﻿यशैया.
27.
व दिंखुन्‍हु, परमप्रभुं थःगु ग्‍यानापुगु, तच्‍वःगु शक्तिं व तच्‍वकं ज्‍वःगु तरवारं सुल्‍ल न्‍ह्याइम्‍ह व हितु हीम्‍ह सर्प लिव्‍यातन्‌यात सजाँय बियादी, अले व समुद्रया तःधिकःम्‍ह अजिङ्‌गरयात स्‍यानादी। 
व दिंखुन्‍हु, “फल सइगु छगू बांलाःगु दाखक्‍यबया बारे म्‍ये हा– 
जि परमप्रभु, वयात सुसाःकुसाः याये। जिं उकी लः बियाच्‍वने। जिं चान्‍हि वयागु वास्‍ता याये, मखुसा वयात सुनानं स्‍यंकाबीफु। 
जि तंम्‍वयागु मदु। झाःत व कंमात बुया वयाः जितः पंगु जूसा जि इपिंनापं लडाइँ याःवनेगु जुइ। जिं इमित मि च्‍याकीगु जुइ। 
तर जिमि शत्रुत जिं रक्षा याःगु यय्‌काच्‍वंगु दु धयागु खःसा इमिसं जिनापं मिलय् जुइमा। खः, धात्‍थें इपिं जिनापं मिलय् जुइमा।” 
आः वइगु दिनय् याकूबया सन्‍तान इस्राएलया मनूतय्‌सं हा कयाच्‍वनी। अले इस्राएल मुखू ह्वयावइ व फल सय्‌की अले फुक्‍क पृथ्‍वी फलं जाइ। 
छु शत्रुतय्‌त कय्‌कू थें वय्‌कलं इस्राएलयात कय्‌कूगु, मदु ला? छु वं इमि शत्रुतय्‌त स्‍याः थें इमित स्‍यागु, मदु ला? 
वय्‌कलं थः प्रजायात सजाँय बीत देशं पितिना छ्वयादी। पुर्बं क्‍वाःगु फय् वइगु दिनय् थें थःगु तच्‍वःगु तमं वय्‌कलं इमित बिसिकेछ्वल। 
थुकिं याकूबया अर्धम्‍हयात पुइकायंकी, वय्‌कलं इमिगु पाप चिकाः छ्‌इबलय् थ्‍व लिच्‍वः जुइ– इमिसं वेदीया फुक्‍क ल्‍वहंत भ्‍वसाभ्‍वसा वंगु तुयुगु ल्‍वहं थें चुंचुं याइबलय् अशेरा द्यःमय्‌जुया थां व धुपाँय् च्‍याकीगु वेदीत हाकनं थनी मखु। 
रक्षा यानातःगु शहर झिजांमिजां जुल अले त्‍वःतातःगु थाय् मरुभूमि थें जुल। अन साचात ज्‍वयेगु याइगु खः, अन इपिं आराम काइगु खः अले इमिसं अनया कचात द्येनाः नांगां यानाबी। 
गुबलय् अनयागु चिचीधंगु कचात गनावनी, उबलय् व त्‍वःथुलाबी अले मिसात वयाः उपिं मि तयाः छ्वय्‌काबी। छाय्‌धाःसा थ्‍व थु हे मथूगु छगू जाति खः। अथे जुयाः इमित दय्‌कादीम्‍हय्‌सिनं इमित दया यानादी मखु, अले इमित सृष्‍टि यानादीम्‍हय्‌सिनं इमित माया यानादी मखु। 
व दिंखुन्‍हु परमप्रभुं न्‍ह्यानाच्‍वंगु यूफ्रेटिस खुसिंनिसें मिश्रया खुसि तक हे थःगु अन्‍न दायाछ्वइ। अय् इस्राएलीत, छिपिं धाःसा छम्‍ह छम्‍ह यानाः मुंकादी। 
व दिंखुन्‍हु छगू तःधंगु तुरही पुइ। अश्‍शूरय् नाश जूपिं व मिश्र देशय् ज्‍वनायंकूपिं वयाः यरूशलेमया पवित्र पर्वतय् परमप्रभुया आराधना याइ। 
