﻿यशैया.
60.
“हे यरूशलेम दँ! छाय्‌धाःसा छंगु जः वये धुंकल! अले परमप्रभुया महिमा छंके खनेदः वःगु दु। 
स्‍व! खिउँगुलिं पृथ्‍वीयात व तसकं खिउँगुलिं मनूतय्‌त त्‍वपुयातःगु दु, तर परमप्रभुया जः छंके वःगु दु, अले परमप्रभुया महिमा छंके खनेदः वःगु दु। 
जाति जातित छंके दुगु जलय् व जुजुत छंके खनेदुगु सुथया निभाःया जलय् वइ। 
“अथे जुयाः छंगु मिखा ब्‍वयाः चाकःछिं स्‍व! इपिं फुक्‍क छन्‍थाय् मुनाः छन्‍थाय् वइ। छिमि काय्‌पिं तापाकं वइ, अले छिमि काय्‌म्‍ह्याय्‌पिं ल्‍हातं क्‍वबिया छन्‍थाय् हइ। 
अनंलि छ थ्‍व खनाः तसकं ज्‍वालं थी अले छंगु नुगः तसकं लय्‌ताइ। समुद्रया सम्‍पत्ति छन्‍थाय् हइ, जाति जातिया सम्‍पत्तित छन्‍थाय् वइ। 
ऊँटया बथां, मिद्यान व एपाया ऊँटतय्‌सं छंगु देय् त्‍वपुइ। अले शेबाया फुक्‍क मनूत परमप्रभुया प्रशंसा यायां लुँ व धुपाँय् ज्‍वनाः छन्‍थाय् वइ। 
केदारया फुक्‍क फैच्‍वलय्‌तय् बथां छन्‍थाय् मूंवइ। नबायोतया फैतय्‌सं छंगु सेवा याइ। इपिं बलिकथं जिगु वेदीइ नालेबहः जुइ। अले महिमां जाःगु जिगु देगःयात जिं समाः याये। 
“सुपाँय् थें ब्‍वया जुइपिं अले सुकुभत्तुया स्‍वँपाखे ब्‍वयावनीपिं थुपिं सु खः? 
धात्‍थें हे टापुतय्‌सं जितः स्‍वइ, तर्शीशया व्‍यापारीतय्‌गु जहाजत न्‍ह्यः न्‍ह्यः दु। परमप्रभु छिमि परमेश्‍वरया निंतिं, व इस्राएलया पवित्र परमेश्‍वरया हनाबनाया निंतिं इपिं छिमि काय्‌पिन्‍त तापाकं इमिगु लुँ व वहःनापं छन्‍थाय् हइ। छाय्‌धाःसा वय्‌कलं छन्‍त गौरवं जाय्‌कादी। 
“परदेशीतय्‌सं छंगु पःखाः हाकनं दय्‌की, अले इमि जुजुतय्‌सं छंगु सेवा याइ। जिगु तमं जिं छन्‍त कय्‌का, अय्‌नं जिं छन्‍त दया याये। 
छंगु शहरया मू ध्‍वाखात न्‍ह्याबलें चालाच्‍वनी। उपिं ध्‍वाखात चान्‍हि गुबलय् नं तीमखु। गुकिं यानाः मनूतय्‌सं छन्‍थाय् जाति-जातितय्‌गु धन-सम्‍पत्ति हयेमाः। इमि जुजुतय् न्‍ह्यः न्‍ह्यः त्‍याःगुया जुलूस ज्‍वनाः दुहां वयेमा। 
छाय्‌धाःसा छंगु सेवा मयाइगु जाति व राज्‍य नाश जुइ। इपिं धात्‍थें हे भज्‍यंक नाश जुइ। 
“लेबनानया गौरव छन्‍थाय् वइ, थाकुराःमात, सल्‍लाया सिमात व सिसौया सिमात नं जिगु पवित्रथाय् तसकं बांलाकेत वइ। अले जिगु पवित्रथाय् गौरवं जाइ। 
छन्‍त दुःख बिइपिनि काय्‌पिं छन्‍थाय् हे क्‍वमिलु जुयाः वइ। छन्‍त हेला याइपिं फुक्‍क छंगु पाली भ्‍वपू वइ। इमिसं छन्‍त परमप्रभुया शहर, इस्राएलया पवित्र परमेश्‍वरया सियोन धकाः धाइ। 
“छ त्‍वःतातःम्‍ह व हेला यानातःम्‍ह खः, छपाखें जुयाः सुं नं मवंसां नं जिं छन्‍त सदांया निंतिं गौरव व फुक्‍क पुस्‍ताया लसता यानाबी। 
माम्‍हं थः मस्‍तय्‌त बिचाःसंचाः याःथें जाति जाति व जुजुपिन्‍सं छन्‍त बिचाः संचा याइ, उबलय् छं परमप्रभु थःत मुक्ति बीम्‍ह, उद्धार याइम्‍ह व याकूबया दक्‍व शक्ति दुम्‍ह खः धकाः थुइकी। 
कँय्‌या पलेसा लुँ अले नँया पलेसा वहः जिं हये। सिँया पलेसा कँय् अले ल्‍वहंया पलेसा नँ हये। शान्‍तियात छंगु राज्‍य व धार्मिकतायात छंगु शासक दय्‌काबी। 
छंगु देशय् हाकनं गुबलें ल्‍वापुख्‍यापु न्‍यनेमाली मखु, छंगु सिमानाया दुने गुबलें स्‍यंगु व नाश जूगु न्‍यनेमाली मखु। तर छंगु पःखाःयात मुक्ति धकाः धाइ, अले छंगु मू ध्‍वाखायात प्रशंसा धकाः धाइ। 
न्‍हिनय् सूर्यनं छन्‍त गुबलें जः बी मखु, न तिमिलां हे छन्‍त जः बिया ज्‍वल्‍ल थीकी, छाय्‌धाःसा परमप्रभु हे छंगु निंतिं सदांया जः जुइ, छिमि परमेश्‍वर धाःसा छंगु महिमा जुयादी। 
छंगु सूर्य गुबलें बिनावनी मखु, छंगु तिमिला गुबलें मदयावनी मखु। परमप्रभु हे छंगु निंतिं सदांया जः जुयादी, अले छंगु दुःखया दिं मदयावनी। 
अनंलि छिमि फुक्‍क प्रजात धर्मी जुइ, इमिसं सदांया निंतिं देशय् अधिकार याइ। जिगु गौरव क्‍यनेत इपिं जिं पिनागु माचा थें खः, अले इपिं जिगु ल्‍हाःया ज्‍या खः। 
छिपिं मध्‍ये कम दुपिं द्वलंद्वः दःवइ, अले दक्‍वसिबय् चिधिकःपिं दक्‍वसिबय् तःधंगु जाति जुइ। जि परमप्रभु खः, वयागु इलय् जिं व याकनं हे पूवंके।” 
