﻿इजकिएल.
12.
परमप्रभुयागु थ्‍व वचन जिथाय् वल, 
“अय् सीमानिम्‍ह मनू, छ छगू विद्रोही घरानाया दथुइ च्‍वनाच्‍वंगु दु। इमिके स्‍वयेगु मिखा ला दु अय्‌नं इमिसं मखं। इमिके न्‍यनेगु न्‍हाय्‌पं ला दु अय्‌नं इमिसं मताः छाय्‌धाःसा इपिं विद्रोही मनूत खः। 
“उकिं अय् सीमानिम्‍ह मनू, देशं ज्‍वनायंकूम्‍ह मनू थें थःगु सामान प्‍वःच्‍यु, अले न्‍हिनय् इमिगु मिखाया न्‍ह्यःने हे छ थः च्‍वनाच्‍वंगु थासं मेगु थासय् हुँ! इपिं विद्रोही घराना जूसां इमिसं छुं थुइ ला? 
न्‍हिनय् इमिगु मिखाया न्‍ह्यःने हे देशं ज्‍वनाः यंकीबलय् यंकीगु सामान थें छं थःगु सामान पित हजि! अले बहनी इमिसं खंक हे छ ज्‍वंकाः तापाःगु देशय् वनेमाःम्‍ह मनू थें यानाः हुँ! 
इमिसं खंक हे छं अंगलय् ह्वः खँ, अले थःगु सामान व हे ह्वतं पिका। 
इमिसं स्‍वयाच्‍वंबलय् हे व सामान छंगु ब्‍वहलय् ति, अले सन्‍ध्‍याकाः इलय् व क्‍वबिया यंकि। छं त्‍वःताच्‍वंगु देश मखनेमा धकाः छं थःगु ख्‍वाः त्‍वःपु। छाय्‌धाःसा जिं छन्‍त इस्राएलया घरानाया निंतिं छगू चिं यानागु दु।” 
उकिं जितः आज्ञा याःथें जिं याना। न्‍हिनय् देशं ज्‍वनायंकूम्‍ह मनुखं थें जिं थःगु सामान प्‍वःचिनाः पिकया। अले बहनी थःगु हे ल्‍हातं पखालय् ह्वः खना, अले सन्‍ध्‍याकाः इलय् इमिसं स्‍वयाच्‍वंबलय् हे जि थःगु सामान ब्‍वहलय् तयाः वना हे छ्वया। 
सुथय् परमप्रभुया थ्‍व वचन जिथाय् वल, 
“अय् सीमानिम्‍ह मनू, इस्राएलया व विद्रोही घरानां छन्‍त ‘छं छु यानाच्‍वनागु’ धकाः मन्‍यं ला? 
“इमित धा, ‘परमप्रभु परमेश्‍वरं थथे धयादी – थ्‍व परमप्रभुया वचन यरूशलेमया शासक व अन च्‍वंपिं इस्राएलया फुक्‍क घरानायापिं मनूतय्‌गु बारे खः।’ 
इमित धा, ‘जि छिमिगु निंतिं छगू चिं खः।’ “जिं गथे याना, अथे हे इमित याइ। इमित देशं कैदीतय्‌त थें ज्‍वना यंकी। 
“इमिगु दथुइ दुम्‍ह शासक सन्‍ध्‍याकाः इलय् थःगु सामान ब्‍वहलय् तयाः पिहांवनी। अले पःखाः तछ्यानाः पिने वनेत वयागु निंतिं छगू ह्वः खनी। अले थःम्‍हं त्‍वःताच्‍वंगु देश मखनेमा धकाः वं थःगु ख्‍वाः त्‍वपुइ। 
जिं वयागु निंतिं थःगु जाः ह्वले अले व जिगु जालय् लाइ। जिं वयात कल्‍दीतय्‌गु देश बेबिलोनियाय् हये, तर वं व खनी मखु, व अन हे सी। 
