﻿विलाप.
2.
परमप्रभुं थःगु तम्‍वय् म्‍ह्याय् सियोनयात गय् यानाः तसकं खिउँगुलिं त्‍वपुयादीगु दु। वय्‌कलं इस्राएलया गौरवयात आकाशं पृथ्‍वीइ वांछ्वयादिल। थःगु तंया दिनय् वय्‌कलं थःगु पाउदानयात नं लुमंका मदी। 
परमप्रभुं छप्‍तिं हे दयामाया मयासें यहूदाया फुक्‍क बस्‍तीत नुनाछ्वयादिल। थःगु तम्‍वय् वय्‌कलं यहूदाया म्‍ह्याय्‌या किल्‍लात थुनादिल। वय्‌कलं व राज्‍य व वया शासकतय्‌त बँय् क्‍वथलाः क्‍वह्यंकादिल। 
थःगु तसकं तःधंगु तमय् वय्‌कलं इस्राएलया दक्‍व शक्तियात नाश यानादिल। शत्रुतय्‌गु न्‍ह्यःने हे वय्‌कलं थःगु सुरक्षाया जःपा ल्‍हाः लिकयादिल। वय्‌कःयागु तं याकूबयाके प्‍यखेरं भस्‍म याइगु मि थें च्‍यात। 
शत्रुं थें वय्‌कलं थःगु धनुष वाणं झीत ताकय् याःगु दु। विरोधी थें वय्‌कः दनादीगु दु। स्‍वय्‌बलय् यइपुस्‍से च्‍वंपिं सकसित वय्‌कलं स्‍यानादीगु दु। म्‍ह्याय् सियोनयागु पालय् वय्‌कलं थःगु तं मि थें प्‍वंकादीगु दु। 
परमप्रभु शत्रु थें जुयादीगु दु, वय्‌कलं इस्राएलयात नाश यानादीगु दु। वय्‌कलं इस्राएलया दक्‍व बांबांलाःगु छेँत भज्‍यंक नाश यानादिल अले वया दक्‍व किल्‍लात थुनादीगु दु। वय्‌कलं यहूदाया म्‍ह्याय्‌यागु दुःखकष्‍ट व विलाप अप्‍वय्‌का ब्‍यूगु दु। 
वय्‌कलं थः च्‍वनेगु थाय्‌यात क्‍यबयागु बल्‍चा थें स्‍यंकादीगु दु, वय्‌कलं थःगु नापलायेगु थाय् नाश यानादीगु दु, परमप्रभुं सियोनय् पवित्र नखःचखः व विश्रामबारत दिकादीगु दु। थःगु तसकं तःजिगु तम्‍वय् वय्‌कलं जुजु व पुजाहारी निम्‍हय्‌सित नं त्‍वःतादीगु दु। 
परमप्रभुं थःगु वेदीयात मनंनिसें त्‍वःतादीगु दु, थःगु पवित्र थाय्‌यात त्‍वःतादीगु दु। वयागु दरबारतय्‌गु अंगःत तछ्यायेत वय्‌कलं शत्रुतय्‌गु ल्‍हातय् बियादिल। इपिं परमप्रभुया देगलय् हे नखःचखःया दिनय् थें सः थ्‍वय्‌कः हाल। 
परमप्रभुं म्‍ह्याय् सियोनयागु पःखाःयात नाश यायेगु क्‍वछिनादिल। वय्‌कलं नापे याइगु खिपतं व नापय् यानादिल। वयात नाश यायेगुपाखें वय्‌कलं थःगु ल्‍हाः पनामदी। वय्‌कलं धरहरा व पःखाः निगुलिंयात ख्‍वय्‌कादिल, उपिं निगुलिं छकलं दुन। 
वयागु मू ध्‍वाखात बँय् तुनावन। वय्‌कलं वयागु गजबारत कुचा कुचा यानाः नाश यानादिल। वया जुजु व राजकुमारतय्‌त मेपिं जातितय्‌गु दथुइ पितिनाछ्वःगु दु, आः ला व्‍यवस्‍था मन्‍त। अले वया अगमवक्तातय्‌सं नं परमप्रभुपाखें छुं हे दर्शन कायेखनी मखु। 
म्‍ह्याय् सियोनया थकालिपिं बँय् फेतुनाः छुं हे मधासे च्‍वनाच्‍वनी, इमिसं थथःगु छेनय् धू तःगु दु अले भाग्रां फिनाच्‍वंगु दु। यरूशलेमया ल्‍यासेपिन्‍सं थथःगु छ्यं बँय् तक हे क्‍वछुका तःगु दु। 
ख्‍वख्‍वं ख्‍वबिं हे जिगु मिखा न्‍यलय् धुंकल। जिगु नुगः क्‍वतुन। जिमि मनूत नाश जूगुलिं, जिमि मस्‍त व दुरु त्‍वंपिं मस्‍त शहर शहरय् व गल्‍लि गल्‍लिइ मूर्च्‍छा जूगुलिं जिगु नुगः तसकं ख्‍वःगु दु। 
ख्‍वख्‍वं थः मांयात धाइ, “नयेपित्‍यात, नयेत्‍वनेगु गन दु?” इपिं शहरया गल्‍लि गल्‍लिइ घाःपा जूपिं मनूत थें मूर्च्‍छा जुइ। इपिं थः मांयागु मुलय् हे बुलुहुं बुलुहुं सीगु। 
हे म्‍ह्याय् यरूशलेम, जिं छंगु निंतिं छु धाये? जिं छन्‍त छुनापं दाँजय् यायेगु? हे कन्‍या म्‍ह्याय् सियोन, छुनापं दाँजय् यानाः जिं छन्‍त सान्‍त्‍वना बीगु? छंगु घाःपाः तसकं तःजिगु समुद्र स्‍वयाः तःजाः। छन्‍त लाय्‌के फुम्‍ह सु दु? 
