﻿यशैया.
8.
परमप्रभुं जितः धयादिल, “तःपागु ग्‍वरः छपा का अले उकी हंचां कियाः ‘महेर-शालल-हाज-बज’ धकाः च्‍व।” 
अले थुकियात पक्‍का यायेत जिं उरियाह पुजाहारी व येबेरक्‍याहया काय् जकरियायात सःता। इपिं निम्‍हय्‌सिनं जिगु विश्‍वास यायेबहःपिं जुयाः साक्षी बिल। 
अनंलि जि थः कलाः अगमवादिनीयाथाय् जि वनाः नापं द्यना अले वया प्‍वाथय् दयाः छम्‍ह काय् बुइकल। अनंलि परमप्रभुं जितः धयादिल, “वयागु नां ‘महेर-शाललहाज-बज’ ति। 
मचां ‘जिमि अबु’ व ‘जिमि मां’ धाये सय्‌के न्‍ह्यः हे दमस्‍कसया फुक्‍क धन व सामरियाय् लुतय् यानाहःगु सामान अश्‍शूरया जुजुं यंकी।” 
अले परमप्रभुं हाकनं जितः धयादिल – 
“थुपिं यहूदाया मनूतय्‌सं शान्‍तं न्‍ह्यानाच्‍वंगु शीलोया लःयात हेला यानाः जुजु रसीन व रमल्‍याहया काय् जुजु पेकहपिंलिसें लसता हंगुलिं, 
आः स्‍वः, परमप्रभुं यूफ्रेटिस तसकं खुसिबाः वयाः इमित त्‍वपू थें, अश्‍शूरया जुजु व वया महिमायात यहूदाय् हमला यायेत हयाबी। खुसिबाः वइबलय् खुसिया लः तसकं ब्‍वाँय् वं थें इपिं नं ब्‍वाँय् वइतिनी। 
इपिं खुसिबाः थें न्‍ह्यानाः यहूदा थ्‍यंक हे वइ। अले लः जायाः गःपः थ्‍यंक हे थ्‍यनी। इमिसं तःधिकःम्‍ह झंगलं ब्‍वय्‌कातःगु पपुतिं थें छगुं देशयात त्‍वपुयाबी, हे इम्‍मानुएल!” 
हे जाति जातियापिं मनूत तसकं हा! थरथर खाखां छथाय् मुं! हे पृथ्‍वीया तापाक्‍क तापाक्‍क देशय् च्‍वंपिं मनूत, न्‍यँ, लडाइँ यायेत तयार जु तर भय का! खः धात्‍थें हे भय का। 
थःपिनिगु निंतिं उपायत दय्‌कि तर उपिं ताःलाइ मखु। गुलि खँ ल्‍हाये मास्‍ति व ल्‍हा तर उपिं फुक्‍क ताःलाइ मखु, छाय्‌धाःसा परमेश्‍वर जिपिंनापं दी। 
थुपिं मनूतय्‌गु लँपुइ जुइ मते धकाः थःगु तःधंगु शक्तिं परमप्रभुं जितः ख्‍याच्‍वः बियादीगु दु। वय्‌कलं जितः थथे धयादी, 
“गुगु नं खँयात थुमिसं जाः ग्‍वयातःगु धकाः धाइ उकियात छं पत्‍याः याये मते। छु खं इपिं ग्‍याइ छ ग्‍याये मते अले नुगः भाराभारा मिंके मते। 
दक्‍व शक्ति दुम्‍ह परमप्रभुयात पवित्र भाःपियेमाः। वय्‌कःया भय का। वय्‌कः खनाः थरथर खा। 
वय्‌कः हे छ च्‍वनेगु थाय् जुयादी, तर इस्राएलया निगुलिं घराना निंतिं वय्‌कः छग्‍वः ल्‍वहं जुयादी। अले मनूत व हे ल्‍वहँतय् लुफिं हानाः क्‍वःदइ। व इमिगु निंतिं तक्‍यनीगु जाः थें खः। 
अप्‍वः थें मनूत लुफिं हानाः क्‍वःदइ, इपिं चुंचुं जुइ, इपिं जालय् तक्‍यनी अले इमित ज्‍वनाः कुनाबी।” 
थ्‍व साक्षी चिनाब्‍यु अले परमेश्‍वरं थ्‍व स्‍यनातःगु खँ जिमि चेलातय् दथुइ झौ छाप तयाः बन्‍द यानाब्‍यु। 
याकूबया घरानापाखें थःगु ख्‍वाः फहिकादीम्‍ह परमप्रभुयाके हे जिं भरोसा तयाच्‍वने। 
जि व परमप्रभुं जितः बियादीपिं काय्‌म्‍ह्याय्‌पिं थन हे दु। सियोन पर्वतय् च्‍वनादीम्‍ह दक्‍व शक्ति दुम्‍ह परमप्रभुयापाखें जिपिं इस्राएलय् चिं व छुमा खः। 
गुबलय् छिमित मनूतय्‌सं झंगःत थे चुंइ चुंइ हालीपिं तन्‍त्रमन्‍त्र याइपिंलिसे सल्‍लाह का हुँ धकाः धाइ। छु मनूतय्‌सं परमेश्‍वरयाथाय् वनाः सल्‍लाहया निंतिं न्‍यं वनेमाःगु मखु ला? म्‍वापिनिगु निंतिं सीधुंकूपिन्‍थाय वनाः छाय् न्‍यंवनेगु? 
परमेश्‍वरं छिमित स्‍यनातःगु खँ व साक्षीइ ध्‍यान ब्‍यु! इमिसं थ्‍व स्‍यनातःगु खँ कथं न्‍वमवात धाःसा इमिके सुथसिया जः दइ मखु। 
इपिं तसकं कष्‍टय् लाना नयेपित्‍याकाः देशय् चाचाःहिलाजुइ। उबलय् इमित तसकं नयेपित्‍याइ, इपिं तसकं तंम्‍वइ अले च्‍वय् स्‍वयाः थः जुजु व थः परमेश्‍वरयात सराः बी। 
अनंलि इमिसं पृथ्‍वीपाखे स्‍वइबलय् अन दुःख, खिउँगु व ग्‍यानपुसे च्‍वंगु सिबय् मेगु छुं खनी मखु। अले इमित खिउँगुलिइ वांछ्वइगु जुइ। 
