﻿यर्मिया.
31.
परमप्रभुं धयादी, “उबलय् जि इस्राएलया फुक्‍क कुलया परमेश्‍वर जुइ, अले इपिं जि प्रजा जुइ।” 
परमप्रभुं थथे धयादी, “तरवारं बचय्‌जूपिं मनूतय्‌त मरुभूमिइ दयामाया दइ। जि इस्राएलयापिं मनूतय्‌त आराम बीत वये।” 
परमप्रभु पुलांगु इलय् थथे धाधां झीथाय् खनेदय्‌कः झाल, “जिं छन्‍त न्‍ह्याबलें दयाच्‍वनीगु मायां माया यानागु दु। उकिं जिं छन्‍त करुणा यानाः थःथाय् हयागु दु। 
हाकनं छकः जिं छिमित दय्‌के, हे कुमारी इस्राएल, छन्‍त हाकनं दय्‌कीगु जुइ। छ हाकनं भुस्‍या ज्‍वनाः लसता हनीपिंनापं प्‍याखं हुहुं पिहां वइ। 
छं सामरियाया डाँडा डाँडाय् हाकनं दाखमा पी। किसानतय्‌सं दाखमा पी अले उकिया फल नइ। 
एफ्राइमया पहाडी देशय् पिवाः च्‍वनीपिं थथे धाधां हाःगु दिं वइ, ‘वा, झीपिं सियोनय् परमप्रभु झी परमेश्‍वरयाथाय् वनेनु।’” 
परमप्रभुं थथे धयादी, “लय्‌तातां याकूबया मनूतय्‌गु निंतिं म्‍ये हा! ततःधंगु जातिया निंतिं तःसलं हा! तःसलं प्रशंसा यानाः धा, ‘हे परमप्रभु, थः प्रजा, इस्राएलया ल्‍यनाच्‍वंपिन्‍त उद्धार यानादिसँ।’ 
स्‍व! जिं थःम्‍हं हे इमित उत्तरयागु देशं हयेत्‍यनागु दु। जिं इमित पृथ्‍वीयागु ताताःपाःगु थासं मुंके। इमिगु दथुइ कांपिं, लंग्रात, प्‍वाथय् दुपिं व मचा बुइकूपिं मिस्‍त नं दइ। इमिगु छगू तःधंगु पुचः थन लिहां वइ। 
इपिं ख्‍वख्‍वं लिहां वइ। जिं इमित लित हइबलय् इमिसं प्रार्थना याइ। जिं इमित खुसिया सिथ सिथ इपिं लुफिं महाइगु पिचुगु लँपुं हये। छाय्‌धाःसा जि इस्राएलया अबु खः, एफ्राइम जिम्‍ह जेठाम्‍ह काय् खः। 
“हे जाति जातियापिं मनूत, परमप्रभुया वचन न्‍यँ! ताताःपाःगु समुद्र सिथय् सिथय् च्‍वंगु देशय् थ्‍व खँ न्‍यंकि, ‘सुनां इस्राएलयात छ्यालब्‍याल यानादिल, वय्‌कलं हे वयात मुंकादी। फैजवालं बथांयात रक्षा याःथें वय्‌कलं इमित रक्षा यानादी।’ 
छाय्‌धाःसा परमप्रभुं याकूबयात मू पुलाः त्‍वःतकादी। व स्‍वयाः बल्‍लाम्‍हय्‌सिगु ल्‍हातं इमित वय्‌कलं उद्धार यानादी। 
इपिं वयाः सियोनया तज्‍जाःगु थासय् म्‍ये हाली। अले परमप्रभुया दयाया कारणं इपिं लय्‌ताइ। अन्‍न, न्‍हूगु दाखमद्य व चिकं, फैच्‍वलय्‌या मस्‍त व सा द्वहंया मस्‍तय्‌गु कारणं इपिं तसकं लय्‌ताइ। इमिगु जीवन लखं प्‍याःगु क्‍यब थें जुइ। इमित हाकनं गुबलें दुःख जुइ मखु। 
