﻿इजकिएल.
18.
परमप्रभुयागु थ्‍व वचन जिथाय् वल, 
“इस्राएल देशया बारे धाःगु थ्‍व उखान हाकनं दोहरय् याःगुया अर्थ छु खः “‘पाउँसे च्‍वंगु दाख मांबौनं नल, वा तुन काय् म्‍ह्याय्‌पिनिगु’? 
“गथे जि धात्‍थें म्‍वाःम्‍ह खः, परमप्रभु परमेश्‍वरं धयादी, छिमिसं थ्‍व उखान इस्राएलय् हाकनं गुबलें धाये खनी मखु। 
छाय्‌धाःसा फुक्‍क प्राण जिगु हे खः। गथे बौया प्राण अथे हे काय्‌या प्राण नं जिगु खः। सुनां पाप याइ, व हे सी। 
“धाये कि, छम्‍ह मनू न्‍याय व खःगु ज्‍या याइम्‍ह धर्मीम्‍ह खः, 
वं डाँडाय् दुगु पुजा याइगु थासय् नःगु मदु, अथवा इस्राएलया घरानाया मूर्तितपाखे स्‍वःगु मदु। वं थः जःलाखःलाया कलाःयात स्‍यंकूगु मदु व थीमज्‍यू जुयाच्‍वंम्‍ह मिसानापं द्यंगु मदु। 
वं सुयातं क्‍वत्‍यली मखु तर त्‍यासा काःम्‍हय्‌सित वयागु बर लितबी। वं खुया काइ मखु, तर नये पित्‍याःम्‍हसित थःगु नयेगु नसा बी, नांगायात थःगु वसः फिका बी। 
वं ब्‍याज कयाः दां त्‍याये बी मखु अले ब्‍यूगु स्‍वयाः अप्‍वः काइ मखु। मनू मनूया दथुइ खःकथं न्‍याय याइ। 
वं जिगु विधि पालन याःगु दु अले विश्‍वास यायेबहः जुयाः जिगु नियम पालन याःगु दु। थज्‍याःम्‍ह मनू धर्मीम्‍ह खः, व धात्‍थें म्‍वानाच्‍वनी, 
“धाये कि, वया तंगुलु काय् दु, गुम्‍ह मनू स्‍याइम्‍ह खः अथवा थुपिं मध्‍ये मेगु छुं नं ज्‍या याइम्‍ह खः, 
खः ला वया बौनं थुपिं मध्‍ये छगू नं ज्‍या याःगु मदु। “वं डाँडाया पुजा याइगु थासय् नइगु, थः जःलाखःलाया कलाःयात स्‍यंकीगु, 
गरीब व मगाःमचाःपिन्‍त क्‍वत्‍यलीगु, खुइगु, बरः तयातःगु सामान लित मबीगु, मूर्तितपाखे स्‍वइगु व घच्‍चाइपुस्‍से च्‍वंगु ज्‍या याइगु। 
वं ब्‍याज कयाः दां त्‍याये बीगु अले ब्‍यूगु स्‍वयाः अप्‍वः काइगु। “छु! थज्‍याःम्‍ह मनू म्‍वानाच्‍वनी ला? व म्‍वानाच्‍वनी मखु। वं थ्‍व फुक्‍क घच्‍चाइपुगु ज्‍या याःगुलिं वयात स्‍यानाः हे छ्वयेमाः, वयागु हि वयागु हे छेनय् लाइ। 
“तर धाये कि, वया छम्‍ह थः बौनं याःगु फुक्‍क पाप खंम्‍ह छम्‍ह काय् दु तर वं बौनं थें थज्‍याःगु ज्‍या याःगु मदु। 
“वं डाँडाय् पुजा याइगु थासय् नइ मखु, वं इस्राएलया घरानाया मूर्तितपाखे स्‍वइ मखु, वं थः जःलाखःलाया कलाःयात स्‍यंकी मखु। 
वं सुयातं क्‍वत्‍यलेगु ज्‍या याइ मखु, तर त्‍यासा काःम्‍हय्‌सित वयागु बर लितबी। वं खुया काइ मखु, तर नये पित्‍याःम्‍हसित थःगु नयेगु नसा बी, नांगायात थःगु वसः फीकाबी। 
वं पापपाखें थःगु ल्‍हाः तापाक हे तइ, वं ब्‍याज कयाः दां त्‍याये बी मखु अले ब्‍यूगु स्‍वयाः अप्‍वः काइ मखु। वं जिगु नियम पालन याइ अले जिगु विधि पालन याइ। “व थः बौनं याःगु पापं यानाः सी मखु। व धात्‍थें हे म्‍वाइ। 
