﻿यशैया.
56.
परमप्रभुं थथे धयादी, “न्‍याय यायेगु त्‍वःते मते। छु पाय्‌छि जू व हे या, छाय्‌धाःसा जिपाखें उद्धार कायेगु दिं लिक्‍क वयाच्‍वंगु दु, अले जिगु धार्मिकता याकनं खनेदः वइ। 
व मनू धन्‍य खः गुम्‍हय्‌सिनं थ्‍व याइ, व मनू धन्‍य खः गुम्‍ह थ्‍व खँय् बलाक्‍क च्‍वनाच्‍वनी। गुम्‍हय्‌सिनं विश्रामबार अशुद्ध मयासें मानय् याइ, अले थःगु ल्‍हाःयात छुं नं मभिंगु ज्‍या यायेगुपाखें अलग तइ।” 
परमप्रभुनापं थःत बाचा च्‍यूम्‍ह सुं परदेशीं थथे मधायेमा, “धात्‍थें हे परमप्रभुं जितः थः प्रजापाखें अलग तयादीगु दु।” सुं नपुंसकं थथे मधायेमा, “स्‍व, जि गंगु सिमा थें खः।” 
छाय्‌धाःसा परमप्रभुं थथे धयादी, “जिगु विश्रामबार मानय् याइपिं, जितः यःथें ज्‍या याइपिं, अले जि व जि मनूतय्‌गु दथुइया बाचायात विश्‍वास यायेबहः जुयाः पालन याइपिं नपुंसकतय्‌त धाःसा, 
जिं जिगु देगलय् व उकिया पःखाःया दुने च्‍वंपिं काय् म्‍ह्याय्‌पिन्‍त स्‍वयाः अप्‍वः हनाबना याकेबी, अले इमित तसकं भिंगु नां बी। जिं इमित सदां दयाच्‍वनीगु नां बी। 
परमप्रभुया सेवा यायेत, परमप्रभुया नांयात माया यायेत व वय्‌कःया आराधना यायेत, विश्रामबार सदां मानय् यायेत अले जि व जि मनूतय्‌गु दथुइया बाचायात विश्‍वास यायेबहः जुयाः पालन यायेत परमप्रभुलिसें थःत मिलय् याःपिं परदेशीतय्‌त धाःसा, 
जिं जिगु पवित्र पर्वतय् हया। जिगु प्रार्थना यायेगु छेँय् लय्‌ताय्‌केबी। इमिसं जिगु वेदीइ छाःगु होमबलि व बलित जिं यय्‌के। छाय्‌धाःसा जिगु छेँ फुक्‍क जातितय्‌गु निंतिं प्रार्थनाया छेँ जुइ।” 
ज्‍वनायंकूपिं त्‍वःतकाः हःम्‍ह परमप्रभु परमेश्‍वरं थथे घोषणा यानादी, “छथाय् मुनाच्‍वंपिं बाहेक जिं मेपिन्‍त नं इपिंनापं हे छथाय् मुंके हये।” 
हे ख्‍यलय् च्‍वंपिं फुक्‍क पशुत, वा! हे गुँइ च्‍वंपिं पशुत वा, मनूतय्‌त क्‍वाप्‍प नयेत वा! 
इस्राएलया फुक्‍क पिवाःत कांपिं खः। इपिं फुक्‍कं ज्ञां मदुपिं खः। इपिं उइ मफुपिं खाखः खिचात थें खः। इपिं ग्‍वारातुली अले म्‍हगस खनी। इपिं द्येने जक मास्‍तिवय्‌काच्‍वनी। 
इपिं नये पित्‍याःपिं खिचात थें खः। इपिं गुबलें नये लुमधंपिं खः। इपिं मथूपिं जवाःत खः। इपिं फुक्‍क थथःगु हे लँपुइ जुयाच्‍वंगु दु। इमिसं थःत जक भिं यायेत स्‍वयाच्‍वनी। 
इपिं फुक्‍कसिनं थथे धाइ, “वा, जितः दाखमद्य हय्‌के ब्‍यु! झीसं अय्‌लाः नं यक्‍व त्‍वनेनु! कन्‍हय् नं थौं थें हे जुइ वा थौं स्‍वयाः अप्‍वः बांलाइ।” 
