﻿यशैया.
4.
व दिनय् न्‍हय्‌म्‍ह मिसातय्‌सं छम्‍ह मनूयात ज्‍वनाः थथे धाइ, “जिमिसं थःपिनिगु हे नसा नये अले थःम्‍हं हे जिमिगु निंतिं वसः ज्‍वरय् याये, बरु छि हे जिमि भाःत खः धकाः जिमित धाये बियादिसँ अले जिमित हेपय् याइगुपाखें बचय् यानादिसँ।” 
व दिनय्, परमप्रभुया कचाय् बांलाक फल सइ अले झःझः धाइ अले इस्राएलय् बचय् जुयाच्‍वंपिं फुक्‍कसिगु निंतिं जमिनया फल छगू लसता व गौरवयागु जुइ। 
सियोनय् त्‍वःताथकूपिं व यरूशलेमय् ल्‍यनाच्‍वंपिं अथे धइगु यरूशलेमय् च्‍वंपिं धकाः नां च्‍वयातःपिं फुक्‍कसित पवित्रपिं मनूत धकाः धाइ। 
परमप्रभुं निसाफया आत्‍मा व मिया आत्‍मापाखें सियोनया मिसातय्‌गु फोहर सिलादी धुंकाः अले यरूशलेमया हिया दाग शुद्ध यानादी धुंकाः थथे जुइ। 
अनंलि सियोन पर्वतय् व अन मुनाच्‍वंपिं मनूतय्‌के परमप्रभुं न्‍हिनय् सुपाँय् व चान्‍हय् कुँ व मित्‍याः छ्वयाहयादी। फुक्‍क शहरयात परमेश्‍वरया महिमां त्‍वपुइ अले रक्षा यानादी। 
वय्‌कःया महिमां शहरतय्‌के न्‍हिनय् निभालं बचय् जुइत किचः व ग्‍वःफसं व वां बचय् जुइत सुपिलिगु थाय् दय्‌कादी। 