अबलय् ल्‍यासेत लय्‌लय्‌तातां प्‍याखं हुली। ल्‍याय्‌म्‍हपिं व बुरापिं लय्‌ताइ। छाय्‌धाःसा जिं इमिगु दुःखयात चीकाः इमित लय्‌ताय्‌के। जिं इमित सान्‍त्‍वना बी अले दुःखया पलेसा लय्‌ताः बी। 
पुजाहारीतय्‌त जिं भिंगु भिंगु नसां प्‍वाः जाय्‌काबी। जि प्रजा जिगु भिंगु ज्‍यां लुधनी,” 
परमप्रभुं थथे नं धयादी, “न्‍यँ, रामा शहरय् नुगः हे तज्‍याइ थें च्‍वंक ख्‍वःसः ताये दत। राहेल थः मस्‍तय्‌त लुमंकाः ख्‍वयाच्‍वन। न्‍ह्याक्‍व ह्ययेकूसां व मानय् मजू, छाय्‌धाःसा वया मस्‍त स्‍याये धुंकल।” 
परमप्रभुं थथे धयादी, “ख्‍वःसः दिकि, मिखां ख्‍वबि पिकाये मते। छाय्‌धाःसा छिमिगु ज्‍याया सिरपाः दइ,” परमप्रभुं धयादी, “इपिं शत्रुया देशं लिहां वइ। 
थुकथं छंगु लिपाया आशा दु,” परमप्रभुं धयादी। “छं काय्‌म्‍ह्याय्‌पिं इमिगु थःगु हे देशय् लिहां वइ। 
“जिं धात्‍थें एफ्राइम ख्‍वःगु सः न्‍यना, ‘छम्‍ह हारांम्‍ह द्वहंचायात थें छिं जितः आज्ञा पालन यायेगु स्‍यनादिल। जितः लितहयादिसँ, जि लिहां वये, छाय्‌धाःसा छि परमप्रभु जिम्‍ह परमेश्‍वर खः। 
जि मखुगु लँय् वने धुंकाः जि पस्‍ताय् चाया। जिं थुइ धुंकाः जिं थःगु नुगःपा दाया। जि मछाले माल। जि क्‍वह्यंका च्‍वनेमाल। छाय्‌धाःसा ल्‍याय्‌म्‍हबलय् जिं पाप यानागु खः।’ 
छु! एफ्राइम जिम्‍ह यःम्‍ह काय्, मखु ला? छु व जितः लय्‌तायेकीम्‍ह मचा, मखु ला? वयागु विरोधय् जिं न्‍ह्याक्‍व हे खँ ल्‍हाना सां जिं धात्‍थें वयात आः तक नं लुमंका च्‍वना। उकिं वयात जिं यय्‌का। जिं धात्‍थें वयात तसकं माया याना,” 
“हे इस्राएली कुमारी, छ वंगु लँय् थां व झण्‍डा धस्‍वाकि। छ वःगु लँय् चिं ति लिहां वा! थुपिं थःगु शहरय् लिहां वा! 
हे विश्‍वास यायेबहः मजूम्‍ह म्‍ह्याय्, छ गुबलय् तक थुखे उखे चाःहिलाजुयेगु? परमप्रभुयागु छगू न्‍हूगु सृष्‍टि पृथ्‍वीइ खने दइ। छम्‍ह मिसां छम्‍ह मिजंयात रक्षा याइ।” 
दक्‍व शक्ति दुम्‍ह परमप्रभु, इस्राएलया परमेश्‍वरं थथे धयादी, “जिं थः मनूतय्‌त थःगु देशय् लित हयेबलय् इमिसं हाकनं छकः यहूदा देश व उकिया शहरय् हाकनं थथे धाइ, ‘परमप्रभुं थः च्‍वनीगु यरूशलेमया पवित्र डाँडायात सुवाः बियादीमा।’ 
यहूदा व उकिया शहरय् बुँज्‍या याइपिं व फैच्‍वलय्‌या बथां ज्‍वनाजुइपिंनापं च्‍वनी। 
छाय्‌धाःसा जिं त्‍यानुचाःपिन्‍त आराम बी, अले दुःख जुयाच्‍वंपिन्‍त सुख बी।” 
थुबलय् हे जि न्‍ह्यलं चाल अले जिं प्‍यखेरं स्‍वयाः। जिगु म्‍हगस जितः न्‍ह्यइपुसे च्‍वन। 
