﻿होशे.
5.
“अय् पुजाहारीत, थ्‍व खँ न्‍यँ! अय् इस्राएलीत, ध्‍यान बियाः न्‍यँ! अय् जुजुया घराना, ध्‍यान बियाः न्‍यँ! थ्‍व न्‍यायया फैसला छिमिगु विरोधय् दु। छिपिं मिस्‍पाय् जाः व तबोरय् पानातःगु जाः जूगु दु। 
थुपिं विद्रोहीतय्‌सं यक्‍वसित स्‍याःगु दु। जिं इपिं सकसित अनुशासनय् हये। 
जिं एफ्राइमया बारे फुक्‍कं खँ स्‍यू, इस्राएल जिपाखें सुलाच्‍वंगु मदु। अय् एफ्राइम छं वेश्‍या ज्‍या यानाच्‍वंगु दु। इस्राएलं थःत हे अशुद्ध याःगु दु। 
“इमिगु ज्‍यां इमित थः परमेश्‍वरपाखे लिहां वय्‌केबी मखु। वेश्‍या ज्‍या यायेगु आत्‍मा इमिगु नुगलय् दु, इमिसं परमप्रभुयात मानय् मयाः। 
इस्राएलया तःधंसुं वयागु हे विरोधय् साक्षी बी। इस्राएल व एफ्राइम नं थथःगु पापय् लुफिं हाइ। यहूदा नं इपिंनापं लुफिं हाइ। 
इपिं फै-चोलय् व सा द्वहंया बलिदान ज्‍वनाः परमप्रभुयात माःवनीबलय् इमिसं वय्‌कःयात नापलाके फइ मखु। वय्‌कलं इमित त्‍वःतादिल। 
इपिं परमप्रभुनापं विश्‍वास यायेबहः मजुल। इमिसं मेमेपिंपाखें काय्‌म्‍ह्याय् बुइकल। अले अमइया नखः चखतं इपिं व इमिगु बुँनापं इमित नाश याइ। 
“गिबाय् तुरही व रामाय् नेकू पु। बेथ-आवनय् लडाइँया सः पिका। अय् बेन्‍यामीन, न्‍ह्यलुवाः जु। 
न्‍याय जुइगु दिनय् एफ्राइम झिजांमिजां जुइ। गुगु खँ धात्‍थें जुइ, व इस्राएलया कुलया दथुइ जिं घोषणा याये। 
यहूदाया न्‍हेलुवाःत सिमानाय् च्‍वंगु ल्‍वहं सरय् याइपिं थें जूगु दु। जिं जिगु तं इमिके लः बाः वःगु खुसि थें प्‍वंकाबी। 
एफ्राइमयात क्‍वत्‍यलातःगु दु। न्‍यायलय् वयात न्‍हूत्तुमतु न्‍हूगु दु। व मूर्तिया ल्‍यू वनेत स्‍वःगु दु। 
अथे जुयाः जि एफ्राइमया निंतिं नवंकी थें व यहूदाया घरानाया निंतिं ध्‍वग्‍गीगु सिँ थें जुइ। 
“एफ्राइमं थःगु ल्‍वय् खंबलय् अले यहूदां थःगु घाः खंबलय् एफ्राइमं अश्‍शूरया तःधंम्‍ह जुजुयाथाय् ग्‍वाहालिया निंतिं मनूत छ्वत। अय्‌नं वं छन्‍त लंके फइ मखु, वं छंगु घाःयात लंके फइ मखु। 
छाय्‌धाःसा जि सिंहनं थें इस्राएल व यहूदाया मनूतय्‌त हय्‌काये। इमित कुचा कुचा यानाः जि थःगु लँय् वने, जिं इमित लुया यने, इमित बचय् याइपिं सुं नं दइ मखु। 
इमिसं थःगु पाप स्‍वीकार मयातले जि लिहां वनाः थःगु थासय् च्‍वने, इमिसं जिगु ख्‍वाः स्‍वयेत माला जुइ। इमित दुःखकष्‍ट जुइबलय् इमिसं जितः तसकं माली।” 
