﻿इजकिएल.
32.
झिंनिगूगु दँया झिंनिगूगु लाया न्‍हापांगु दिनय् परमप्रभुयागु थ्‍व वचन जिथाय् वल, 
“अय् सीमानिम्‍ह मनू, मिश्र देशयाम्‍ह जुजु फारोया बिलापया म्‍ये दय्‌काः वयात धा, “‘जाति जातित मध्‍ये छ सिंह थें खः। छ थःगु खुसिचाय् कय्‌कीम्‍ह, लःयात थःगु तुतिं संकाः फोहर यानाबीम्‍ह तःधिकःम्‍ह समुद्रया जन्‍तु खः। 
“‘परमप्रभु परमेश्‍वरं थथे धयादी, “‘जिं छन्‍त जिगु जालय् क्‍यंकेत यक्‍व मनूत छ्वयाहये, इमिसं छन्‍त जिगु जालय् साली। 
अबलय् जिं छन्‍त जमिनय् त्‍वःताबी। जिं छन्‍त मैदानय् वान्‍छ्वयाः आकाशयापिं फुक्‍क कथंयापिं झंगःपन्छितय्‌त छंगु च्‍वय् च्‍वनेबी। पृथ्‍वीयापिं फुक्‍क पशुतय्‌त छंगु ला नकेबी। 
पहाड पहाडय् जिं छंगु ला ह्वलाबी। छंगु सीम्‍हं ब्‍यासिइ जाइ। 
छपाखें बाः वःगु हिं जिं पहाड पहाडय् तक जमिन प्‍याकाबी, न्‍हसिकापत छंगु लां जाइ। 
जिं छंगु नां तक नं मदय्‌काः छ्वय्‌बलय् जिं आकाशयात त्‍वपुयाबी, उकिया नगुतय्‌त खिउँकाबी। जिं सूर्ययात सुपाँचं त्‍वपुयाबी, तिमिलां जः बी मखु। 
आकाशया फुक्‍क थीगु जःतय्‌त जिं छंगु कारणं खिउँकाबी। छंगु देशय् जिं खिउँ हयाबी। 
जाति जातितय्‌थाय् छं म्‍हमस्‍यूगु देशय् जिं छंगु नाशया खबर हयेबलय्, जिं यक्‍व मनूतय्‌गु मन थातय् मलाकाबी। 
जिं यक्‍व मनूतय्‌त छ खनाः वातां यानाबी। इमि जुजुपिनि न्‍ह्यःने जिं जिगु तरवार संकेबलय् उपिं जुजुपिं थुरथुर खाइ। छंगु पतनया दिनय् इपिं छम्‍ह छम्‍ह थथःगु जीवनया लागिं थुरथुर खाइ। 
“‘छाय्‌धाःसा परमप्रभु परमेश्‍वरं थथे धयादी, “‘बेबिलोनयाम्‍ह जुजुया तरवार छंगु विरोधय् वइ। 
जिं छंगु फुक्‍क सेनायात बहादुर सिपाइँतय्‌गु तरवारपाखें पतन यानाबी। इपिं मनूत मध्‍ये दकलय् दयामदुपिं खः। इमिसं मिश्र देशया घमण्‍डयात चुंचुं यानाबी। वया फुक्‍क सेना नाश जुइ। 
खुसि खुसिया सिथं वयाः फुक्‍क सा द्वहंतय्‌त जिं नाश यानाबी। अनंलि उपिं खुसितय्‌त न मनूतय्‌गु तुतिं फोहर याइ न पशुतय्‌गु ख्‍वलं फोहर याइ। 
अनंलि जिं उकिया लःयात यचुकाबी, उकिया खुसित चिकं थें सलल न्‍ह्याइ, 
जिं मिश्र देशयात उजाड यायेबलय्, उगु देशय् दुगु फुक्‍क नाश जुइबलय्, जिं अन च्‍वंपिं सकसितं स्‍यायेबलय्, इमिसं जि हे परमप्रभु खः धकाः सी।’ 
“मनूतय्‌सं बिलाप यायेत बिलापया म्‍ये थ्‍व हे खः। जाति जातिया म्‍ह्याय्‌पिन्‍सं थ्‍व हाली, छाय्‌धाःसा मिश्र देश व वया फुक्‍क सेनाया निंतिं इमिसं थ्‍व हे बिलापया म्‍ये हाली, जि, परमप्रभु परमेश्‍वर न्‍ववानागु दु।” 
झिंनिगूगु दँया न्‍हापांगु लाया झिंन्‍यान्‍हु दुखुन्‍हु परमप्रभुयागु थ्‍व वचन जिथाय् वल, 
“अय् सीमानिम्‍ह मनू, मिश्र देशया सेनाया लागिं ख्‍वः, वयात व बबल्‍लाःगु जातिया म्‍ह्याय्‌पिन्‍त पातालय् लानाच्‍वंपिं मनूतय्‌थाय् पृथ्‍वीया क्‍वय्‌पाखे क्‍वका! 