छंगु अगमवक्तातय्‌सं खंगु दर्शनत सत्‍य मखुगु व छुं हे मूं मवंगु खः। इमिसं छंगु अधर्म क्‍यना मब्‍यू, मखुसा छन्‍त ज्‍वनाः बेबिलोनय् मयंकीगु। इमिसं छंगु निंतिं खंगु दर्शन सत्‍य मखुगु व अलमल यायेत जक खः। 
छ च्‍वनाच्‍वंगु थासं वनीपिं दक्‍व मनूतय्‌सं छन्‍त हेस्‍यानाः ल्‍हाःपा थाइगु। म्‍ह्याय् यरूशलेमयात हेस्‍यानाः इमिसं थथे धकाः छ्यं क्‍वाना जुइ, “दकलय् बांलाःगु व फुक्‍क पृथ्‍वीया लसता धकाः धाइगु शहर थ्‍व हे मखु ला?” 
छिमि दक्‍व शत्रुतय्‌सं छंगु विरोधय् म्‍हुतु चाय्‌काः छन्‍त हेला याइ। इमिसं छन्‍त हेला यानाः वा किरिकिरि न्‍ह्यइ, अले धाइ, “जिमिसं हे वयात नाश याना, हः हः, थ्‍व हे दिं पियाच्‍वनागु खः, जिपिं म्‍वाना च्‍वनाबलय् हे थ्‍व स्‍वयेदत।” 
परमप्रभुं छु योजना यानादीगु खः। यक्‍व दँ न्‍हापा वय्‌कलं छु घोषणा यानादीगु खः, व हे वचन वय्‌कलं पूवंकादिल। छुं हे दयामाया मदय्‌क वय्‌कलं छन्‍त नाश यानादिल। वय्‌कलं शत्रुयात छंगुपाखें लय्‌ताय्‌कादिल, अले छंगु शत्रुतय्‌गु शक्ति अप्‍वय्‌कादीगु दु। 
मनूतय्‌गु नुगलं परमप्रभुयात बिन्‍ति याइ। हे म्‍ह्याय् सियोनया पःखाः, छंगु ख्‍वबि खुसि थें चच्‍छि न्‍हिच्‍छिं हे हाय्‌कि। पलख हे आराम काये मते, अले छंगु मिखायात आराम बी मते। 
पाः च्‍वनीगु ई शुरु जुइबलय् दनाः चान्‍हय् हा! परमप्रभुया न्‍ह्यःने हे छंगु नुगः लः थें प्‍वंकि। गल्‍लि गल्‍लिइ नयेपित्‍यानाः मूर्च्‍छा जुयाच्‍वंपिं मस्‍तय्‌गु प्राण म्‍वाकेगु निंतिं थःगु ल्‍हाः वय्‌कःपाखे ल्‍ह्वँ। 
“स्‍वयादिसँ! हे परमप्रभु, बिचाः यानादिसँ! सुयात छिं थज्‍याःगु दुःखकष्‍ट बियादीगु दु धकाः? छु मिसातय्‌सं थःगु गर्भया फल, व थःम्‍हं बुइका तःपिं मस्‍तय्‌गु ला नयेगु ला? छु पुजाहारीत व अगमवक्तात परमप्रभुया पवित्र देगलय् हे स्‍याइगु? 
“ल्‍याय्‌म्‍ह व बुरातय्‌गु सीम्‍ह गल्‍लि गल्‍लिइ धुलय् अथें लानाच्‍वंगु दु। जिमि ल्‍यासेपिं व ल्‍याय्‌म्‍हपिं मनूतय्‌त तरवारं स्‍यानाः क्‍वथला तःगु दु। थःगु तंया दिनय् छिं छुं हे दयामाया मयासें इमित पालाः स्‍यानादीगु दु। 
“नखःबलय् मनूत मुं थें, छिं जिगु प्‍यखेरं आतंक मुंकादिल। परमप्रभुया तंया दिनय् सुं छम्‍ह न बिस्‍युं वने फत न बचय् जुल। जिं हे ब्‍वलंका तःधिक यानातयापिन्‍त जिमि शत्रुं सिधय्‌का बिल।” 
