﻿यशैया.
18.
धिक्‍कार! क्‍वःबुइँचाया पपूया सलं जाःगु देशयात, गुगु कूश देशया खुसि लिक्‍क दु, 
व देशं तिंकथिं दय्‌कातःगु नांचां नील खुसिया लँ जुयाः राजदूतत वइगु खः। हे याकनं ब्‍वायं वनेफुपिं राजदूतत, ततःधिकःपिं व चुलुसे च्‍वंगु म्‍ह दुपिं मनूतय् जातियाथाय् हुँ, इपिं खनाः लिक्‍क च्‍वंपिं व तापाक्‍क च्‍वंपिं तसकं ग्‍याइ इपिं तसकं बल्‍लाःपिं व त्‍याके फुपिं खः, इपिं अजू चाइपुगु भाय् ल्‍हाइपिं खः, इमिगु देश खुसिं ब्‍वथलातःगु दु। 
हे पृथ्‍वीइ च्‍वंपिं मनूत, न्‍यँ! पर्वतया च्‍वकाय् छगू चिंया ध्‍वाँय्‌यात स्‍व! तुरही पूगु सःयात न्‍यँ! 
परमप्रभुं जितः थथे धयादी, “तसकं छाःगु निभाः वा बाली लयेगु इलय् सुतिया सुपाँय् थें जि सुम्‍क च्‍वने अले जि च्‍वनागु थासं स्‍वये।” 
छाय्‌धाःसा बाली लये न्‍ह्यः हे स्‍वां ह्वयाः कुतुंवने धुंकीबलय्, अले दाख पाकय् जुइबलय्, वय्‌कलं व कचायात ईंचां न्‍हायादी अले न्‍यनावंगु कचायात नं पालाछ्वयादी। 
इपिं फुक्‍कसिगु सीम्‍हतय्‌त झंगःत व गुँपशुतय्‌गु निंतिं त्‍वःताबी। उपिं सीम्‍हतय्‌त तान्‍वःबलय् झंगःतय्‌सं नइ अले चिकुलाबलय् गुँपशुतय्‌सं नइ। 
उबलय् दक्‍व शक्ति दुम्‍ह परमप्रभुया न्‍ह्यःने ततःधिकःपिं व चुलुसे च्‍वंगु म्‍ह दुपिं मनूतय् जातिं कोसेलि हइ, इपिं खनाः लिक्‍क च्‍वंपिं व तापाक्‍क च्‍वंपिं तसकं ग्‍याइ इपिं तसकं बल्‍लाःपिं व त्‍याके फुपिं खः, अजू चायापुगु भाय् ल्‍हाइपिं सुयागु देश खुसिं ब्‍व ब्‍वथलातःगु दु। दक्‍व शक्ति दुम्‍ह परमप्रभुया नां दुगु थाय्, सियोन पर्वतय् हे थ्‍व जातियापिं मनूतय्‌सं परमप्रभुयाथाय् कोसेलि हइ। 