वया प्‍यखें दुपिं वया ग्‍वाहालिमित व वया सेनायात जिं फसय् छ्यालब्‍याल याये, अले तरवार लिकयाः इमित लित्तुली। 
“जिं इमित जात जातिया दथुइ व देश देशय् छ्यालब्‍याल यायेबलय् इमिसं जि हे परमप्रभु खः धकाः सी। 
तर जिं इपिं मध्‍ये गुलिंसित तरवार, अनिकाल व महामारीपाखें बचय् याये, अले इपिं गन गन वनी अनया जात जातितय्‌गु दथुइ इमिसं थःम्‍हं यानागु ज्‍या घच्‍चाइपुगु खः धकाः स्‍वीकार याइ, अले इमिसं जि हे परमप्रभु खः धकाः सी।” 
हाकनं परमप्रभुया थ्‍व वचन जिथाय् वल, 
“अय् सीमानिम्‍ह मनू, छं थुरथुर खाखां थःगु नसा न, ग्‍यानाः थुरथुर खाखां थःगु लः त्‍वँ। 
देशयापिं मनूतय्‌त धा, ‘यरूशलेमय् व इस्राएल देशय् च्‍वंपिनिगु बारे परमप्रभु परमेश्‍वरं थथे धयादी, इमिसं ग्‍याग्‍यां थःगु नसा नइ, अले निराश जुजुं थःगु लः त्‍वनी। छाय्‌धाःसा अन च्‍वंपिनिगु ल्‍वापुख्‍यापुया कारणं अन दुगु फुक्‍क चिजनापं इमिगु देशयात उजाड याइ। 
मनूत च्‍वनाच्‍वंगु शहरत सुनसान जुइ, अले देश नाश जुइ। अले इमिसं जि हे परमप्रभु खः धकाः सी।’” 
हाकनं परमप्रभुया थ्‍व वचन जिथाय् वल, 
“अय् सीमानिम्‍ह मनू, ‘दिं फुना वनाच्‍वनी, अय्‌नं छगू नं दर्शन पूरा जुइ मखु,’ धकाः छिमिसं इस्राएल देशया बारे धइगु उखानया छु अर्थ दु? 
उकिं इमित धा, ‘परमप्रभु परमेश्‍वरं थथे धयादी – जिं थ्‍व उखानया अन्‍त यानाबी, अले इमिसं इस्राएलय् थ्‍व उखान हाकनं गुबलें धाइ मखु।’ तर इमित धा, ‘फुक्‍क हे दर्शन पूरा जुइगु दिं लिक्‍क हे दु। 
छाय्‌धाःसा आवंलि गुबलें इस्राएलयापिं मनूतय्‌गु दथुइ मखुगु दर्शन व साइत स्‍वइगु जुइ मखु। 
तर जिं धायेमाःगु खँ जि परमप्रभु थःम्‍हं हे धाये, अले गुगु वचन जिं धाये व पूरा नं याये। व लिबाइ मखु, छाय्‌धाःसा अय् विद्रोही घराना, छिमिगु दिनय् हे जिं धयागु खँ जिं पूरा याये, परमप्रभु परमेश्‍वरं धयादी।’” 
परमप्रभुया थ्‍व वचन जिथाय् वल, 
“अय् सीमानिम्‍ह मनू, इस्राएलया घरानां थथे धयाच्‍वंगु दु, ‘वं खंगु दर्शन यक्‍व दँ लिपा जक पूरा जुइ। वं यक्‍व लिपाया ईयागु अगमवाणी ल्‍हाइगु।’ 
“उकिं इमित धा, ‘परमप्रभु परमेश्‍वरं थथे धयादी – जिं धयागु छगू खँ नं पूरा जुइत आः लिबाइ मखुत तर जिं छु धयागु दु व पूरा जु हे जुइ, परमप्रभु परमेश्‍वरं धयादी।’” 