तर वया बौ थःगु अधर्मं यानाः सी, छाय्‌धाःसा वं जबरजस्‍ती कायेगु यात, थः किजायात लुतय् यात अले थः मनूतय् दथुइ मभिंगु ज्‍या यात। 
“अय्‌नं छिमिसं न्‍यनीगु, ‘काय्‌नं थः बौया दोष छाय् भोगय् याये म्‍वाः?’ काय्‌नं न्‍याय व खःकथं ज्‍या याःगु दु अले जिगु विधि बांलाक पालन याःगुलिं व धात्‍थें म्‍वाइ। 
सुनां पापयात, व हे सी। काय्‌नं थः अबुया दोषया फल भोगय् याइ मखु, न अबुं काय्‌म्‍हय्‌सिगु पाप भोगय् याइ। धर्मीयात थःगु धार्मिकताया फल व दुष्‍टयात थःगु मभिंगु ज्‍याया फल दइ। 
“तर सुं दुष्‍टम्‍ह मनुखं थःम्‍हं याःगु फुक्‍क पाप त्‍वःताः जिगु विधि पालन यात धाःसा अले न्‍याय व खःकथं ज्‍या यात धाःसा, व धात्‍थें हे म्‍वाइ। व सी मखु। 
वं याःगु छुं नं अपराध वयागु विरोधय् लुमंकीगु जुइ मखु। वं धर्म याःगुलिं व म्‍वाइ। 
“छु! दुष्‍ट सीबलय् जि लय्‌ताइ ला? परमप्रभु परमेश्‍वरं थथे धयादी। बरु थःगु पहः त्‍वःताः इपिं म्‍वाःगु जितः स्‍वयेमास्‍ति मवइ ला? 
“तर धर्मी मनुखं थःगु धार्मिकता त्‍वःताः पापयात, अले दुष्‍ट मनुखं याःगु घच्‍चाइपुगु ज्‍या यात धाःसा छु व म्‍वाइ ला? वं न्‍हापा याःगु छुं नं धर्मया ज्‍या लुमंकीगु जुइ मखु। वयागु विश्‍वासघात व वं याःगु पापया कारणं व सी। 
“अय्‌नं छिमिसं धाइगु, ‘परमप्रभुं खःगु ज्‍या यानामदी।’ अय् इस्राएलया घराना, न्‍यँ, छु जिं खःगु ज्‍या यानागु मदु ला? छु छिमिसं हे मखुगु ज्‍या यानाच्‍वनागु मदु ला? 
धर्मी मनुखं थःगु धार्मिकता त्‍वःताः पापयात धाःसा, उकिया लागि व सी। वं याःगु पापं हे व सी। 
तर दुष्‍ट मनुखं थःम्‍हं यानाच्‍वंगु मभिंगु ज्‍या त्‍वःताः खःगु ज्‍या यात धाःसा, वं थःगु प्राण बचय् याइ। 
वं बिचाः यानाः थःम्‍हं याःगु फुक्‍क अपराध लुमंकी अले व त्‍वःती। उकिं व धात्‍थें हे म्‍वाइ, व सी मखु। 
अय्‌नं इस्राएलया घरानां धाइगु, ‘परमप्रभुं खःगु ज्‍या यानामदी।’ अय् इस्राएलया घराना, छु जिं खःगु ज्‍या यानागु मदु ला? छु छिमिसं मखुगु ज्‍या यानाच्‍वनागु मदु ला? 
“अथे जुयाः अय् इस्राएलया घराना, जिं छिपिं छम्‍ह छम्‍हय्‌सिगु न्‍याय वयागु पहःचहःकथं याये, जि, परमप्रभु परमेश्‍वर न्‍ववानागु दु। पस्‍ताय् चा, थःगु फुक्‍क अपराधपाखें लिहां वा, अले छिमिगु पाप छिमिगु पतनया कारण जुइ मखु। 
छिमिसं यानाच्‍वनागु फुक्‍क अपराध त्‍वःति, न्‍हूगु नुगः व न्‍हूगु आत्‍मा का, अय् इस्राएलया घराना, छिपिं छाय् सीगु? 
छाय्‌धाःसा जि सुं सीगु खनाः लय्‌ताइम्‍ह मखु, परमप्रभु परमेश्‍वरं धयादी, पस्‍ताय् चा, अले म्‍वाना च्‍वँ!” 
