﻿इजकिएल.
42.
हाकनं वं जितः उत्तरपाखें चाहीकाः पिनेया चुकय् हल। अले देगःया चुक व देगःया उत्तर पाखेयागु पिनेया अंगःया चुलिंचू दुगु क्‍वथाय् हल। 
उत्तरपाखे स्‍वःगु लुखा दुगु छेँ ५३ मिटर ताहाकः अले उकिया ब्‍या २७ मिटर दु। 
व छेँया छखेपाखे दुनेया चुकया १० मिटर ब्‍या दुगु चक्‍कंगु थाय् दु। मेखेपाखे पिनेया चुकया पेटी दु। थ्‍व छेँ स्‍वंगू तल्‍ला दु अले स्‍वंगू हे तल्‍लाय् बार्दली दु। 
क्‍वथातय्‌गु न्‍ह्यःने ५.३ मिटर ब्‍या दुगु व ५३ मिटर ताहाकःगु दुहां पिहां जुइगु लँ दु। उकिया फुक्‍क लुखात उत्तरपाखे स्‍वःगु दु। 
च्‍वय्‌यागु क्‍वथात चिकु। बार्दलीत दुगुलिं उपिं क्‍वथात छेँया दथुइया व क्‍वय्‌यागु तल्‍लाया क्‍वथात स्‍वयाः चिकु। 
स्‍वंगू तल्‍लाय् दुगु क्‍वथा क्‍वथाय् चुकय् दुगु थें थांत मदु, उकिं क्‍वय्‌यागु व दथुइयागु तल्‍लायागु क्‍वथात स्‍वयाः उपिं च्‍वय्‌यागु क्‍वथात चिकु। 
क्‍वथात व पिनेया चुकनापं वनाच्‍वंगु अन छगू पिनेया अंगः दु। व क्‍वथातय्‌गु न्‍ह्यःनं २७ मिटर तक वंगु दु। 
पिनेया चुकया लिक्‍क लिक्‍क च्‍वंगु क्‍वथाया हाकः २७ मिटर दु, पवित्र थाय्‌या लिक्‍कया क्‍वथातय् हाकः धाःसा ५३ मिटर दु। 
थुपिं क्‍वथाया क्‍वय् क्‍वय् पिनेया चुकय् पिहां वनेत पुर्बपाखे छगू लुखा दु। 
देगःया दच्‍छिनपाखे पिनेया चुकया पःखाः जाय्‌क, देगःया चुकया लिक्‍क व पिनेया अंगःया अःखः दुगु क्‍वथात दु। 
उकिया न्‍ह्यःने छपु वनेगु लँपु दु। थुपिं क्‍वथात उत्तरयागु क्‍वथात थें च्‍वं, उमिगु पिने वनीगु लुखात फुक्‍क कथंयागु, व उत्तरयागु क्‍वथात थें उमिगु हाकः व ब्‍या छगू हे नापयागु खः। उत्तरयागु लुखात थें, 
दच्‍छिनयागु क्‍वथातय्‌गु लुखात नं अथे हे च्‍वं। क्‍वथाय् दुहां वनेगु मेगु छगू लुखा दु। थ्‍व लुखा पुर्बपाखे वंगु पःखाःया नापनापं वनाच्‍वंगु लँया दुहां वनेथाय् लाः। 
अले वं जितः धाल, “देगःया चुकपाखे स्‍वःगु उत्तर व दच्‍छिनयागु क्‍वथात धाःसा पुजाहारीया क्‍वथात खः, अन मनूतय्‌सं छाःगु दकलय् पवित्र भेटीत परमप्रभुया न्‍ह्यःने वनीपिं पुजाहारीतय्‌सं नयेगु याइ। अन इमिसं दकलय् पवित्र भेटीत, अन्‍नबलि, शुद्ध जुइगु बलि व दोषबलि तइ, छाय्‌धाःसा व थाय् पवित्र खः। 
पुजाहारीत पवित्र थासय् दुहां वनीबलय् इपिं उगु पवित्र थासं पिनेया चुकय् पिहां मवनेमा, तर गुगु वसः फिनाः इमिसं सेवा याइ, उपिं वसः इमिसं अन हे त्‍वःताः तयेमाः, छाय्‌धाःसा उपिं पवित्र खः। मनूत मुनीगु थासय् इपिं वने न्‍ह्यः इमिसं मेगु हे वसः फीमाः।” 
वं देगः दुनेया लागा नापे याये धुंकाः, वं जितः पुर्बयागु मू ध्‍वाखां पिने हल। अले देगःया पिनेया लागा नापे यात। 
वं उगु नापे याइगु कथिं पुर्बयागु भागयात नापे यात। व २६५ मिटर दु। 
वं उत्तरया भाग नापे यात। व नं २६५ मिटर दु। 
वं दच्‍छिनया भाग नापे यात। व नं २६५ मिटर दु। 
अले वं फस्‍वयाः पच्‍छिम भागय् वनाः व भाग नापे यात। व नं २६५ मिटर दु। 
थुकथं वं व थाय्‌या प्‍यखें पाखेया सिमाना नापे यात। उकिया छचाःखेरं पवित्र थाय्‌यात साधारण थासं अलग यायेत छगू पःखाः दु। व २६५ मिटर ताहाकः अले २६५ मिटर तब्‍या। 
