﻿इजकिएल.
31.
झिंछगूगु दँया स्‍वंगूगु लाया न्‍हापांगु दिनय् परमप्रभुयागु थ्‍व वचन जिथाय् वल, 
“अय् सीमानिम्‍ह मनू, मिश्र देशयाम्‍ह जुजु व वया सेनायात थथे धा, “‘छंगु वैभवय् छ थें जाःम्‍ह सु दु? 
अश्‍शूर देशयात स्‍व, छगू इलय् व लेबनानया देवदारु खः, उकिया बांबांलाःगु कचां गुँयात किचः बियातःगु खः, उकिया च्‍वकात सुपाँय् दुथाय् तक थ्‍यनिगु खः। 
लखं उकियात सय्‌कल, बुंगाःचां उकियात तज्‍जाः यात। उकिया जःखः च्‍वंगु खुसिचां उकियात प्‍याकाबिल, उकिया खुसिं ख्‍यलय् च्‍वंगु फुक्‍क सिमायात प्‍याकल। 
थुकथं ख्‍यलय् च्‍वंगु फुक्‍क सिमात मध्‍ये व दकलय् तज्‍जाःगु सिमा जुल। लः यक्‍व दुगुलिं उकिया यक्‍व कचामचा दत, उपिं तःमा जुयाः न्‍यनावन। 
उकिया कचामचाय् आकाशयापिं फुक्‍क झंगःपन्छितय्‌सं थःगु स्‍वँ दय्‌कल। उकिया कचाया क्‍वय् गुँयापिं फुक्‍क पशुतय्‌सं थः मस्‍त बुइकल। उकिया किचलय् फुक्‍क ततःधंगु जातित च्‍वंवल। 
न्‍यनावंगु ताहाकःगु कचा दुगु व छगू बांलाःगु सिमा खः, छाय्‌धाःसा उकिया हा यक्‍व लः दुगु थाय्‌या लिक्‍क दु। 
परमेश्‍वरयागु क्‍यबया देवदारुया सिमा स्‍वयाः थ्‍व सिमा तसकं बांलाः। थकुराःमा उकिया कचा ति मग्‍यं, न चिनारया सिमात उकिया कचामचा ति ग्‍यं। परमेश्‍वरयागु क्‍यबया छुं नं सिमा व ति बांलाः मजू। 
जिं यक्‍व कचामचां उकियात बांलाकागु खः, उकिं परमेश्‍वरया क्‍यबय् अदनया फुक्‍क सिमात व खनाः नुगः मुइकीगु। 
“‘उकिं परमप्रभु परमेश्‍वरं थथे धयादी – व उलि तज्‍जाःगुलिं अले उकिया च्‍वकात सुपाँय् दुथाय् तक थ्‍यंगुलिं वया नुगः तःधं छुल। 
उकिं जिं वयात जातित मध्‍ये छगू बल्‍लाःगु जातितय् शासकया ल्‍हातय् बियागु दु। वं धात्‍थें हे वलिसें बांमलाःगु व्‍यवहार याइ। वं याःगु मभिंगु ज्‍याया कारणं जिं वयात पितिनाछ्वयागु दु। 
अले दकलय् ग्‍यानापुपिं विदेशी जातितय्‌सं वयात पालाः त्‍वःताबिल। उकिया कचामचा पहाडत व फुक्‍क ब्‍यासिइ क्‍वःदल। उकिया कचात त्‍वदुलाः देशयागु फुक्‍क खुसिचाय् लानाच्‍वन। पृथ्‍वीया फुक्‍क जातित उकिया किचलं पिहां वल, अले उकियात त्‍वःताबिल। 
क्‍वःदगु व सिमाय् आकाशयापिं फुक्‍क झंगःपन्छित च्‍वन, उकिया कचाया दथुइ गुँयापिं पशुत दु। 
आवंलि मेमेगु सिमा न्‍ह्याक्‍व हे लः दुसां व सिमा थें तज्‍जाः जुइ मखु वा सुपाँय् दुथाय् तक थाहां वइ मखु अले उलि तज्‍जाः गुबलें जुइ फइ मखु। व फुक्‍क सिनावनीपिं मनूत थें नाश जुल अले पातालय् थ्‍यनी। 
“‘परमप्रभु परमेश्‍वरं थथे धयादी – गुखुन्‍हु उकियात पातालय् यंकल, उखुन्‍हु वयागु लागि नुगः मछिंकेत तज्‍जाःगु बुँगाःचा जिं त्‍वपुयाबिया। जिं उकिया खुसिचात पनाबिया। उकिया यक्‍व लः वयेगु दित। उकिया लागि जिं लेबनानयात खिउँकाबिया, उकिं यानाः ख्‍यलय् दुगु फुक्‍क सिमा सुकुगना वन। 
जिं तःमागु सिमायात पातालय् वनीपिंनापं चिहानय् कुर्काबियाबलय् व ग्‍वतूगु सलं जाति जातितय्‌त थरथर खाकाबिया। अबलय् अदनया फुक्‍क सिमात, लेवनानयागु दकलय् बांलाःगु व भिंगु सिमात, यक्‍व लः काःगु सिमातय्‌त पृथ्‍वीया क्‍वय् सान्‍त्‍वना दत। 
वयागु किचलय् च्‍वनाच्‍वंपिं अर्थात देशत मध्‍ये वनापं मिलय् जूपिं नं तरवारं स्‍याःपिंनापं पातालय् मिलय् जू वनी। 
“‘अय् मिश्र, छंगु महिमा व वैभवय् अदनया सिमात मध्‍ये छन्‍त गुगु सिमानापं ज्‍वःलाकाः स्‍वय्‌गु? अय्‌नं छन्‍त नं अदनया सिमातनापं क्‍वय् पातालय् कुर्काबी। अले छ म्‍हय् चिं मतःपिनिगु दथुइ तरवारं स्‍याःपिंनापं लानाच्‍वनी। “‘थ्‍व धाःसा फारो व वया फुक्‍क सिपाइँतय् पुचः खः, परमप्रभु परमेश्‍वरं थथे धयादी।’” 
