﻿यशैया.
10.
धिक्‍कार इमित, सुनां मभिंगु व्‍यवस्‍था दय्‌की, सुनां मेपिन्‍त क्‍वत्‍यलिगु नियम दय्‌की, 
गरीबतय्‌गु अधिकार लाकाकायेत व क्‍वत्‍यलातःपिं जिमि प्रजातय्‌गु खःकथं न्‍याय मयायेत अले भाःत सी धुंकूपिं व मांबौ मदुपिनिगु सम्‍पत्ति लाकाकायेत इमिसं थथे याइगु खः। 
सजाँयया दिं व तापाकं वइगु आपत विपत वइबलय् छिमिसं छु यायेगु? छिपिं ग्‍वाहालिया निंतिं गन वनेगु? छिमिगु धन-सम्‍पत्ति गन त्‍वःतावनेगु? 
छिपिं कैदीत जुयाः लुफिं हानाः क्‍वःदइ वा सीपिनिगु दथुइ लानाच्‍वनी। अज्‍ज नं वय्‌कःया तं क्‍वलाःगु मदुनि, अले वय्‌कःया ल्‍हाः ल्‍ह्वनातःगु हे दनि। 
परमप्रभुं धयादिल, “अश्‍शूरीतय्‌त धिक्‍कार, सुयागु ल्‍हातय् जिगु तंया कथि, तंया तुतां दु! 
जितः तंम्‍वय्‌किपिं परमेश्‍वरयात मानय् याइ मखुपिनिगु देशय् हमला यायेत जिं अश्‍शूरीतय्‌त छ्वयाहयागु दु। लँय् च्‍वंगु धूयात तुतिं न्‍हुतुन्‍हू थें मनूतय्‌त न्‍हुत्तुन्‍हुयेत व लुतय् यानाकायेत जिं अश्‍शूरीतय्‌त छ्वयाहयागु दु।” 
तर थ्‍व वयागु इच्‍छा मखु अले वयागु मनय् थज्‍याःगु बिचाः नं मदु। अय्‌नं वयागु बिचाः यक्‍व जातित नाश यायेगु खः। 
अश्‍शूरया जुजुं धाल, “छु जिमि सेनापतित फुक्‍क जुजु मखु ला? 
छु कल्‍नो, कर्कमीश थें मच्‍वं ला? छु हमात अर्पाद थें व सामरिया दमस्‍कस थें मच्‍वं ला? 
गथे जिगु ल्‍हातं मूर्ति पुजा याइगु राज्‍यत त्‍याकल, गुगु थासय् कतां कियाः दय्‌कातःगु मूर्तित यरूशलेम व सामरियाय् स्‍वयाः अप्‍वः दु। 
छु जिं सामरियाय् व अन च्‍वंगु मूर्तितय्‌त यानागु व्‍यवहार थें यरूशलेम व अन च्‍वंगु मूर्तितय्‌त मयायेगु ला?” 
परमप्रभुं सियोन पर्वत व यरूशलेमया विरोधय् थःगु फुक्‍क ज्‍या यानादी धुंकाः वय्‌कलं धयादी, “जिं अश्‍शूरया जुजुया नुगःया तःधंसू व घमण्‍डी मिखाया निंतिं सजाँय बी। 
छाय्‌धाःसा वं धाइ, “‘जिगु ल्‍हाःया बलं व जिगु हे बुद्धिया कारणं थ्‍व यानागु खः, छाय्‌धाःसा जिके दुग्‍यां दु। जिं देश देशया सिमानात मदय्‌का छ्वयागु दु अले इमिगु धुकूत लुतय् याना हयागु दु। जि छम्‍ह तसकं बल्‍लाःम्‍ह मनुखं थें इमि जुजुयात क्‍वत्‍यलागु दु। 
सुं छम्‍हय्‌सिनं चखुंया स्‍वँय् ल्‍हाः तः थें जिगु ल्‍हाः नं यक्‍व सम्‍पत्ति दुगु फुक्‍क देशय् थ्‍यंगु दु। त्‍वःताथकूगु खेँय् सुं मनुखं मुंका यंकु थें जिं फुक्‍क देशयात मुंकागु दु। अय्‌नं अन सुनानं पपू मसंकू अले चूँ-चूँ चीँ-चीँ हाला हःगु नं मदु।’” 
छु पां वयात छ्यलीम्‍ह मनू स्‍वयाः थःत तःधं याये फइ ला? छु कःतिं थःत छ्यलीम्‍ह स्‍वयाः थःत तःधं याये फइ ला? धाय्‌की तुतां छ्यलीम्‍हय्‌सित तुतांम्‍ह हे छ्यःगु थें अथवा गुगु सिँ मखु उकियात सिँयागु मुगःचां ल्‍ह्वंगु थें। 
