﻿इजकिएल.
45.
“‘छिमिसं इस्राएलया कुल कुलयात सर्बयकथं देश इनाबीबलय् छिमिसं उकिं परमप्रभुया निंतिं १३ किलोमिटर ताहाकःगु व ११ किलोमिटर तब्‍यागु छगू पवित्रथाय् अलग या। व फुक्‍क लागा पवित्र जुइ। 
थ्‍व लागाया २६५ मिटर ताहाकःगु व २६५ मिटर तब्‍यागु छगू ब्‍व पवित्र थाय्‌या निंतिं जुइ। उकिया प्‍यखेरं २७ मिटर तब्‍यागु छगू खुला थाय् दयेमा। 
व हे पवित्र लागाय् १३ किलोमिटर ताहाकःगु व ५.३ किलोमिटर तब्‍यागु छकु थाय् नापे या। अन पवित्रगु थाय् व तच्‍वकं पवित्रगु थाय् दइ। 
थ्‍व थाय् धाःसा पवित्रगु थासय् परमप्रभुया सेवा याइबलय् परमप्रभुया न्‍ह्यःने वइपिं पुजाहारीतय्‌गु निंतिं देशयागु छगू पवित्रगु ब्‍व जुइमा। थ्‍व इमिगु छेँया निंतिं जग्‍गा व पवित्र थाय्‌या निंतिं नं छगू पवित्रगु थाय् जुइ। 
१३ किलोमिटर ताहाकःगु व ५.३ किलोमिटर तब्‍यागु छगू लागा देगलय् सेवा याइपिं लेवीतय्‌गु जुइ। उकी हे इपिं च्‍वनीगु शहरत दइ। 
“‘पवित्र इलाकाया लिक्‍क छिमिसं शहरया लागि २.७ किलोमिटर तब्‍यागु व १३ किलोमिटर ताहाकःगु थाय् ब्‍यु! थ्‍व फुक्‍क इस्राएलीतय्‌गु निंतिं जुइ।’” 
“‘पवित्र इलाका व शहरया फुक्‍क सिथया जमिन धाःसा शासकयागु जुइ। व पच्‍छिमपाखें पच्‍छिमय् हे पुर्बपाखें पुर्बय् हे न्‍यनावंगु जुइ। कुल कुलया भागत मध्‍ये छगू नापनापं जुयाः पच्‍छिम सिमानांनिसें पुर्ब सिमाना तक न्‍यनावंगु वयागु ब्‍व जुइ। 
थ्‍व धाःसा इस्राएलय् वयागु जमिन जुइ। इस्राएलया राजकुमारतय्‌सं जिगु प्रजायात हाकनं गुबलें अत्‍याचार याइ मखु, तर इमिसं इस्राएलया घरानायात इमिगु कुल कुलकथं जग्‍गा जमिन बी।’” 
“‘परमप्रभु परमेश्‍वरं थथे धयादी, हे इस्राएलया शासकत, गात! छिमिसं यक्‍व हे यात। ल्‍वापुख्‍यापु व अत्‍याचार त्‍वःताब्‍यु! खःगु व बांलाःगु ज्‍या जक या! जिगु प्रजायात पितिनाछ्वयेगु ज्‍या बन्‍द या! परमप्रभु परमेश्‍वरं धयादी। 
छिमिसं थिक थिक तौलयागु ताल्‍जु व धः छ्यलेमाः। छिमिगु एपा व बाथ नं पाय्‌छि पाय्‌छि नापयागु जुइमाः। 
गंगु चिज लनीगु “एपा” व छ्वालुगु चिज लनीगु “बाथ” छगू हे नापयागु जुइमाः उपिं नाप “होमेर” कथं थुकथं यायेमाः– “‘१ होमेर = १० एपा = १० बाथ। 
ओजनया तौल थथे जुइमाः २० गेरा = एक शेकेल। ६० शेकेल = एक मीना। 
