﻿यशैया.
31.
धिक्‍कार छिमित, सु मिश्र देशय् ग्‍वाहालिया निंतिं वनी अले सलतय्‌के भरोसा तइ। अले इमिसं अल्‍याख रथत व सल गइपिनिगु तःधंगु शक्तिइ भरोसा याइ, तर इमिसं इस्राएलया पवित्र परमेश्‍वरपाखे स्‍वइ मखु अले परमप्रभुया ग्‍वाहालियात माली मखु। 
अय्‌नं वय्‌कः धाःसा तसकं बुद्धि दुम्‍ह जुयादी अले वय्‌कलं नाश हयादी फु अले थःगु वचन लित कयादी मखु। मभिंगु ज्‍या याइपिनिगु घराना व अधर्म ज्‍या याइपिन्‍त ग्‍वाहालि बीपिनिगु विरोधय् वय्‌कः दनादी। 
तर मिश्रीत ला मनूत जक खः परमेश्‍वर मखु। इमि सलत म्‍ह खः, आत्‍मा मखु। परमप्रभुं थःगु ल्‍हाः ल्‍ह्वनादीबलय् ग्‍वाहालि याइपिं लुफिं हाइ अले ग्‍वाहालि काःपिं क्‍वदली, इपिं निगू पुचलं छक्‍वलं नाश जुइ। 
परमप्रभुं जितः थथे धयादी, “गथे सिंह वा तःधिकःम्‍ह सिंहं थःगु शिकारयात घुर्रघुर्र याइ, अले वयागु विरोधय् जवाःतय् फुक्‍क पुचः दनी अय्‌नं इमिगु सलं व ग्‍याइ मखु, न इमिगु हा सलं व थुखे उखे सनी। व थें तुं दक्‍व शक्ति दुम्‍ह परमप्रभु सियोन पर्वत व वया डाँडाय् लडाइँ यायेत क्‍वहां झायादी। 
चखुंतय्‌सं थःगु स्‍वँयात रक्षा याःथें दक्‍व शक्ति दुम्‍ह परमप्रभुं यरूशलेमयात रक्षा यानादी। अले उकियात छुत्‍कारा यानादी। वय्‌कः उकियात पुलाः झायादी अले उकियात उद्धार यानादी।” 
हे इस्राएलीत, सुयागु विरोधय् छिमिसं तःधंगु विद्रोह याःगु दु, वय्‌कःपाखे लिहां वा। 
छाय्‌धाःसा व दिंखुन्‍हु छिपिं फुक्‍कसिनं थःगु पापी ल्‍हातं दय्‌कूगु वहः व लुँया मूर्तित वांछ्वइ। 
“अश्‍शूरीत तरवारं क्‍वःदलीतिनि, गुगु तरवार मनूतय्‌पाखें मखु। व हे तरवारं इपिं नाश जुइतिनि, गुगु सीमानीपिं मनूतय्‌गु मखु। व तरवारया न्‍ह्यःनं इपिं बिस्‍युं वनी। अले इमि ल्‍याय्‌म्‍हपिं मनूतय्‌त दासयात थें ज्‍या याकी। 
इमि जुजु ग्‍यानाः बिस्‍युं वनी अले इमि सेनापतित लडाइँया ध्‍वाँय् खनाः ग्‍यानाः आत्ते जुइ।” परमप्रभु, सुयागु मि सियोनय् अले भट्टी यरूशलेमय् दु, वय्‌कलं धयादीगु दु। 
