﻿इजकिएल.
7.
परमप्रभुया वचन जिथाय् वल, 
“अय् सीमानिम्‍ह मनू, इस्राएल देशयात परमप्रभु परमेश्‍वरं थथे धयादी – “‘अन्‍त! देशया प्‍यखें कुन्‍चाय् अन्‍त वःगु दु। 
आः छंगु अन्‍त वये धुंकल, अले जिं थःगु तं छन्‍त प्‍वंके। छंगु पहःचहःकथं जिं न्‍याय याये। छंगु घच्‍चाइपुगु ज्‍याया निंतिं छन्‍त लिच्‍वः बी। 
जिं माया यानाः छन्‍त स्‍वये मखु, जिं छन्‍त भचा नं माया याये मखु, जिं धात्‍थें छंगु पहःचहः व छंगु दथुइ दुगु घच्‍चाइपुगु पापया निंतिं छिमित सजाँय बी। “‘अले जि हे परमप्रभु खः धकाः छिमिसं सी।’ 
“जि, परमप्रभु परमेश्‍वरं थथे धाये, “‘विपत्ति, खः, तःधंगु विपत्ति वयाच्‍वंगु दु। 
अन्‍त वःगु दु! अन्‍त वये नं धुंकल! व छिमिगु विरोधय् दंगु दु। स्‍व, व वये धुंकल। 
अय् देशय् च्‍वंम्‍ह मनू, छंगु नाश वये धुंकल। ई थ्‍यंकः वल, व दिं वये धुंकल, पर्वत पर्वतय् हलचल जूगु दु, लसता मखु। 
जिं थःगु तं छन्‍त प्‍वंके त्‍यनागु दु। छंगु विरोधय् जिगु तं त्‍वःता हये। छंगु पहःचहःकथं जिं न्‍याय याये। छंगु फुक्‍क घच्‍चाइपुगु ज्‍याया निंतिं छन्‍त लिच्‍वः बी। 
जिं माया यानाः छन्‍त स्‍वये मखु, जिं छन्‍त भचा नं माया याये मखु। छंगु पहःचहःकथं व छंगु दथुइ दुगु घच्‍चाइपुगु ज्‍याया निंतिं जिं छन्‍त सजाँय बी। “‘अले छन्‍त सजाँय बीम्‍ह परमप्रभु जि हे खः धकाः छं सी। 
“‘व दिं थ्‍व हे खः। व वःगु दु। छंगु नाश पिहां वये धुंकल, मनूतय्‌गु मभिंगु ज्‍या व घमण्‍डया स्‍वां ह्वयावःगु दु। 
ल्‍वायेलीगु ज्‍या अप्‍वयाः दुष्‍टतायात सजाँय बीगु कथि जूगु दु, इमि मनूत मध्‍ये छम्‍ह नं ल्‍यनाच्‍वनी मखु। इमिगु धन-सम्‍पत्ति अले मुवंगु छुं नं ल्‍यनाच्‍वनी मखु। 
ई वःगु दु, दिं लिक्‍क वये धुंकल। न्‍याइम्‍ह लय्‌मतायेमा। मीम्‍ह दुःखी मजुइमा। छाय्‌धाःसा तं इमि फुक्‍क भीडयाके लाःगु दु। 
छाय्‌धाःसा इपिं निम्‍ह म्‍वानाच्‍वंतले मीम्‍हय्‌सित थःम्‍हं म्‍यूगु जमिन हाकनं गुबलें दइ मखु। छाय्‌धाःसा फुक्‍क भीडया बारे थ्‍व दर्शन हिली मखु, इमिगु पापं यानाः इपिं मध्‍ये छम्‍हय्‌सिनं नं थःगु ज्‍यान बचय् याये फइ मखु। 
“‘इमिसं थःगु तुरही पुयाः फुक्‍क तयारी याये धुंकूसां सुं नं लडाइँलय् वनी मखु, छाय्‌धाःसा जिगु तं फुक्‍क भीडयाके लाःगु दु। 
पिने तरवार दु, दुने महामारी व अनिकाल दु, गामय् दुपिं तरवारपाखें सी, अले शहर दुने दुपिन्‍त अनिकाल व तरवारं नइ। 
मनूत बचय् जूसां पर्वतय् बेँसीयापिं बखुंचात थें उंउं हाली। इपिं सकसिनं थथःगु अधर्मया लागि बिलाप याइ। 
फुक्‍क ल्‍हाः याग्‍लाप्‍याग्‍ला जुइ, फुक्‍क पुलि लः थें याग्‍लाप्‍याग्‍ला जुइ। 
इमिसं भांग्रा हिनी अले इमित आतंकं त्‍वपुइ। इमिगु ख्‍वाः लज्‍यां त्‍वपूगु जुइ अले इपिं सकसिगु सँ खाइगु जुइ। 
“‘इमिसं थःगु वहः लँय् वांछ्वयाबी अले इमिगु लुँ अशुद्ध चिज थें जुइ। परमप्रभुया तंया दिनय् इमिगु वहः व लुं इमित बचय् याये फइ मखु। इमिसं उकिं थःगु पित्‍याः लंके फइ मखु वा प्‍वाः जाय्‌के फइ मखु, छाय्‌धाःसा उकिं हे इमित पापया निंतिं धेधेचुइकूगु खः। 
इपिं थःगु बांबांलाःगु तिसाय् तःधं छुल अले उकिं इमिसं घच्‍चाइपुगु मूर्तित व क्‍वह्यंगु झ्‍वातात दय्‌कल। अथे जुयाः जिं थुपिं चिजयात इमिगु निंतिं घच्‍चाइपुगु यानाबी। 
जिं थ्‍व फुक्‍क विदेशीतय्‌त लुतय्‌ याकेबी, जिं पृथ्‍वीयापिं मभिंपिं मनूतय्‌त व फुक्‍क लुटया माल थें बी। अले इमिसं उकियात अशुद्ध याइ। 
जिं थःगु ख्‍वाः इमिगुपाखें फस्‍वय्‌के। इमिसं जिगु मू वंगु थाय्‌यात अशुद्ध याइ। दाखुँतय्‌सं अन दुहां वनाः उकियात अशुद्ध याइ। 
“‘सिखःत तयार या, छाय्‌धाःसा देश हि बाः वय्‌क जूगु अपराधं जाःगु दु अले शहर अत्‍याचारं जाःगु दु। 
उकिं जिं इमिगु छेँत अधिकार यायेत मेगु जातियापिं तसकं मभिंपिं मनूत हये। जिं बल्‍लाःपिनिगु घमण्‍ड नं खतम यानाबी अले इमिगु पवित्र थाय्‌त अशुद्ध याइगु जुइ। 
आतंक वइबलय् इमिसं शान्‍ति माली, तर शान्‍ति गनं दइ मखु। 
छगू विपत्तिया ल्‍यू मेगु विपत्ति वइ अले छगू बांमलाःगु खबरया ल्‍यू मेगु बांमलाःगु खबर वइ। इमिसं अगमवक्तातपाखें दर्शन कायेत स्‍वइ। पुजाहारीतपाखें व्‍यवस्‍थाया शिक्षा व धर्म गुरुतपाखें सल्‍लाह तनावनी। 
जुजुं बिलाप याइ, शासकत निराश जुइ, थ्‍व देशयापिं मनूतय्‌गु ल्‍हाः ग्‍यानाः खाइ। जिं इपिंलिसें इमिगु हे पहःचहःकथं व्‍यवहार याये, इमिसं याःगु न्‍यायकथं जिं इमिगु न्‍याय याये। “‘अले इमिसं जि हे परमप्रभु खः धकाः सी।’” 
