﻿यर्मिया.
26.
योशियाहया काय् यहूदायाम्‍ह जुजु यहोयाकीमया शासनया शुरुया इलय् थ्‍व वचन परमप्रभुपाखें वल, 
“परमप्रभुं थथे धयादी – परमप्रभुया देगःया चुकय् दँ, अले परमप्रभुया देगलय् आराधना यायेत वःपिं यहूदाया शहर शहरयापिं फुक्‍कं मनूतय्‌त जिं छन्‍त इमित धाः धकाः आज्ञा बियागु फुक्‍क खँ धा, छता खँ नं त्‍वःफिके मते। 
सके व न्‍यनाः इपिं सकसिनं थःगु मभिंगु पहःचहः त्‍वःती ला। अले इमिसं मभिं ज्‍या याःगुलिं जिं इमित नाश यायेगु जिगु योजना पूरा याये मखु। 
“छं इमित धा, ‘परमप्रभुं थथे धयादी – छिमिसं जिगु खँ ध्‍यान बियाः मन्‍यन धाःसा, जिं छिमिगु न्‍ह्यःने तयाबियागु जिगु व्‍यवस्‍था पालन मयात धाःसा 
अले जिं छिमिथाय् छ्वयाहयापिं अगमवक्तातय्‌गु खँ ध्‍यान बियाः मन्‍यन धाःसा (खः ला छिमिसं ध्‍यान बियाः न्‍यंगु मदु) 
जिं थ्‍व देगःयात शीलोयात थें नाश यानाबी, अले पृथ्‍वीयागु फुक्‍क जातितय्‌सं थ्‍व शहरया नां कयाः सराः बी।’” 
पुजाहारीत, अगमवक्तात व फुक्‍क मनूतय्‌सं परमप्रभुया देगलय् यर्मियां धाःगु खँ न्‍यन। 
परमप्रभुं यानादीगु फुक्‍क आज्ञा यर्मियां फुक्‍क मनूतय्‌त धाये धुंकेवं पुजाहारीत, अगमवक्तात व फुक्‍क मनूतय्‌सं वयात ज्‍वनाः धाल, “छ सी हे माः। 
थ्‍व देगः शीलो थें जुइ, अले थ्‍व शहर नाश जुइ अले थन सुं मनू च्‍वनी मखु व धकाः छाय् छं परमप्रभुया नामय् अगमवाणी ल्‍हानागु?” अले फुक्‍क मनूत परमप्रभुया देगलय् यर्मियाया प्‍यखेरं मुंवल। 
थ्‍व खँ न्‍यनाः यहूदाया हाकिमत जुजुया दरबारं परमप्रभुया देगलय् वल, अन परमप्रभुया देगःयागु न्‍हूगु मू लुखाया न्‍ह्यःने च्‍वन। 
अले पुजाहारीत व अगमवक्तातय्‌सं हाकिमत व फुक्‍क मनूतय्‌त थथे धाल, “थ्‍व मनूयात स्‍याये हे माः। छाय्‌धाःसा थ्‍व मनुखं थ्‍व शहरया विरोधय् अगमवाणी ल्‍हाःगु दु। थ्‍व छिमिसं थःगु हे न्‍हाय्‌पनं न्‍यने धुंकल।” 
अले यर्मियां फुक्‍क हाकिमत व फुक्‍क मनूतय्‌त धाल, “थ्‍व देगः व थ्‍व शहरया विरोधय् छिकपिन्‍सं न्‍यनादीगु फुक्‍क खँ अगमवाणी ल्‍हायेत परमप्रभुं जितः छ्वयाहयादीगु हे खः। 
आः छिकपिन्‍सं थथःगु पहःचहः व ज्‍या भिंकादिसँ, परमप्रभु थः परमेश्‍वरया आज्ञा पालन यानादिसँ। अले छिकपिन्‍सं मभिं ज्‍या याःगुलिं वय्‌कलं छिकपिन्‍त नाश याये धकाः दय्‌कादीगु वय्‌कःया योजना पूरा यानादी मखु। 
जि ला छिकपिनिगु हे ल्‍हातय् दु, छिकपिन्‍त छु बांलाः व पाय्‌छि जू थें च्‍वं जितः व हे यानादिसँ। 
तर थ्‍व खँ छिकपिन्‍सं पक्‍का सीकाति जितः स्‍यानादिल धाःसा थःके, थःगु शहरय् व थनच्‍वंपिं मनूतय्‌के दोष मदुम्‍हय्‌सिगु हिया दोष हइ, छाय्‌धाःसा परमप्रभुं हे थ्‍व फुक्‍क वचन न्‍यंकेत जितः छिमिथाय् छ्वयाहयादीगु खः।” 
अले हाकिमत व फुक्‍क मनूतय्‌सं पुजाहारीत व अगमवक्तातय्‌त धाल, “थ्‍व मनू ज्‍यान सजाँय बीमाःम्‍ह मखु। थ्‍वं जिमित परमप्रभुं झी परमेश्‍वरया नामय् थ्‍व खँ धाःगु खः।” 
देशयापिं सुं थकालितय्‌सं दनाः अन मुनाच्‍वंपिं मनूतय्‌त धाल, 
“यहूदाया जुजु हिजकियाया इलय् मोरेशेतयाम्‍ह मीकां अगमवाणी ल्‍हात। यहूदायापिं फुक्‍क मनूतय्‌त वं थथे धाल, ‘दक्‍व शक्ति दुम्‍ह परमप्रभुं थथे धयादी, “‘सियोनयात बुँ थें जोते याइ, यरूशलेम नाश जुयाः द्वँ चिनी, देगः दुगु डाँडा धाःसा झाःया झाः दुगु द्वम्‍बःचा थें जुइ।’ 
“छु! यहूदाया जुजु हिजकिया वा यहूदाया मेपिं सुनानं वयात स्‍यात ला? छु! जुजुं परमप्रभुयागु भय मकाः ला? परमप्रभुयाके दया मफ्‍वं ला? अले इमित नाश यायेत दय्‌कादीगु योजनायात वय्‌कलं पूरा यानाः मदिल। तर आः झीसं ला थःके तःधंगु सर्वनाश हयेत्‍यनागु मदु ला?” 
छम्‍ह मेम्‍ह नं दु, गुम्‍हय्‌सिनं परमप्रभुया नामय् अगमवाणी ल्‍हात। व किर्यत-यारीमय् च्‍वंम्‍ह शमायाहया काय् उरियाह खः। वं नं थ्‍व शहर व थ्‍व देशया विरोधय् यर्मियां धाःथें अगमवाणी ल्‍हात। 
जुजु यहोयाकीम व वया हाकिमत व शासकतय्‌सं उरियाहया थ्‍व वचन न्‍यंबलय् जुजुं वयात स्‍यायेत स्‍वल। थ्‍व खँ न्‍यनाः उरियाह ग्‍यात अले व मिश्र देशय् बिस्‍युं वन। 
अले यहोयाकीमं मिश्र देशय् अक्‍बोरया काय् एल्‍नातान व वनापं छुं मनूत छ्वल। 
इमिसं उरियाहयात मिश्र देशं यहोयाकीम जुजुयाथाय् हल। जुजुं वयात तरवारं स्‍याकेबिल। वयागु सीम्‍ह साधारण मनूत थुनीगु थासय् वांछ्वय्‌केबिल। 
तर शापानया काय् अहीकाम यर्मियाया पंलित। उकिं वयात स्‍यायेत इमिसं मनूतय्‌गु ल्‍हातय् मब्‍यू। 
