﻿इजकिएल.
19.
“इस्राएलया शासकतय्‌गु बारे छं थ्‍व बिलापया म्‍ये न्‍यंकि, 
अले थथे धा, “‘छिमि मां छु खः? व सिंहतय्‌गु दथुइ दुम्‍ह छम्‍ह मिसाम्‍ह सिंह खः। ल्‍याय्‌म्‍हपिं सिंहतय्‌गु दथुइ ग्‍वारातुलाः वं थः मस्‍तय्‌त लहित। 
उपिं मस्‍त सिंहत मध्‍ये छम्‍हय्‌सित वं लहिनाः तःधिकः यात, अले व छम्‍ह बल्‍लाःम्‍ह सिंह जुल। वं शिकार यायेगु सय्‌कल अले मनूत नल। 
जाति जातियापिं मनूतय्‌सं वयागु बारे न्‍यन। इमिसं गाः म्‍हुल, अले व उकी लात। इमिसं वयात हुकं लुयायंकाः मिश्र देशय् यंकल। 
“‘वं थःम्‍हं आशा यानागु पूमवंगु खनाः थः मस्‍त मध्‍ये मेम्‍ह छम्‍हसित काल, अले वयात छम्‍ह बल्‍लाःम्‍ह सिंह दय्‌कल। 
व सिंहतय्‌गु दथुइ थुखे उखे वये वने याना जुल। छाय्‌धाःसा व आः छम्‍ह बल्‍लाःम्‍ह सिंह जुइ धुंकल। वं शिकार यायेगु सय्‌कल, वं मनूत नल। 
वं इमिगु किल्‍लात स्‍यंकाबिल, इमिगु शहरत तहसनहस यानाबिल। व थ्‍वय्‌क हाःगु सलं देश व अन दुपिं सकलें ग्‍यात। 
अले प्‍यखें च्‍वंगु जाति जातियापिं मनूत थथःगु लागां वलिसें लडाइँ यायेत वल, इमिसं वयात ज्‍वनेत जाः ह्वल, अले व इमिगु गालय् लात। 
इमिसं वयात हुकं पन्‍जलय् तयाः बेबिलोनयाम्‍ह जुजुयाथाय् हल। इस्राएलया डाँडा डाँडाय् वयागु सः गुबलें ताये मदय्‌मा धकाः इमिसं वयात कुनातल। 
“‘छिमि मां लःया लिक्‍क पिनातःगु छंगु दाखक्‍यबया दाखया मा थें खः, गुगु यक्‍व लः दुगुलिं फल व कचां जाःगु दु। 
शासकतय्‌गु राजदण्‍ड दय्‌केत उकी बल्‍लाःगु कचात दु। ख्‍वातुगु कचातय्‌गु दथुइ व तज्‍जाः जुयाः थाहां वल। उकिया कचात यक्‍व दु। व तज्‍जाः खने दु। 
तर तंम्‍वय् उकियात लिनाकाल। उकियात बँय् वांछ्वयाबिल। पुर्बयागु क्‍वाःगु फसं उकियात गंकाबिल, उकिया फुक्‍क फल कुतुंवन। उकियागु बल्‍लाःगु कचात फुक्‍क गन, मिं उपिं भस्‍म जुल। 
आः उकियात मरुभूमिइ पिल, गंगु व लः मदुगु थासय्। 
उकिया मू कचात मध्‍ये छपु कचां मि पिहां वल, अले उकिं उकिया फलत व कचात भस्‍म यानाबिल। आः उकी शासकया राजदण्‍ड यायेत ज्‍यूगु छपु नं कचा मन्‍त।’ “थ्‍व छपु बिलापया म्‍ये खः अले मनूतय्‌सं इपिं गुलि दुःखी जूगु खः धकाः क्‍यनेत थ्‍व म्‍ये हालाच्‍वनी।” 