इमित धा, ‘छु छं थःत मेपिं फुक्‍क स्‍वयाः बांलाः धकाः च्‍वनागु ला? पातालय् हुँ अले अन खतना मजूपिंनापं लानाच्‍वँ।’ 
इपिं तरवारं स्‍याःपिनिगु दथुइ क्‍वःदली। व देशयात तरवारया निंतिं हे लःल्‍हाःगु दु। अथे जुयाः मिश्रयात वया फुक्‍क फौजनापं सालायंकी! 
पातालय् वीर कप्‍तानतय्‌सं फारो व वया ग्‍वाहालिमिपिन्‍त थथे धाइ, ‘इपिं क्‍वय् वःगु दु, इपिं तरवारं स्‍याःपिंनापं व खतना मजूपिंनापं लानाच्‍वंगु दु।’ 
“अश्‍शूर देश, वया फुक्‍क सेनानापं अन दु, वयागु चिहान वयागु प्‍यखें दु, फुक्‍कसित तरवारं स्‍याये धुंकूगु दु। 
इमि चिहानत पातालया तज्‍जाःथाय्‌या दुने दु। वया सेना वयागु हे चिहानया प्‍यखेरं दु। म्‍वाःपिनिगु देशय् ख्‍याना जुइपिं सकसितं स्‍याये धुंकल, तरवारं इमित ग्‍वतुइका ब्‍यूगु दु। 
“एलाम अन दु! वयागु चिहानया प्‍यखेरं वया सेना दु! थुपिं सकलें तरवारं पाला स्‍याःपिं खः। म्‍वाःपिनिगु देशय् ख्‍याना जुइपिं सकलें पृथ्‍वीया क्‍वय् खतना मजुइकं वन। पातालय् वंपिंनापं हे इमिसं बेइज्‍जत फयाच्‍वंगु दु। 
वयागु चिहानया प्‍यखेरं वया सेनानापं स्‍याःपिनिगु दथुइ वयागु निंतिं छगू आराम यायेगुथाय् दय्‌कातःगु दु। इपिं सकलें तरवारं स्‍याःपिं म्‍हय् चिं मतःपिं खः। म्‍वाःपिनिगु देशय् इमिसं ख्‍याना जूगुलिं क्‍वय् पातालय् वंपिंनापं हे इमिसं बेइज्‍जत फयाच्‍वंगु दु। 
“मेशेक व तूबल नं अन दु। इमि चिहानया प्‍यखेरं इमि फुक्‍क सेना दु। इपिं सकलें खतना मजूपिं खः। इपिं सकसिनं म्‍वाःपिनिगु देशय् ख्‍याना जूगुलिं इपिं फुक्‍कसित तरवारं स्‍याःगु खः। 
इपिं मेपिं बहादुर सिपाइँतनापं लानाच्‍वनी, गुपिं सिपाइँत ग्‍वतूगु दु, गुपिं थथःगु लडाइँया हतियारनापं चिहानय् वंगु दु, गुपिन्‍सं तरवार थथःगु छ्यंया क्‍वय् तःगु दु। इपिं सिपाइँतय्‌सं म्‍वाःपिनिगु देशय् ख्‍याना जूगुलिं इमिगु पापया सजाँय इमिगु हे क्‍वँचय् लाःगु दु। 
“हे फारो, छ नं कुचा कुचा जुयाः तरवारं स्‍याःपिं खतना मजूपिनिगु दथुइ लानाच्‍वनी। 
“एदोम व वया जुजुपिं अले सकलें शासकत अन दु। इमिके शक्ति दुसां तबि इमित तरवारं स्‍याःपिंनापं तयातःगु दु। इपिं क्‍वय् पातालय् वनीपिंनापं, खतना मजूपिंनापं लानाच्‍वंगु दु। 
“उत्तरयापिं फुक्‍क शासकत व फुक्‍कं सीदोनीत अन दु। इमिगु शक्तिं ग्‍यासु थंगु जूसां इपिं स्‍याःपिंनापं हे बेइज्‍जत जुयाः चिहानय् वंगु दु। इपिं म्‍हय् चिं मतय्‌कं तरवारं स्‍याःपिंनापं लानाच्‍वंगु दु। पातालय् वनीपिंलिसें इमिगु नं बेइज्‍जत जूगु दु। 
“फारो व वया फुक्‍क सेनां इमित खनी, अले थःगु सेना नाश जूगुलिं वयात सान्‍त्‍वना दइ। जि, परमप्रभु परमेश्‍वर न्‍ववानागु दु। 
म्‍वाःपिं मनूत च्‍वनीगु थासय् जिं वयात ग्‍यासु थंके बियागु जूसां, व थः फौजलिसें तरवारं स्‍याःपिं म्‍हय् चिं मतःपिंनापं लानाच्‍वनी। परमप्रभु परमेश्‍वरं धयादी।” 