“‘छिमिसं थःगु भेटी थुकथं छायेगु या – छ्वःया छगू एपाया खुब्‍वय् छब्‍व तछ्वःया छगू एपाया खुब्‍वय् छब्‍व 
जैतूनया चिकंया १/१०० भाग। (बाथया ल्‍याखं लनिबलय् थथे जुइ – झिगू बाथ = छगू होमेर = छगू कोर।) 
“‘फै इस्राएलया ख्‍यःयापिं निसःम्‍ह फैपाखें छम्‍ह। “‘छिमिसं अन्‍नबलि, होमबलि व मेलबलिया निंतिं पशुत अन्‍न व चिकं हइ, अले व छिमिगु निंतिं प्रायश्‍चित जुइ, परमप्रभु परमेश्‍वरं धयादी। 
इस्राएलया शासकयात देशयापिं फुक्‍क मनूतय्‌सं थ्‍व कोस्‍यालि बीमाः। 
थीथी नखःचखः, अमइया नखः, विश्रामबारत व इस्राएलया घरानाया फुक्‍क क्‍वछिनातःगु नखःचखःबलय् छायेत होमबलि, अन्‍नबलि व त्‍वँसाबलि तयार यायेगु ज्‍या शासकयागु हे जुइ। इस्राएलया घरानाया निंतिं प्रायश्‍चित यायेत माःगु शुद्ध जुइगु बलि, अन्‍नबलि, होमबलि व मेलबलि वं हे तयार यानाबीमाः। 
“‘परमप्रभु परमेश्‍वरं थथे धयादी – न्‍हापांगु लाया न्‍हापांगु दिनय् छिमिसं छम्‍ह खू मदुम्‍ह द्वहंचा कयाः पवित्र थाय्‌यात शुद्ध यायेगु या। 
पुजाहारीं शुद्ध जुइगु बलिया भचा हि कयाः देगःया लुखाया चौकोस, वेदीया च्‍वय्‌यागु चाकःया पेगुलिं कुन्‍चाय् कुन्‍चाय् व दुनेया चुकया लुखाया थां थामय् तयेमाः। 
सुनानं बिचाः मयासें अथवा मसीकं मचायेकं पाप याःगु दुसा, लाया न्‍हय्‌न्‍हु दुखुन्‍हु छिमिसं अथे हे यायेगु या। थुकथं देगःया निंतिं छिमिसं प्रायश्‍चित यायेगु या। 
“‘न्‍हापांगु लायागु झिंप्‍यन्‍हु दुखुन्‍हु छिमिसं न्‍हय्‌न्‍हु तक छुत्‍काराया नखः हनेमाः। थुबलय् छिपिं सकसिनं सोडा मतःगु मरि जक नयेगु यायेमाः। 
उखुन्‍हु राजकुमारं थःगु निंतिं व देशयापिं फुक्‍क मनूतय्‌गु निंतिं शुद्ध जुइगु बलिया निंतिं छम्‍ह द्वहं बीमाः। 
थ्‍व नखःया न्‍हय्‌न्‍हु तक परमप्रभुया निंतिं होमबलिया निंतिं न्‍हियान्‍हिथं वं न्‍हय्‌म्‍ह खू मदुपिं द्वहं व न्‍हय्‌म्‍ह खू मदुपिं भ्‍याःचा अले शुद्ध जुइगु बलिया निंतिं न्‍हियान्‍हिथं छम्‍ह छम्‍ह दुगुचा छायेमाः। 
छम्‍ह छम्‍ह द्वहं व भ्‍याःचानापं वं छगू एपा अन्‍नबलिकथं छ्वचुं छायेमाः, छगू छगू एपा नापं छगू हीन चिकं छायेमाः। 
“‘न्‍हय्‌गूगु लाया झिंन्‍यान्‍हु दुखुन्‍हुंनिसें कयाः न्‍हय्‌न्‍हु तक वं शुद्ध जुइगु बलि, होमबलि, अन्‍नबलि व चिकं थुकथं हे तयार यायेगु यायेमाः।’” 
