﻿इजकिएल.
27.
परमप्रभुया वचन जिथाय् वल, 
“अय् सीमानिम्‍ह मनू, टुरोस शहरया बारे बिलाप या। 
समुद्रया मू ध्‍वाखाय् दुगु, समुद्रया सिथय् च्‍वनीपिं यक्‍व मनूतय्‌सं व्‍यापार याइगु टुरोस शहरयात धा, ‘परमप्रभु परमेश्‍वरं थथे धयादी, “‘अय् टुरोस, छं धाःगु दु, “जि तसकं बांलाःम्‍ह खः।” 
छंगु सिमाना समुद्र तक थ्‍यंगु दु, छन्‍त दय्‌कूपिन्‍सं छन्‍त बांलाःगु जहाज थें दय्‌कूगु दु। 
इमिसं छंगु फुक्‍क सिँपौत सेनीरया सल्‍लाया सिँ व पाल खायेत धंकातःगु थां लेबनानया देवदारुया सिँ दय्‌कल। 
इमिसं बाशानया स्‍वसिमां छंगु चतंत दय्‌कल। साइप्रसया समुद्रया सिथं हःगु धूपीया सिँ जहाजया बँ दय्‌कल, अले उकियात किसिया दंनं बांलाकल। 
छंगु जहाजया पाल मिश्र देशं हःगु भिंगु बुत्ता दुगु सूती कापःयागु खः। उकिं हे छंगु झण्‍डाया ज्‍या बिल। छंगु पाल एलीसाहया समुद्र सिथयागु वँचुगु व प्‍याजीगु रंगया कापतं दय्‌कातःगु दु। 
छंगु चतंत संकीपिं सीदोन व अर्वादय् च्‍वनीपिं खः। अय् टुरोस, छं बुद्धि दुपिं मनूत छंगु जहाज चले याइपिं खः। 
गबालयापिं पुलांपिं व बुद्धि दुपिं कारिगरत छनापं जहाजय् दु। उपिं हे जहाजया प्‍वाःत तिनाबीपिं छिमि मनूत खः। छन्‍थाय् व्‍यापार यायेत जहाज चले याइपिं मनूतनापं समुद्रया फुक्‍क जहाज छन्‍थाय् वइगु। 
“‘फारस, लूद व पूतयापिं मनूतय्‌सं छंगु सेनाय् सिपाइँया ज्‍या याइगु, इमिसं थथःगु ढाल व टोप छंगु पखालय् यख्‍खाना छंगु गौरव थकाइगु। 
अर्वाद व हेलेकयापिं मनूत छंगु प्‍यखेरं पखालय् दु। गमादयापिं मनूत छंगु धरहराय् दु। इमिसं थथःगु ढाल छंगु प्‍यखेरं पखालय् यख्‍खाइगु। इमिसं छन्‍त यक्‍व बांलाकीगु। 
“‘छंके यक्‍व मालसामान दुगुलिं तर्शीशं छनापं व्‍यापार यात। इमिसं वहः, नँ, टिन व म्‍हः बियाः छंगु मालसामान न्‍यात। 
“‘ग्रीस, तूबल व मेशेकयापिं मनूतय्‌सं छलिसें व्‍यापार यात। इमिसं थः दास दासी व कँय्‌या थलबलत छंगु मालतालनापं हिल। 
“‘छंगु मालताल कयाः बेथ-तोगर्मायापिं मनूतय्‌सं मालताल क्‍वबीपिं सल, लडाइँया सल व खच्‍चरत बिल। 
“‘रोडसयापिं मनूतय्‌सं छलिसें व्‍यापार यात, समुद्र सिथय्‌या यक्‍व देशत छंगु गाहाकि जुल। इमिसं किसिया दं व अब्‍नुसया सिँ बियाः छंगु मू पुलीगु। 
“‘छं यक्‍व मालताल दय्‌कूगुलिं आरामं छलिसें व्‍यापार यात। छंगु मालतालया पलेसा इमिसं छन्‍त फिरोजा थी, प्‍याजीगु रंगयागु थानातःगु वसः व बुत्ता दुगु कापः, मलमलया कापः, मूगा-मोती व माणिक्‍य बिल। 
“‘यहूदा व इस्राएलं छलिसें व्‍यापार यात। छंगु मालतालया पलेसा इमिसं छन्‍त मिन्‍नीतयागु छ्व अले मरि, कस्‍ति, चिकं व मलम बिल। 
“‘छंके फुक्‍क कथंया मालताल व यक्‍व धनसम्‍पत्ति दुगुलिं दमस्‍कसं छलिसें व्‍यापार यात। इमिसं छंगु मालताल कयाः हेलबोनया दाखमद्य व जाहारया तँय 
