﻿होशे.
8.
“तुरही पु! छम्‍ह इमा परमप्रभुया देगलय् च्‍वय् ब्‍वयाच्‍वंगु दु, छाय्‌धाःसा मनूतय्‌सं जिगु बाचा त्‍वथूगु दु, अले जिगु व्‍यवस्‍थाया विरोधय् विद्रोही जूगु दु। 
इस्राएलं जितः इनाप याइ, ‘हे जिमि परमेश्‍वर, जिपिं इस्राएलीतय्‌सं छितः म्‍हस्‍यू।’ 
तर छु बांलाः व इस्राएलं इन्‍कार याःगु दु। छम्‍ह शत्रुं वयात लिनाछ्वइ। 
इमिसं जितः न्‍यं हे मन्‍यंसे जुजुत ल्‍यल, इमिसं जितः न्‍यं हे मन्‍यंसे भारदारत ल्‍यल। इमिसं थःगु हे नाशया निंतिं थःगु लुँ व वहलं थःगु निंतिं मूर्ति दय्‌की। 
अय् सामरिया! छंगु द्वहंचाया मूर्ति वान्‍छ्‌वया ब्‍यु। जिगु तं इमिगु विरोधय् च्‍यानाच्‍वंगु दु। इपिं गुबलें शुद्ध जुइ मफुपिं जुयाच्‍वनी? 
इपिं इस्राएलीत खः। थ्‍व द्वहंचा कारीगरतय्‌सं दय्‌कूगु खः। व ला परमेश्‍वर मखु। सामरियायाम्‍ह व द्वहंचायात कुचा कुचा याइगु जुइ। 
“इमिसं फय् ह्वली अले ग्‍वःफय् मुंकी। दंचाय् छुं नं बाला सइ मखु, उकियागु बालिं छ्वचुं दइ मखु। छुं दत धाःसां विदेशीतय्‌सं व नयाबी। 
इस्राएलयात नुनाछ्वल, व जात-जातियापिं मनूतय्‌गु दथुइ ज्‍यागलय् मजूगु थल थें जुल। 
गुँगधा याकःचा थुखे उखे वना जूगु थें इपिं अश्‍शूरय् वन। एफ्राइमं ज्‍याला कयाः थः प्रेमीतनापं थःत मियाछ्वःगु दु। 
इमिसं थःत जात जातितय्‌त मिया छ्वःसां आः जिं इमित छथाय् मुंके। तःधंगु शक्ति दुम्‍ह जुजुं दुःखकष्‍ट ब्‍यूगुलिं इमिगु बल मदयावनी। 
“एफ्राइमं शुद्ध जुइगु बलिया वेदीत यक्‍व दय्‌कल। उपिं वेदीत हे वयागु निंतिं पाप याइगु वेदीत जूगु दु। 
जिं इमिगु निंतिं यक्‍व विधित जिगु व्‍यवस्‍थाय् च्‍वया, तर इमिसं उपिं विधियात मेपिनिगु चिज थें ताय्‌कल। 
इमिसं जितः बलि छाइ, अले व ला नइ, तर परमप्रभु इपिंनापं लय्‌तायामदी। आः जिं इमिगु दुष्‍ट ज्‍या लुमंकाः इमिगु पापया निंतिं सजाँय बी। इपिं मिश्र देशय् लिहांवनी। 
इस्राएलया मनूतय्‌सं थःत दय्‌कादीम्‍ह सृष्‍टिकर्ता परमेश्‍वरयात ल्‍वमंकाः ततःखागु छेँ दय्‌कल, यहूदाया मनूतय्‌सं यक्‍व शहरय् किल्‍लात दय्‌कल। तर जिं इमिगु शहरय् मि तयाबी, अले उकिं वया किल्‍लायात भस्‍म यानाबी।” 