अथे जुयाः प्रभु, परमप्रभु दक्‍व शक्ति दुम्‍ह परमप्रभुं वया तसकं बल्‍लाःपिं सिपाइँतय् दथुइ नाश यायेत ल्‍वय् छ्वयाहयादी, अले वयागु गौरवयात तसकं च्‍याःगु मिं छ्वय्‌कादी। 
इस्राएलया जः, पवित्र परमेश्‍वरया तच्‍वकं च्‍याःगु मि खः। अले छन्‍हुं हे इमिगु कंमा व झाःतय्‌त वय्‌कःया तच्‍वकं च्‍याःगु मिं भस्‍म यानाबी। 
जंगलयागु गौरव परमप्रभुं भस्‍म यानादी, अले इमिगु बांलाक अन्‍न सइगु बुँत दक्‍व भस्‍म यानादी, गथे तच्‍वःगु ल्‍वचं म्‍हंमफया च्‍वंम्‍ह मनूयात स्‍याइ। 
इमिगु जंगलय् ल्‍यं दुगु सिमात कम जक जुइ अथे जुयाः इपिं ला मचातय्‌सं नं ल्‍याः खानाः च्‍वये फइ। 
उखुन्‍हु इस्राएलया बचय्‌जूपिं, याकूबया परिवारया म्‍वानाच्‍वंपिन्‍सं थःत हमला याःपिन्‍के गुबलें नं भलसा तइ मखु। परमप्रभु इस्राएलया पवित्र परमेश्‍वरयात धाःसा धात्‍थें हे भलसा याइ। 
इस्राएलया कम मनूत जक दक्‍व शक्ति दुम्‍ह परमेश्‍वरयाथाय् लिहां वइ। 
हे इस्राएल, छिमि सन्‍तान समुद्रय् च्‍वंगु फि थें यक्‍व दुसां ल्‍यंदुपिं जक लिहां वइ। परमप्रभुं थः मनूतय्‌त नाश यायेगु पक्‍का क्‍वःछिनादीगु पाय्‌छि जू। 
छाय्‌धाःसा प्रभु, दक्‍व शक्ति दुम्‍ह परमप्रभुं याकनं हे फुक्‍क देशया न्‍याय यानादी। 
अथे जुयाः दक्‍व शक्ति दुम्‍ह परमप्रभु परमेश्‍वरं थथे धयादी – “हे सियोनय् च्‍वनीपिं जिमि प्रजा, अश्‍शूरीत खनाः ग्‍याये मते। यक्‍व न्‍हापा मिश्रीतय्‌सं थें छिमित कथिं दायाः तसकं दुःखकष्‍ट ब्‍यूसां छिपिं ग्‍याये मते। 
आः छुं ई लिपा हे जिं छिमिगु विरोधय् पिकयागु तं क्‍वलाइ। अले जिं छिमिगु नाशया निंतिं पिकयागु तं अश्‍शूरीतपाखे वनी।” 
दक्‍व शक्ति दुम्‍ह परमप्रभुं ओरेबया तग्‍वःगु ल्‍वहं लिक्‍क मिद्यानीतय्‌त कय्‌काः क्‍वदय्‌कू थें वय्‌कलं इमित कोर्रां दाइतिनि। अले वय्‌कलं मिश्र देशय् थें थःगु कथि समुद्र च्‍वय् ल्‍ह्वनादी। 
उखुन्‍हु इमिगु कु छिमिगु ब्‍वहलय् व इमिगु ककुसिँ छिमिगु गःपतं चीकाछ्वइ वय्‌कलं दासत्‍वया जुवा त्‍वःथुलादी अले थुकियात छिमिगु ब्‍वहलं चीकादी। 
स्‍व, अश्‍शूरीत अय्यात शहर दुने दुहां वन। इपिं मिग्रोनपाखें जुयाः वनी। मिकमाशय् इमिसं थःगु सामानत तइ। 
इपिं घाटी जुयाः वन, अले थथे धाइ, “झीपिं गेबाय् बाय् च्‍वने।” रामाय् च्‍वंपिं थुरथुर खाइ। अले शाऊलया शहर गिबाय् च्‍वंपिं फुक्‍क मनूत थथःगु छेँय् बिस्‍युं वनी। 
हे गल्‍लीमयापिं मनूत, तःसलं हा! हे लैशा, ध्‍यान बिया न्‍यँ! नुगः मछिंम्‍ह अनातोत! 
मदमेना बिस्‍युं वंगु दु, गबीमया मनूत सुपीगु दु। 
थौं हे इपिं नोबय् दिपाः कयाच्‍वन। सियोन पर्वतय्, यरूशलेमया डाँडाय् मुक्‍का क्‍यनी। 
अय्‌नं स्‍व! प्रभु, दक्‍व शक्ति दुम्‍ह परमप्रभुं तःमागु सिमायागु कचात न्‍हायादी। अनयागु तम्‍मागु सिमायात क्‍वथला चीमा यानादी। 
वय्‌कलं जंगलयागु सिमायात पां पालादी अले बल्‍लाःम्‍हय्‌सिगु न्‍ह्यःने लेबनान क्‍वदली। 
