाबलय् जिगु नुगः तसकं थुरथुर खात, थ्‍व खँ जिं न्‍यनाबलय् जिगु म्‍हुतुसि थुरथुर खात, जिगु क्‍वँय्‌त दुने दुने मर्कय् जुल, अले जिगु तुति फ्‍यारर खात। अय्‌जूसां जिमित हमला याः वइपिं जात जातितय्‌त वइगु दुःखया दिंयात जिं धैर्य यानाः पियाच्‍वने। 
यःमरिया सिमाय् चुलि मह्ववःसां, दाखमाय् फल मसःसां, जैतूनया सिमाय् फल मदुसां, बुँइ अन्‍न मसःसां, गलय् फै-च्‍वलय् मदुसां, गलय् सा-द्वं हे मदुसां नं, 
जि परमप्रभुयाके लय् लय्‌ताय्, जिं जितः उद्धार यानादीम्‍ह परमेश्‍वरयाके लय् लय्‌ताय्। 
परमप्रभु परमेश्‍वर जिगु बल खः, वय्‌कलं जिगु तुति चल्‍लाया तुति थें यानादी, वय्‌कलं जितः तः तःजाःगु थासय् वने बहःम्‍ह यानादी। लय् तइम्‍हसिया निंतिं – जिगु तार बाजाय् थाइगु लय्।
