﻿योना.
2.
योनां न्‍याया प्‍वाथय् दुने हे च्‍वनाः परमप्रभु थः परमेश्‍वरयात प्रार्थना यात, 
“जितः आपत जूबलय् जिं परमप्रभुयाके ग्‍वाहालि फ्‍वना, वय्‌कलं लिसः बियादिल। पातालंनिसें परमप्रभुयात ग्‍वाहालिया लागि जि हालाहया, छिं जिगु सः न्‍यनादिल। 
छिं जितः समुद्रया क्‍वय् थ्‍यंक वांछ्वयादिल, जिगु प्‍यखें लःया लः जक। अले जितः लःया धालं त्‍वपुयाबिल। 
जिं बिचाः याना, जि छिगु मिखां तापाय् धुन, आः जिं छिगु पवित्रगु देगः गुब्‍सं खनी मखुत। 
लः जिगु गःपतय् थ्‍यंक थाहां वल, समुद्रं जितः नुनी थें च्‍वन, समुद्रया घाँय् जिगु छ्यं छग्‍वलं हित्तुहिनाच्‍वन। 
जि पहाडया हाय थ्‍यंक थ्‍यन, जि पातालया क्‍वय् थ्‍यंक दुना वनाः पातालया लुखा त्‍यू थें जुल। तर हे परमप्रभु जिमि परमेश्‍वर, छिं पातालं थकयाः जितः बचय् यानादिल। 
जि मूर्च्‍छा जुइ थें च्‍वन। उबलय् हे परमप्रभु, जिं छितः प्रार्थना याना। जिगु प्रार्थना छिथाय् छिगु पवित्रगु देगलय् थ्‍यंक थ्‍यन। 
म्‍वाःमदुगु मूर्तियात पुजा याइपिन्‍सं परमप्रभुयागु भक्तियात त्‍वःती। 
तर जिं छिगु म्‍ये हालाः छिगु नामय् बलि बिये। अले छु याये धकाः भाकल यानागु खः, व याये। परमप्रभुयापाखें हे उद्धार जुइ।” 
अले परमप्रभुं न्‍यायात आज्ञा बियादिल। न्‍यां समुद्रया सिथय् वयाः योनायात ल्‍ह्वयाबिल। 
