﻿यशैया.
3.
स्‍व, प्रभु, दक्‍व शक्ति दुम्‍ह परमप्रभुं यरूशलेम व यहूदाय् मदय्‌कं मगाःगु फुक्‍क सामान व ग्‍वाहालि याइपिं मनूत यंकेत्‍यंगु दु। गथेकि– नसा, लः, 
तसकं बल्‍लाःपिं मनूत, सिपाइँत, न्‍यायकर्तात व अगमवक्तात, साइत स्‍वइपिं, थकालित, 
नेय्‌म्‍हय्‌सिया कप्‍तान व तःधंपिं हाकिमत, सल्‍लाहबीपिं, कारिगरत, जादु क्‍यनीपिं। 
परमप्रभुं थथे धयादी, “जिं ल्‍याय्‌म्‍हपिन्‍त हाकिमत दय्‌काबी अले मचातय्‌सं इमित शासन याइ।” 
मनूत छम्‍हय्‌सिनं मेम्‍हय्‌सित क्‍वत्‍यलेगु याइ, मनूत छम्‍ह मेम्‍हय्‌सिगु विरोधय् दनी, जःलाखःलाया विरोधय् मेपिं जलाःखलाः, बुरातय्‌गु विरोधय् ल्‍याय्‌म्‍हपिं, हनेबहःपिनिगु विरोधय् क्‍वह्यंपिं दनी। 
व दिं वइतिनी, मनूतय्‌सं थः हे बौया छेँ छम्‍ह दाजुयात ज्‍वनाः थथे धाइ, “छंके ला फीत तपाःलं दु, थ्‍व नाशया द्वंलय् छ हे जिमिगु नायः जुयाब्‍यु।” 
तर वं थथे लिसः बी, “जि जुइ फइ मखु! जिं छिमित छुं हे ग्‍वाहालि याये फइ मखु। जिके लं व नसा मदु। छिमिसं जितः छिमि नायः याये मते।” 
धात्‍थें, यरूशलेम छ्यालब्‍याल जुइ, अले यहूदा तनावनी, इमिसं ल्‍हाना जूगु खँ व याना जूगु ज्‍या परमप्रभुया विरोधय् जुइ। इमिसं परमप्रभुया महिमायात हेला याइ। 
इमिगु दोष ख्‍वालं हे सी दु। सदोमया मनूतय्‌सं थें इमिसं थःगु पाप क्‍यना जुइ। इमिसं थुकियात सुचुका तइ मखु। धिक्‍कार इमित! इमिसं थःगु नाश थःम्‍हं हे हःगु दु। 
धर्मी मनूतय्‌त धा, “छिमित भिं हे जुइ, छिमिसं थःम्‍हं याःगु ज्‍याया सिरपाः कायेखनी।” 
धिक्‍कार दुष्‍टतय्‌त! दुष्‍ट मनूतय्‌गु धाःसा पक्‍का हे नाश जुइ। अले इमिगु ल्‍हातं याःगु ज्‍याया पाय्‌छिगु ज्‍याला दइ। 
मचातय्‌सं जिमि मनूतय्‌त क्‍वत्‍यली अले मिसातय्‌सं इमित शासन याइ। हे जिमि मनूत, छिमि नायःतय्‌सं छिमित मखुगु लँपुइ यंकेत्‍यंगु दु अले छिपिं थःगु लँपुइ अलमल जूगु दु। 
परमप्रभु न्‍याय यायेत थःगु थासय् च्‍वनादी, थः प्रजायात विरोधय् न्‍याय यायेत वय्‌कः दनादी। 
परमप्रभुं थकालित व थः प्रजायात शासन याइपिनिगु विरूद्धय् न्‍याय यानादी। वय्‌कलं इमित थथे द्वपं बियादीगु दु – “छिमिसं जिगु क्‍यबयागु दाख नाश याःगु दु। चीमिपिंपाखें लुतय् यानाहःगु मालसामानं छिमिगु छेँ जाःगु दु। 
छिमिसं जिमि प्रजायात क्‍वत्‍यःगु व मगाःमचाःपिनिगु ख्‍वालय् क्‍यःगु मतलब छु खः?” प्रभु, दक्‍व शक्ति दुम्‍ह परमप्रभुं धयादी। 
परमप्रभुं धयादी, “स्‍व, यरूशलेमया मिसात गुलि जक तःधंछुया जूगु। अले यरूशलेमया मिसात छ्यं धस्‍वाकाः मिखा ब्‍वया जुइ, कल्‍लि न्‍ह्यानाः छमछम सः वय्‌काः न्‍यासि जुयाच्‍वनी। 
अथे जुयाः जि परमप्रभुं सियोनया मिसाया छेनय् घाःया घालं जाय्‌काबी अले इमिगु सँ सुचुक्‍क खानाबी।” 
व दिं वयाच्‍वंगु दु, परमप्रभुं इमिगु फुक्‍क बांबांलाःगु तिसा व समा ज्‍वलंत लाका यंकेत्‍यंगु दु। गथेकि– तिसा, छ्यंबाला, गःपःया सिखः, 
न्‍हाय्‌पंचाः, ल्‍हातय् न्‍ह्यायेगु चुरा, ख्‍वाः त्‍वपुइगु कापः, 
छ्यंयागु कापः, लप्‍पाय् तयेगु जन्‍तर, तुतिइ न्‍ह्यायेगु कल्‍या, जँनी, अत्तर, जन्‍तर, 
छाप तइगु अंगुत, न्‍ह्यासय्‌यागु चाःचात, 
भ्‍वय् वनीबलय् फीगु वसः, जामालं, कोटया ब्‍वहलय् घायेगु चिहाकःगु गा, म्‍हिचात, 
न्‍हाय्‌कं, थानातःगु वसः, छेनय् तीगु तिसा, गाःत लाकायंकादी। 
नस्‍वाःगु अत्तरया पलेसा ध्‍वग्‍गीगु नवःगु जुइ, बांलाःगु जँनीया पलेसा खिपः जुइ, बांलाःक सँप्‍वः थुनातःगु सँया पलेसा सुचुक्‍क खाना तःगु सँ जुइ, बांलाःगु वसःया पलेसा बोराया वसः फीगु जुइ। इमिगु बांलाःसू लज्‍याय् हिलावनी। 
शहरय् च्‍वंपिं मनूतय्‌त तरवारं स्‍याइ, अले सिपाइँतय्‌त लडाइँलय् हे स्‍यानाः बी। 
सियोनया मू ध्‍वाखा ध्‍वाखाय् ख्‍वःसः जक जुइ अले मनू सीगुलिं नुगः मछिंका बँय् फेतुनाच्‍वम्‍ह मिसा थें फुक्‍क शहर झिजांमिजां दनी। 
