﻿यशैया.
21.
समुद्र सिथय्‌या मरुभूमिया बारे अगमवाणी– मरुभूमिइ ग्‍वःफय् वः थें छगू ग्‍यानपुगु देशं तःधंगु विनाश वइतिनि। 
जिं तसकं ग्‍यानापुगु दर्शन खनागु दु तसकं धोखा बीम्‍हं धोखा बी, लुतय् याइम्‍हय्‌सिनं लुतय् याइ। अय् एलाम, हमला या, अय् मादी, शहरयात घेरा लगय् या! बेबिलोनं ब्‍यूगु दुःखकष्‍ट परमप्रभुं दिकादी। 
अनंलि जिगु म्‍ह तसकं कष्‍टं जायावल। व दुःखकष्‍ट मचाबू ब्‍यथा जूम्‍ह मिसायागु थें च्‍वं। जिं छु न्‍यना उकिं जिगु छ्यं क्‍वछुल जिं छु खनाः उकिं जिगु नुगः क्‍वतुन, 
जिगु नुगः थातय् मलाना च्‍वंगु दु। जि ग्‍यानाः थरथर खानाच्‍वंगु दु। जिं मनंतुनाच्‍वनागु सन्‍ध्‍याकाः ई नं जिगु निंतिं तच्‍वःगु भय जूगु दु। 
इमिसं तेबिल मिलय् याइ। गलैंचा लाइ। अले नयेगु व त्‍वनेगु नं याइ। “अय् हाकिमत दं, ढालय् चिकं ति।” 
परमप्रभुं जितः थथे धयादीगु दु, “हुँ, छम्‍ह पाले ति। वं छु खंगु दु उकिया बारे तसलं धयाबीमा। 
वं सलया पुचःत दुगु रथत, अले गधात गयावःपिं व ऊँटत गयावःपिं वयाच्‍वंगु खनीबलय्, वं तसकं ध्‍यान बीमाः।” 
व पालें थथे धकाः तःसलं हाला हल, “हे प्रभु जि न्‍हियान्‍हिथं पिवाच्‍वनेगु धरहराय् दनाच्‍वनागु दु, अले चच्‍छिं चच्‍छिं मद्यंसे पिवाच्‍वनेगु थासय् च्‍वनाच्‍वनागु दु। 
स्‍वयादिसँ! सलया पुचः दुगु रथय् छम्‍ह मनू वयाच्‍वंगु दु। अले वं लिसः बियाः थथे धाइ, ‘बेबिलोन स्‍यने धुंकूगु दु, उकिया कतां कियाः दय्‌कातःगु मूर्तित कुचा कुचा जुयाः बँय् कुतुं वयाच्‍वंगु दु।’” 
अय् जिमि प्रजा, दाइँ याइगु खलय् हायातःपिं! दक्‍व शक्ति दुम्‍ह परमप्रभु इस्राएलया परमेश्‍वरपाखें जिं छु न्‍यनागु दु, व जिं छिमित धाये। 
दुमाया बारे अगमवाणी– अय् पाः च्‍वनीपिं पालेत चा गुलि ल्‍यंदनि? अय् पाःच्‍वंम्‍ह पाले चा गुलि ल्‍यंदनि? सुं छम्‍हय्‌सिनं सेइरपाखें जितः धयाच्‍वंगु दु। 
पाःच्‍वंम्‍ह पालें लिसः बिल, “सुथ जुइन अले चान्‍हय् नं जुइन। छं छुं न्‍यनेमाःगु दःसा न्‍यं, अले हाकनं लिहां वा।” 
अरबया बारे अगमवाणी– अय् अरब देशया झालय् बाय् च्‍वनीपिं ददानी बन्‍जातय् पुचः, 
प्‍याःचाःपिनिगु निंतिं लः हयाब्‍यु! अय् तेमाय् च्‍वंपिं मनूत, शरण काःवःपिनिगु निंतिं नसा हयाब्‍यु! 
इपिं तरवारपाखें, नांगागु तरवारपाखें, चाःतुगु धनुष वाणपाखें व तःधंगु ल्‍वापुपाखें बिस्‍युं वनी। 
परमप्रभुं जितः थथे धयादी, “दच्‍छि तक ज्‍यालां ज्‍या याइम्‍हं च्‍यःनं दँ ल्‍याःखाःथें, दच्‍छिं हे केदारया फुक्‍क महिमा अन्‍त जुइ। 
धनुष वाण कय्‌किपिं, केदारयापिं तसकं बल्‍लाःपिं मध्‍ये बचय्‌जूपिं कम जक ल्‍यं दइ।” परमप्रभु इस्राएलया परमेश्‍वरं थथे हे धयादीगु दु। 