अले ऊजालया दाखमद्यया ड्रमत बीगु। व इमिसं छंगु मालताल कयाः रंग पानातःगु नँ, तेजपात व नस्‍वाःगु घाँय् बिइगु। 
“‘दनानं छलिसें सलया काथिइ लाइगु कापः बियाः व्‍यापार याइगु। 
“‘अरब व केदारयापिं फुक्‍क शासकत छंगु गाहाकि खः। इमिसं छलिसें चीधिकःपिं भ्‍याःचात, भ्‍याःचात व दुगुत हयाः व्‍यापार याइगु। 
“‘शेबा व रामाहया व्‍यापारीतय्‌सं छलिसें व्‍यापार याइगु। इमिसं छंगु मालतालया पलेसा फुक्‍क कथंया भिंगु भिंगु मसला, फुक्‍क कथंया मू वंगु रत्‍नत व लुँ बिइगु। 
“‘हारान, कन्‍नेह व अदन, अले शेबा, अश्‍शूर व किल्‍मदया व्‍यापारीतय्‌सं छलिसें व्‍यापार याइगु। 
छंगु बजारय् बांबांलाःगु वसः, वँचुगु कां दय्‌कातःगु वसः, बुत्ता दुगु कापः, थूतुलातःगु थीथी कथंया रंगयागु गलैँचात, थुपिं मालतालयागु इमिसं छलिसें व्‍यापार याइगु। 
“‘तर्शीशया जहाजत छंगु व्‍यापार याइगु सेवकत थें खः। छ समुद्रया दथुइ झ्‍यातुगु झ्‍यातुगु मालतालं जाःगु जहाज थें च्‍वं।’” 
“‘छिमि जहाज चले याइपिन्‍सं छन्‍त वाफय् वयाच्‍वंगु समुद्रय् यंकी, तर पुर्बयागु फसं छन्‍त समुद्रया दथुइ हे नाश याइ। 
छंगु धनसम्‍पत्ति, छंगु व्‍यापारया मालताल, छंगु फुक्‍क माझीत व फुक्‍क जहाज चले याइपिं, जहाजया प्‍वाः तिनाबीपिं, छिमि व्‍यापारीत, जहाजयापिं फुक्‍क सिपाइँत व जहाजय् दुपिं छंगु जहाज स्‍यंगु दिनय् मेपिं सकलें समुद्रय् हे दुबय् जुइ। 
छिमि जाहाज चले याइपिनिगु चिल्‍लाय् दंगु सलं समुद्रया सिथय् च्‍वंगु थाय् खाइ। 
मेमेगु जहाज चले याइपिं सकसिनं थथःगु जहाजयात त्‍वःताबी। माझीत व जहाज चले याइपिं सकलें समुद्रया सिथय् दनी। 
छंगु निंतिं तःसलं हालाः इपिं ह्वाँय्‌ह्वाँय् ख्‍वइ। इमिसं थःगु छेनय् धू ह्वली अले नउलय्‌ ग्‍वारा ग्‍वारातुली। 
छं यानाः इमिसं थःगु सँ खाइ, अले इमिसं भांग्रा फी, अले छंगु निंतिं मनय् पीर कयाः इपिं ह्वाँय्‌ह्वाँय् ख्‍वइ। 
छंगु निंतिं बिलाप व दुखं च्‍वनाच्‍वंबलय्, इमिसं छंगु बारे थथे धकाः बिलापया म्‍ये हाली, “समुद्रं घेरय् यानातःगु टुरोस थें सु गुबलें सुम्‍क च्‍वंगु दु?” 
समुद्रय् छंगु मालताल वनीबलय् छं यक्‍व जातितय्‌त लुधंकी। छंगु यक्‍व धनसम्‍पत्ति व मालतालं छं पृथ्‍वीयापिं जुजुपिन्‍त तःमि यात। 
आः लःया तःजाःगु थासय् समुद्रं हे छन्‍त नाश याःगु दु। छंगु फुक्‍क मालताल व ज्‍या याइपिं सकलें छनापं तुं दुबय् जूगु दु। 
समुद्र सिथय् च्‍वंपिं सकलें छ खनाः वातां जूगु दु। इमि जुजुपिं तसकं ग्‍यानाः थरथर खाःगु दु, इमिगु ख्‍वाःपाः कय्‌कूंगु दु। 
जाति जातियापिं व्‍यापारीतय्‌सं छन्‍त हेस्‍याइगु, छ हाकनं गुबलें दइ मखुत, आः छंगु ग्‍यानापुक नाश जुइन।’” 
