﻿यशैया.
23.
टुरोसयाबारे अगमवाणी – अय् तर्शीशया जहाज, विलाप या, छाय्‌धाःसा टुरोसयात नाश याये धुंकूगु दु अले अन न छखा छेँ दु, न जहाजत दिकेगु थाय् दु। साइप्रसं छगू खँ इमिथाय् वःगु दु। 
अय् टापुया मनूत, अय् सीदोनया बन्‍जाःत! गुपिन्‍त समुद्रय् च्‍वंपिं बन्‍जाःतय्‌सं तःमि यानाब्‍यूगु खः, छिपिं सुम्‍क च्‍वँ। 
तःधंगु लखय् शिहोरया अन्‍न वल, नील खुसिया बाली टुरोसया कमाइ खः। अले व देश जाति-जातितय्‌गु व्‍यापार यायेगुथाय् जुल। 
अय् सीदोन व समुद्रय् लिक्‍क लाःगु किल्‍ला, लज्‍या चा, छाय्‌धाःसा समुद्रं थथे धाःगु दु, “न जि ला मचाबू ब्‍यथा जूम्‍ह थें, न जिं मचा बुइकूगु दु। जिं न काय्‌मचा ब्‍वलंकागु दु, न म्‍ह्याय्‌पिन्‍त तःधिक यानागु दु।” 
थ्‍व बुखँ मिश्र देशय् थ्‍यनीबलय् टुरोस शहरया बुखँ न्‍यनाः इपिं तसकं विलाप याइ। 
तर्शीशपाखे हुँ! अय् समुद्रया सिथय्‌यापिं मनूत विलाप या! 
छु थ्‍व छिमिगु लसता हनेगु शहर खः ला? व दक्‍वसिबय् पुलांगु शहर। उकियागु तुतिं वयात तसकं दुःखकष्‍ट बीत तापाःगु देशय् थ्‍यंकाः ब्‍यूगु मखु ला? 
श्रीपेच इनाजुइगु टुरोस शहर, गुम्‍हय्‌सिगु बन्‍जाःत राजकुमारपिं थें च्‍वनीगु खः व तसकं नांजाःपिं खः। सुनां टुरोसय् थ्‍व विपत्ति हल? 
तःधंछुया जुइगु व शहरयागु फुक्‍क गौरवयात क्‍वह्यंकाबीत, पृथ्‍वीया सकलें नां जाःपिन्‍त क्‍वमिलु यानादीत दक्‍व शक्ति दुम्‍ह परमप्रभुं थ्‍व ग्‍वसाः ग्‍वयादीगु दु। 
अय् तसकं बांलाःगु तर्शीशयापिं मनूत, नील खुसिया सिथय् थें बुँ पा, छाय्‌धाःसा आः छंगु छगू नं जहाज दिकेगु थाय् मदये धुंकल। 
परमप्रभुं थःगु ल्‍हाः समुद्रय् चकंकादीगु दु। अले जःखः च्‍वंगु राज्‍ययात थरथर खाके बियादीगु दु। वय्‌कलं फोनिकेया किल्‍लात नाश यायेत उजं बियादीगु दु। 
वय्‌कलं धयादिल, “अय् कुमारी सीदोन, आः छं गुबलें नं लसता हने खनी मखुत। दं, साइप्रस टापुपाखे हुँ, छन्‍त अन नं आराम दइ मखु।” 
बेबिलोनीतय् देशयात स्‍व, व जातियागु आः छुं नं ल्‍याःचाः मन्‍त। अश्‍शूरीतय्‌सं उकियात मरुभूमिया पशुततय्‌गु निंतिं थाय् दय्‌कूगु दु। इमिसं घेरय् यायेगु धरहरात दय्‌कल अले उकिया किल्‍लात धाःसा नाश यानाः झिजांमिजां यानाबिल। 
अय् तर्शीशया जहाजत, विलाप या, छिमिगु किल्‍ला नाश याःगु दु। 
व इलय् टुरोसयात न्‍हयेदँ तक अथे धयागु छम्‍ह जुजुया जिवंकाःछि तक ल्‍वःमंकी। तर न्‍हयेदँ पूवने धुंकाः टुरोस छम्‍ह वेश्‍याया थ्‍व म्‍ये थें जुइ, 
“अय् ल्‍वमंके धुंकूम्‍ह वेश्‍या, वीणा ज्‍वनाः शहरया दथुइ हुँ। वीणा था, यक्‍व म्‍ये हा, हाकनं छन्‍त लुमंकेगु याइ।” 
न्‍हयेदँया दकलय् लिपा परमप्रभुं टुरोसयात वास्‍ता यानादी अले व हाकनं वेश्‍याया ज्‍याय् हे लिहांवनी, अले पृथ्‍वीया फुक्‍क राज्‍यतनापं वं व्‍यापार याइ। 
अय्‌नं वयागु लबः व वं कमय् याःगु परमप्रभुया निंतिं अलग तइ। वं कमय् याःगु धन मुंकेगु याइ मखु। वयागु ब्‍यापारं वःगु लबः परमप्रभुया मनूतय्‌गु निंतिं माक्‍वः नयेगु नसा व पुनेत बांबांलाःगु वसःया निंतिं जुइ। 