परमप्रभुं धयादी, “जिं इस्राएलया घराना व यहूदाया घरानाया मनूतय्‌गु ल्‍याः व पशुतय्‌गु ल्‍याः यक्‍व अप्‍वय्‌काबीगु दिं वयेत्‍यंगु दु। 
गथे जिं इमित कुतः यानाः लिनाकया, क्‍वथलाबिया, वांछ्वयाबिया, नाश याना व ध्‍वस्‍त याना, अथे हे कुतः यानाः पी, सुसाःकुसाः याये अले ब्‍वलंके।” परमप्रभुं धयादी। 
“व दिं वइबलय् मनूतय्‌सं आवंलि थथे धाइ मखु, “‘मांबौपिन्‍सं खायुगु अंगुर नल, तर मस्‍तय्‌गु वा तुन।’ 
“उकिया पलेसा, सुनां खायुगु अंगुर नइ, वयागु हे वा तुनी, छम्‍ह छम्‍ह मनूत थःगु पापं यानाः थः हे सी।” 
परमप्रभुं धयादी, “इस्राएलयापिं व यहूदायापिंलिसे जिं न्‍हूगु बाचा चीत्‍यनागु ई वयाच्‍वंगु दु। 
इमि तापाःबाज्‍यापिन्‍त मिश्र देशं लिगना हये धुंकाः इपिंलिसें चिनागु थें ज्‍याःगु बाचा थ्‍व मखु। जि इमि भाःत थें खःसां इमिसं व बाचा त्‍वथुल।” 
“उबलय् जिं इस्राएलया घरानानापं चीत्‍यनागु बाचा थुकथं खः, जिं थःगु नियम इमिगु मनय् तयाबी अले इमिगु नुगलय् च्‍वयाबी। जि इमि परमेश्‍वर जुइ अले इपिं जिम्‍ह मनूत जुइ। 
‘प्रभुयात म्‍हसीकी’ धकाः इमिसं थः जःलाखःलापिन्‍त व दाजुकिजापिन्‍त नं स्‍यना जुइ माली मखु, छाय्‌धाःसा चिधिकःपिन्‍संनिसें कयाः तःधिकःपिन्‍सं तकं जितः म्‍हसी। इमिसं याःगु मभिंगु बांमलाःगु ज्‍याखँ फुक्‍कं जिं क्षमा यानाबी। अले इमिगु पाप नं जिं लुमंके मखु,” 
परमप्रभुं न्‍हिनय् जः बीत सूर्य व चान्‍हय् थीत तिमिला व नगुत तयादीगु दु। वय्‌कलं लबुत गर्जय् याकेत समुद्रयात संकादी। वय्‌कःया नां दक्‍व शक्ति दुम्‍ह परमप्रभु खः। वय्‌कलं थथे धयादी, 
“प्रकृतिया नियम दयाच्‍वंतले इस्राएलया वंश छगू जाति जुया हे च्‍वनी।” 
परमप्रभुं थथे धयादी, “च्‍वय्‌यागु आकाश नापय् याये फःसा जक अले क्‍वय्‌यागु पृथ्‍वीया जग माला लुइके फःसा जक इमिसं याःगु फुक्‍क खँया निंतिं जिं इस्राएलया सन्‍तानयात त्‍वःताबी।” 
परमप्रभुं धयादी, “हननेलया धरहरांनिसें कुन्‍चाय् च्‍वंगु मू लुखा तक थ्‍व शहर जिगु निंतिं हाकनं दय्‌कीगु दिं वयाच्‍वंगु दु। 
नापे याइगु खिपः अनं तप्‍यंक गारेब डाँडा तक थ्‍यनी, अनं चाःहिला गोआ तक वनी। 
सीम्‍ह व नौ वांछ्वइगु फुक्‍क गाः, पुर्बपाखे किद्रोन खुसि तकयागु फुक्‍क बुँ व सल ध्‍वाखाया कुन्‍चा तक परमप्रभुया निंतिं पवित्र जुइ। व शहरयात आवंलि कब्‍जा याइ मखु वा भज्‍यंक नाश याइ मखु।” 
