﻿आमोसया सफू.
1.
तकोय् च्‍वंपिं फैजवाःत मध्‍ये छम्‍ह आमोसया वचन। वं इस्राएलय् भुखाय् ब्‍वःगु निदँ न्‍ह्यः इस्राएलया बारे थ्‍व दर्शन खन। उबलय् उज्‍जियाह यहूदाया जुजु व येहोआशया काय् यारोबाम इस्राएलया जुजु खः। 
वं धाल, “परमप्रभु सियोन पर्वतं सिंह थें गर्जय् जुयादी, अले वय्‌कः यरूशलेमं थ्‍वय्‌क हालादी। फैजवाःतय्‌गु घाँय्‌ख्‍यः व कर्मेल डाँडाया च्‍वकाय् दुगु घाँय् गनावनी।” 
परमप्रभुं थथे धयादीगु दु, “दमस्‍कसया मनूतय्‌सं तःक्‍व हे पापयात, जिं इमित सजाँय मब्‍यूसे त्‍वःते हे मखु। छाय्‌धाःसा नँयागु वा दुगु ज्‍याभलं अन्‍न दाथें हे इमिसं गिलादया मनूतय्‌त तसकं बांमलाःगु व्‍यवहार यात। 
जिं जुजु हजाएलया दरबारय् मि तयाः छ्वय्‌काबी, अले उकिं बेन-हददया किल्‍लात भज्‍यंक नाश याइ। 
जिं दमस्‍कसया मू ध्‍वाखात तछ्यानाबी, जिं आवनया ब्‍यासिइ च्‍वंपिन्‍त व बेथ-अदनया शासकयात भज्‍यंक नाश यानाबी। अरामया मनूतय्‌त ज्‍वनाः कीर देशय् यंकी,” 
परमप्रभुं थथे धयादी – “गाजाय् च्‍वंपिं मनूतय्‌सं तःक्‍व हे पापयात, जिं इमित सजाँय मब्‍यूसे त्‍वःते मखु! इमिसं फुक्‍क खलःयात ज्‍वनायंकाः एदोमया ल्‍हातय् मियाबिल। 
जिं गाजाया पखालय् मि तयाः छ्वय्‌काबी, उकिं वया फुक्‍क किल्‍लात भज्‍यंक नाश याइ। 
अश्‍दोदया जुजुयात व अश्‍कलोनया शासकयात भज्‍यंक नाश यानाछ्वये। जिं एक्रोनया विरोधय् जिगु ल्‍हाः ल्‍ह्वने, अले ल्‍यंदुपिं फुक्‍क पलिश्‍तीत सी,” 
परमप्रभुं थथे धयादी – “टुरोसया मनूतय्‌सं तःक्‍व हे पापयात, जिं इमित सजाँय मब्‍यूसे त्‍वःते मखु! इमिसं फुक्‍क खलःयात एदोमयात मियाः इस्राएलीलिसें, दाजुकिजा थें जुइगु सन्‍धियात त्‍वाथुल, 
जिं टुरोसया पखालय् मि तयाः छ्वय्‌काबी, उकिं वया किल्‍लात भज्‍यंक नाश याइ।” 
परमप्रभुं थथे धयादी, “एदोमया मनूतय्‌सं तःक्‍व हे पाप यात, जिं इमित सजाँय मब्‍यूसे त्‍वःते मखु! इमिसं थः दाजु, इस्राएलीतय्‌त भतिचा नं दया माया मयासें तरवार ज्‍वनाः लिनाछ्वल, इमिगु तच्‍वःगु तंया कारणं याना, इमित झन अप्‍वः तं पिहां वल। 
जिं तेमान शहरय् मि तयाः छ्वय्‌काबी, उकिं बोज्राया किल्‍लात भज्‍यंक नाश याइ।” 
परमप्रभुं थथे धयादी – “अम्‍मोनया मनूतय्‌सं तःक्‍व हे पापयात, जिं इमित सजाँय मब्‍यूसे त्‍वःते मखु! इमिसं थःगु सिमाना अप्‍वः दय्‌केत गिलादया प्‍वाथय् दुपिं मिसातय्‌गु प्‍वाः तरवारं फायाबिल, 
जिं रब्‍बाया पखालय् मि तयाः छ्वय्‌काबी, उकिं वया किल्‍लात भज्‍यंक नाश याइ। व लडाइँया दिनय् तसकं हल्‍ला जुइ, अले तसकं तःच्‍वगु वाफय् वःगु दिनय् थें लडाइँ जुइ। 
इमि जुजु व भारदारतय्‌त ज्‍वना यंकी,” 
